"Tërmeti i Tangshanit më 28 korrik të vitit 1976 ishte një ngjarje e rëndësishme në historinë moderne kineze. Tërmeti ndryshoi fatin e shumë njerëzve. Në atë kohë isha një anëtar i grupit mjekësor. Gjatë gjysmë muaji shumë tregime të shpëtimit të të plagosurve më prekën shumë. Nuk do ta harroj kurrë këtë përvojë. Jam i mendimit se lexuesit mund të mësojnë shumë gjëra nga libri im."

Su Shuyang lindi në vitin 1938 dhe i pëlqente letërsia qysh në moshë të re. Kur ishte në shkollë të mesme, Su Shuyang filloi të shkruajë drama dhe e përcaktoi krijimin e letërsisë si synimin e vet. Pas mbarimit të studimeve në universitet, Su Shuyang filloi punë si pedagog në Universitetin e Mjekësisë Kineze të Pekinit. Në kohën e lirë, ai krijoi dramën "Zemra" që flet për disa studiues që merren me mjekësinë tradicionale kineze. Ndjenjat e sinqerta të personazheve të dramës i prekën shikuesit dhe kjo dramë fitoi çmimin e parë për skenarin në shkallë kombëtare.

Suksesi i madh i dramës "Zemra" e ndryshoi fatin e Su Shuyangut. Në vitin 1978, ai u largua nga universiteti dhe u bë një skenarist profesionist në Studion e Filmit të Pekinit. Atë kohë në Kinë sapo kishin filluar reforma dhe hapja ndaj botës së jashtme, Su Shuyang krijoi skenarin e filmit "Rruga Xizhao" që pasqyronte ndryshimet në jetesën e banorëve të thjeshtë të Pekinit. Su Shuyang tha:

"Atë kohë pashë ndryshime të mëdha në Pekin. Njerëzit kërkonin ëndrra të reja por njëkohësisht nuk mund të shkëputeshin rrënjësisht nga jeta e vjetër."

"Rruga Xizhao" përshkruan dëshirat e disa familjeve të zakonshme të Pekinit që banonin në rrugën Xizhao në atë kohë. Një i ri donte të hapte një dyqan ushqimesh, një çift mësuesish donte të kishte një apartament të ri, një vajzë donte të studionte jashtë vendit. Më në fund, ata i realizuan dëshirat e tyre. Njëkohësisht u rrëzuan banesat e vjetra për të ndërtuar lagjen e re. Megjithëse banorët nuk dëshironin të largoheshinn nga kjo rrugë, ata prinin një të ardhme më të bukur.

Pas shfaqjes, filmi "Rruga Xizhao" ngjalli jehonë të madhe. Madje shumë shikues e panë disa herë. Suksesi i filmit ngjalli entuziazmin e Su Shuyangut për të vazhduar të krijojë. Ai shkroi me radhë skenarët "Lulet e çelura", "Shi në pranverë", novelën "Vendlindja", antologjinë e poemave "Dashuria" etj. Këto vepra pasqyrojnë kryesisht jetën e banorëve dhe zakonet e Pekinit, e shumë ndër këto vepra u botuan në gjuhë të huaja.

Su Shuyang arriti suksese të mëdha në letërsi, por shëndeti i tij u keqësua nga kanceri i stomakut. Megjithatë Su Shuyang nuk ka hequr dorë nga letërsia, ai vazhdon të krijojë vepra letrare duke luftuar me sëmundjen. Gjatë 12 vjetëve pas zbulimit të sëmundjes, Su Shuyang ka shkruar vepra letrare me 3 milionë fjalë dhe ka botuar 7 libra. Ndër ta, libri "Kina" që i njeh lexuesit me gjeografinë, kombësitë, kulturën, zakonet, arritjet artistike etj. të Kinës është shitur në më se 12 milionë kopje pas botimit në vitin 1999.

Për shkak të shëndetit, Su Shuyang nuk shkruan më skenarë, por ai i kushton vëmendje të madhe krijimit të skenarëve në Kinë. Ai propozoi:

"Skenari ka rëndësi të madhe në një film. Filmi kinez ka perspektivë të gjerë, duhet të përgatiten më shumë skenaristë të shquar."

Tani Su Shuyang është përsëri i zënë. Kur po shkruante librin "Kina", ai vizitoi shumë muzeume në mbarë vendin dhe i lindi një interes i madh për arkeologjinë dhe antropologjinë. Su Shuyang tha se ai i konsideron të gjithë njerëzit si miq të tij dhe e përballon jetën me qëndrim optimist. (Fani)