Në vitin 246 para erës së re, që ishte një nga vitet e fundit të periudhës së Shteteve Ndërluftuese në historinë kineze, Ying Zheng 13 vjeçar trashëgoi fronin mbretëror të shtetit Çin, një nga principatat e dinastisë Zhou, të cilat kishin bërë për vite me radhë luftëra për të aneksuar njëra tjetrën. Shteti Çin, që gjendej në provincën e sotme Shensi të Kinës Veriperëndimore, ishte shteti më i fuqishëm ndër ato principata. Ying Zheng, pasi u bë një burrë i fortë, i vuri personat e talentuar në poste drejtuese dhe i kushtoi vëmendje zhvillimit të shtetit të tij nga ana ushtarake, duke pasur ambicie për të vendosur hegjemoni. Brenda 10 e ca vjetëve të mëvonshëm, ai shpërtheu luftëra të shumta për aneksimin e shteteve të tjera dhe, më në fund, e bashkoi gjithë vendin dhe krijoi dinastinë Çin. Kështu, titulli i tij u shndërrua nga "mbreti i shtetit Çin" në "perandori i parë i dinastisë Çin".

Bashkimi i Kinës nga Çin Shi Huang pati rëndësi të madhe dhe mbeti një kontribut i tij për zhvillimin e historisë së Kinës. Ai anuloi rendin e ndarjes së vendit në principata dhe krijoi rendin administrtiv të qarqeve dhe distrikteve, duke e ndarë vendin në 36 qarqe dhe duke i ndarë qarqet në distrikte. Emrat e shumë distrikteve të atëhershme janë ruajtur deri tani.

Një kontribut tjetër i rëndësishëm i perandorit Çin Shi Huang ishte njësimi i hieroglifeve kineze. Para asaj kohe, shtetet e ndryshme përdornin hieroglifet e veta dhe kjo gjë pengonte përhapjen e kulturës dhe shkëmbimet midis zonave të ndryshme, megjithëse shkronjat e mëparshme kishin qenë të përafërta ose të ngjashme. Ai unifikoi edhe njësitë e gjatësisë, nxënësisë dhe peshës, që nuk kishin qenë të njëllojta në shtetet e ndryshme. Ai njësoi edhe monedhat dhe ligjet. Të gjitha këto patën rëndësi shumë të madhe për zhvillimin e ekonomisë dhe për konsolidimin e pushtetit qendror.

Çin Shi Huang ka qenë i denjë të konsiderohet si figurë e madhe në historinë kineze, por edhe veprimet e tij tiranike, ashtu si meritat e tij, kanë mbetur të gdhendura në materialet historiografike kineze. Me qëllim të mbrojtjes së vendit nga trazirat e kombësive shtegtare të veriut, ai dha urdhrin për të detyruar me forcë një numër të madh banorësh të ndërtonin Murin e Madh, një mur mbrojtës, që nis nga shkretëtirat në perëndim dhe përfundon te deti në lindje, pasi gjarpëron nëpër male të larta dhe lugina të thella. Në kushtet e atëhershme, kjo punë, që konsumoi një sasi të madhe forcash materiale dhe njerëzore, e dëmtoi rëndë popullin kinez.

Një akt tjetër tiranik famëkeq i perandorit Çin Shi Hung ishte "djegia e librave dhe varrosja e intelektualëve të gjallë". Për të konsoliduar pushtetin e tij autokratik nga ana ideore, në vitin 213 para erës së re, ai dha urdhrin për djegien e librave klasike konfuciste dhe librave historiografikë të ish-shteteve të tjera, përveç librit të historisë së shtetit Çin. Madje, me urdhrin e tij, rreth 400 intelektualë, që ngulën këmbë t'i mbanin ato libra, u varrosën të gjallë.

Megjithatë, duke bashkuar gjithë vendin, Çin Shi Huang i dha fund gjendjes së ndarjes së vendit për një kohë të gjatë dhe krijoi një perandori të fuqishme feudale dhe shumëkombëshe, me kombin han si forcë kryesore, gjë që hapi një faqe të re në historinë kineze. (Zheng)