dëgjoni

Nga hulumtimet shkencore del se, gjatë djegies së tij, duhani lëshon mbi 4000 lloje lëndësh të dëmshme, që mund të shkaktojnë kancerin, sëmundjet e enëve të gjakut të zemrës, osteoporosisin dhe shumë sëmundje të tjera. Çdo vit, 5 milionë njerëz në botë vdesin nga sëmundjet që kanë lidhje me duhanin. Për këtë arsye, shumë nga duhanpirësit kanë dëshirë ta lënë duhanin, por pak prej tyre ia dalin me sukses.

Sot në tërë globin tokësor, 1 miliard e 100 milionë njerëz pinë duhan dhe mbi 50% e tyre përpiqen ta lënë atë, por shumë prej tyre nuk e dinë se cili është kyçi i lënies së duhanit. Lidhur me këtë çështje, foli ekspertja e njohur e higjienës publike dhe zv-drejtoresha e Qendrës Kineze të Parandalimit dhe Frenimit të Sëmundjeve, zonja Yang Gonghuan.

"Ata, që duan ta lënë duhanin, duhet të tregojnë në radhë të parë vendosmërinë e vet dhe të gjithë të tjerët duhet t'i përkrahin ata. Po të krijohet një atmosferë e tillë shoqërore, ata do të kenë më të lehtë në përpjekjet e tyre. Sigurisht, atyre duhanxhinjve, që nuk durojnë dot pa pirë duhan, u duhen disa ilaçe si një mjet ndihmës. Vendosmëria, mjedisi shoqëror dhe ilaçet janë tri kushtet e domosdoshme për lënien e duhanit."

Kur një njeri i kupton me të vërtetë dëmet e duhanit për shëndetin e tij dhe bëhet me të vërtetë i ndërgjegjshëm se pirja e duhanit është veprim jo i qytetëruar, me siguri do të ketë vendosmëri të patundur për ta lënë duhanin. Qytetarja nga Pekini, Li Gui Zhen tha:

"Unë jam plakur! Duhani nuk më bën mirë. Kur kollitem, nxjerr këlbazë të zezë."

Edhe disa banorë të tjerë të Pekinit thanë se ata nxjerrin shumë këlbazë pikërisht sepse pinë duhan. Veçanërisht, kur shtrihen në shtrat për të fjetur, ata dëgjojnë zhurmë të madhe në grykën e vet, që e shkakton këlbaza. Duhani është ai që u krijon atyre kollë dhe ata vuajnë nga kolla sidomos në mëngjes, kur zgjohen nga gjumi.

Por disa të tjerë mendojnë të kundërtën. Dikush thotë se duhanpirësit kanë më pak mikrobe të gjalla në gojë se ata që nuk pinë duhan. Dikush tjetër thotë se, gjatë ekspeditës së trupave të Napolenit për të mposhtur Afrikën Veriore, të gjithë ushtarët, që nuk pinin duhan, vdiqën duke kaluar në një zonë epidemike, kurse të gjithë ushtarët duhanpirës shpëtuan. Madje, dikush thotë se duhanpirësit mund të sëmuren fill pasi e lënë duhanin.

Këto thënie të llojllojshme të gabuara mund të lëkundin vendosmërinë tuaj për lënien e duhanit, prandaj është e domosdoshme që ju të keni njohuritë përkatëse. Në fakt, një sërë provash shkencore vërtetojnë se duhani nuk ka asnjë dobi për shëndetin e njeriut dhe sjell vetëm dëme. Me një fjalë, lënia e duhanit ju sjell dobi dhe pirja e tij ju sjell dëme, pavarësisht se sa vjeç jeni dhe sa kohë keni që e pini. Në fillim pas lënies së duhanit, ju mund të ndiheni si pa qejf, por lënia e duhanit kurrë nuk do t'ju shkaktojë sëmundje.

Deri tani, mbi 190 vende të botës kanë nënshkruar "Konventën Kornizë mbi Kontrollin e Duhanit", reklamat e duhanit janë ndaluar në mediet dhe gjithnjë e më shumë rregullore ligjore mbi ndalimin e duhanit nxirren varg njëra pas tjetrës në vende të ndryshme të botës, pra, po krijohet një mjedis i jashtëm i favorshëm për ndalimin e duhanit.

Nga ana tjetër, edhe një mjedis rrethues, gjithashtu, është i rëndësishëm për lënien e duhanit, prandaj ju duhet t'u thoni të afërmve, fqinjëve dhe miqve tuaj se po bëni përpjekje për ta lënë duhanin dhe se ju kërkoni përkrahjen e tyre. Në të njëjtën kohë, ju duhet të gjeni edhe partnerë në përpjekjet për lënien e duhanit, me qëllim që të mbështesni njëri tjetrin, gjë që jua lehtëson këto përpjekje.

Në procesin e lënies së duhanit, ndihma me disa lloje ilaçesh është e domosdoshme për ata duhanpirës që e kanë ves duhanin. Këto ilaçe mund të pakësojnë depresionin psikik, shqetësimin shpirtëror dhe dhembjen e kokës, që ndiejnë ata gjatë përpjekjeve për të lënë duhanin.

Në qoftë se keni mbi 6 muaj që e keni lënë duhanin, atëherë ndodheni ende në fazën fillestare, prandaj kini kujdes për të ruajtur frytet e përpjekjeve tuaja dhe për të shmangur rifillimin e pirjes së duhanit.

Mësuesja Lu Xiuxia, e cila ka 30 vjet që pi duhan, e la atë në vitin 2004, mirëpo filloi përsëri pas një viti dhe pi tani të paktën 4 cigare në ditë. Lidhur me këtë, ajo tha:

"Të tjerët qeshën se fillova përsëri të pi cigare, por unë thashë se nuk kam zakon tjetër të keq, përveç pirjes së duhanit."

Nga të dhënat përkatëse del se duhanpirësit që përpiqen të lënë duhanin, ia dalin me sukses pasi dështojnë mesatarisht 7 herë. Ata, që dështojnë një ose disa herë në lënien e duhanit, nuk duhet të dëshpërohen dhe të dorëzohen, por duhet të rifillojnë sa më parë përpjekjet e veta. (Zheng)