dëgjoni

Si pjesë përbërëse shumë e rëndësishme e punëve përgatitore të Lojërave Olimpike të Pekinit 2008, puna e mbledhjes së vullnetarëve për Lojërat Olimpike dhe ato Paralimpike 2008 nisi zyrtarisht më 28 gusht. Qysh nga kjo ditë filloi edhe regjistrimi i tyre.

Vullnetarët për Lojërat Olimpike dhe ato Paralimpike ndahen kryesisht në dy grupe, vullnetarë të periudhës së përgatitjes së lojërave dhe vullnetarë të periudhës së zhvillimit të lojërave. Gjatë përgatitjes për Lojërat Olimpike, Komisioni Organizativ i Lojërave Olimpike të Pekinit ka mbledhur afro 300 "vullnetarë të periudhës së përgatitjes".

Sipas planit, më 28 gusht Komisioni Organizativ i Lojërave Olimpike të Pekinit nisi zyrtarisht punën e mbledhjes së vullnetarëve të periudhës së zhvillimit të lojërave. Në një konferencë shtypi po më 28 gusht, zv/kryetari ekzekutiv i këtij komisioni, z. Li Binghua paraqiti planin e mbledhjes së vullnetarëve olimpikë.

"Në bazë të hetimeve e studimeve, është përcaktuar se 70 mijë vullnetarë të periudhës së zhvillimit të lojërave do t'u shërbejnë drejtpërdrejt Lojërave të 29-ta Olimpike, ndërsa 30 mijë të tjerë Lojërave të 13-ta Paralimpike. Gjatë zhvillimit të lojërave, këta vullnetarë do të shpërndahen në 31 stadiume e pallate sportive për gara, 14 terrenë jo për gara, 40 stadiume e pallate të stërvitjes dhe në hotelet e përcaktuara, në stacione trenash e autobusësh si dhe në stadiumet e pallatet sportive të 6 qyteteve të tjera kineze. Ata do të punojnë në 80 sektorë të shërbimeve, si organizimi i garave, shërbimi ndaj shikuesve, mbrojtja e sigurisë e komunikacioni, pritja e mysafirëve, shërbimi i gjuhëve të huaja, funksionimi i mediave, ndihma mjekësore etj."

Komisioni Organizativ i Lojërave Olimpike të Pekinit bëri të ditur se kërkesa bazë për regjistrimin e vullnetarëve është që ditëlindja e vullnetarit duhet të jetë para datës 30 qershor 1990. Krahas kësaj, kërkesa të tjera përfshijnë: të marrë pjesë në shërbimet vullnetare olimpike dhe paralimpike me vullnet, të respektojë ligjet dhe rregullat e Kinës, të ketë mundësi të marrë pjesë në përgatitje dhe aktivitete të tjera përkatëse para lojërave, të ketë mundësi të shërbejë për mbi 7 ditë me radhë gjatë Lojërave Olimpike dhe atyre Paralimpike, të ketë njohuri themelore të gjuhës, të ketë njohuri dhe teknika profesionale, të duhura për një vullnetar etj.

Qysh nga 28 gushti, filloi regjistrimi i banorëve të Pekinit për vullnetarë të periudhës së zhvillimit të lojërave, ndërsa nga marsi i vitit të ardhshëm, do të fillojë edhe regjistrimi i vullnetarëve të huaj.

Kryetari i Komisionit Organizativ të Lojërave Olimpike të Pekinit Liu Qi tha më 28 gusht se puna e mbledhjes së vullnetarëve ka hapur një kanal për masat e gjera popullore kineze dhe miqtë e huaj për të marrë pjesë nga afër në Olimpiadën. Ai u shpreh:

"Ne besojmë se në vitin 2008, buzëqeshja e vullnetarëve do të jetë kartëvizita më e mirë e Pekinit. Mirëpresim të ejani në Pekin për tu bërë vullnetar i Lojërave Olimpike!"

Në ceremoninë e nisjes së mbledhjes së vullnetarëve, kryetari i Komitetit Olimpik Ndërkombëtar Zhak Rozh mbajti një fjalim televiziv. Ai u shpreh se vullnetarët kanë luajtur rol shumë të rëndësishëm në Lojërat Olimpike dhe e përshkroi vullnetarin si "ambasador i Olimpiadës".

"Në fakt pa vullnetarë nuk ka mundësi të zhvillohen Lojërat Olimpike. Puna si vullnetar mund të pasurojë përvojën e një njeriu, ndërsa prova si vullnetar olimpik bëhet shpesh e vetmja përvojë në jetën e një njeriu. Unë i bëj thirrje popullit kinez, si dhe më shumë njerëzve të tjerë të marrin pjesë në grupin tonë dhe të përpiqemi së bashku për suksesin e Lojërave Olimpike 2008." (Wang Lei)