Su Erdong është pedagog në Rajonin Autonom të Sinkiang-Ujgurit të Kinës veriperëndimore. Ai ka prirje të mëdha në krijimin e këngëve dhe në këndim. Gjatë rreth 10 vjetëve të fundit ai ka nxjerrë 5 disqe me mbi 120 këngë, si "Banorët hui", "Vajza me vello të kuqe", "Lule shelgu" etj.

Që në fëmijëri Su Erdongut i pëlqente këndimi. Pas diplomimit në universitet, ai filloi krijimet muzikore. Atëherë shumica e këngëve të krijuara prej tij ishin këngët e kombësive kazake e ujgure. Më vonë, pas një takimi me bashkëstudentët, ku pati një bisedë me ta, ai filloi të krijojë këngë të kombësisë hui. Ai kujton kështu:

"Në atë takim një mik më tha: 'Ke kënduar kaq bukur këngë ujgure e kazake, pse nuk këndon ndonjë këngë të kombësisë hui?'. Kurse një mik tjetër më tha: 'E ku ka këngë kombësia hui?' Pikërisht kjo fjalë më ngacmoi."

Su Erdong kuptoi se këngët e kombësisë hui janë kufizuar në këngët "huaer", shumica e të cilave këndohen në dialekt. Pikërisht nga kjo arsye, po bëhet gjithnjë e më i vogël numri i njerëzve që dinë të këndojnë dhe të kuptojnë këngët "huaer".

Kështu Su Erdong filloi të studiojë kulturën e historinë e kombësisë hui, duke zbuluar se në historinë e Kinës ka pasur dhe ka shumë persona të dalluar të kombësisë hui, si lundërtari i lashtësisë Zheng He, shkrimtari Pu Songling, artisti i estradës me dialog Ma Sanli etj.

Me qëllim që të tjerët ta njohin kombësinë hui, Su Erdong-i krijoi këngën: "Banorët hui". Mikut të tij të ngushtë Bao Yucheng i pëlqen shumë kjo këngë. Ai tha:

"Su Erdong ka shprehur në formën e këngës prirjet dhe dëshirat e banorëve hui. Unë jam shumë dakord me këtë. Në saje të muzikës së Su Erdongut e kam njohur shumë edhe kulturën e historinë e kombësisë hui."

Su Erdong ka kaluar një rrugë të vështirë për krijimin e këngëve. Për të nxjerrë kasetën e parë me këngë të tij, atij i mungonin paratë, ndaj së bashku me të shoqen e të birin i paketonin vetë kasetat. Për propagandimin e kasetës muzikore, ai këndonte kudo që shkonte, si në fushat sportive të shkollave, në sheshet e qytetarëve dhe në arat e fshatarëve. Ai këndonte plot emocion si për nxënës, ashtu edhe për qytetarë e fshatarë. Dalëngadalë ai nisi të mirëpritet nga spektatorët. Miku i tij Bao Yucheng u tha korrespondentëve:

"Së bashku me të kam shkuar në fshatra. Pamjet e interpretimit të tij më kanë prekur shumë dhe emocioni ishte i paparë. Në shkollën e kombësisë hui, Su Erdong ishte rrethuar nga shumë nxënës, që kërkonin autografe prej tij. Ata i dëgjonin këngët e tij me lot në sy. Tani jo vetëm banorëve hui, por edhe banorëve të kombësive të tjera të Sinkiangut, si ujgure, kazake etj., u pëlqejnë shumë këngët e Su Erdongut."

Pëlqimi nga zemra i këngëve të tij nga masat popullore ka nxitur entuziazmin krijues të Su Erdongut. Pak kohë më vonë ai, me fonde të grumbulluara vetë, regjistroi dhe publikoi disqet VCD: "Banorët hui", "Vajza e kombësisë hui", "Vajza me vello të kuqe", "Lulja e shelgut e të dashurit" etj. Këngët e tij janë përhapur gjerësisht në viset e Kinës veriperëndimore, si dhe në zonat e tjera të Kinës ku jetojnë banorët e kombësisë hui.

Qytetari i kombësisë hui në Pekin, zoti Ma Zheli, tha se këngët e Su Erdongut i pëlqejnë jo vetëm atij, por edhe i biri 10-vjeçar i ka shumë për zemër. Këngët e tij janë jo vetëm të bukura, por kanë edhe vlerë edukuese. Zoti Ma tha:

"Në këngët e Su Erdongut flitet për historinë e kombësisë hui, propagandohen konceptet e drejtësisë, vullnetit, dashurisë, të mbrojtjes së mjedisit etj. Unë mendoj se ato kanë vlerë shumë të madhe në këto drejtime, prandaj unë i këshilloj fëmijët e mi të dëgjojnë këngët e tij."

Disa analistë të muzikës janë të mendimit se këngët e Su Erdongut kanë marrë motivet e këngës "Huaer", kanë adoptuar edhe të mirat e këngëve të kombësive të tjera kineze, bashkë edhe me ritmet e muzikës moderne, duke i mbushur këngët plot me frymën e jetës dhe të kohës. Le të dëgjojmë krijimin e tij përfaqësues: "Banorët hui".

Su Erdong interpreton shpesh në gjirin e popullit pa kërkuar shpërblim. Ai thotë se në popull janë rrënjët e tij dhe burimi i krijimtarisë së tij, prandaj duhet t'u këndojë atyre dhe të këndojë në gjirin e tyre.( Daming )