Dëgjues të dashur, ju me siguri e njihni mirë këtë këngë të lashtë arbëreshe me një histori mbi 500 ? vjeçare, "Moj e bukura More ".

Nga zëri i bukur i kësaj kënge, ju me siguri e dalloni se interpretuesja e saj është këngëtarja e njohur dhe shumë e mirë pritur shqiptare Elsa Lila.

Kjo këngëtare e re shqiptare që fitoi qysh në moshën l5 vjeçe çmimin e parë në Festivalin e Radio Televizionit Shqiptar, është vlerësuar me çmime jo vetëm në festivalet në Shqipëri, por edhe në disa festivale ndërkombëtare, si në "Varna Te" të Bullgarisë, në " Zëri i Azisë" të organizuar në Almati të Kazakistanit etj.

Si "ambasadorja e muzikës shqiptare" e shpallur nga ish-presidenti i Shqipërisë Rexhep Mejdani, Elsa Lila ka kënduar me shumë sukses në shumë vende të botës, si në Lisbonë të Portugalisë, në Zvicër, në Nju Jork të SHBA-së, në festivalin më prestigjioz dhe më të njohur në Itali "Sanremo", si dhe në spektakle e koncerete të shumta në Itali dhe Shqipëri.

Pjesa që po dëgjoni është interpretuar nga këngëtarja e njohur shqiptare Elsa Lila, e ftuar në mbrëmjen finale të Festivalit të 41-të të RTSH-së, ku ajo u duartrokit si kurrë ndonjëherë në skenat shqiptare. Siç njoftoi media shqiptare : "Elsa Lila ka dhuruar në sallën e madhe të Pallatit të Kongreseve emocione të papërsëritshme."

Në verën e këtij viti, duke ushqyer një miqësi të madhe për popullin kinez, Elsa Lila erdhi për pushimet verore së bashku me mikun e tij Elton Caci në Pekin.

Duke folur për ardhjen e saj në Pekin, Elsa tha: "Kishim shumë miq të familjes sonë që kishin ardhur në atë kohë të studionin në Kinë dhe pastaj ishin kthyer në Shqipëri. na tregonin se si kishin kaluar këtu. Dikush kishte studiuar për mjekësi, dikush për diplomaci, ju i dini shkëmbimet kulturore që bëheshin atëherë midis Shqipërisë dhe Kinës. Atëherë dy popujt kishin një miqësi shumë të ngushtë. Normalisht si fëmijë dëgjoja shumë shpesh që flisnin për Kinën dhe për popullin kinez në mënyrë shumë dashamirëse. Pastaj gjyshi im në kohën e komunizmit ka qenë ushtarak me grada të larta. Ai ka ardhur në Kinë e ka pritur edhe miqtë kinezë dhe kishte lidhur një miqësi të madhe me kinezët". Prandaj qysh në vogëli Elsa kishte një dëshirë të madhe për të vizituar Kinën, për t'u njohur me kulturën e lashtë tradicionale kineze.

Gjatë qëndrimit kësaj here në Pekin, zonjushë Elsa jo vetëm vizitoi Murin e Madh Kinez dhe disa kuriozitete të Pekinit, por ishte kënaqur edhe me patinazhin në fushën e patinazhit në Pallatin e Tregtisë Ndërkombëtare të Pekinit dhe me takimet me miqtë kinezë e shqiptarë në Pekin në kafenë "Starbucks " duke pirë kapçino.

Ajo u ftua nga gazetarja e redaksisë së gjuhës shqipe të Radios së Jashtme e Kinës Huailu si mysafire në Radion e Jashtme të Kinës dhe u prit nga miqtë kinezë të radios. Përveç takimit me shqipfolësit e redaksisë së gjuhës shqipe, vizitës në vitrinat e radios me dhurata të dërguara nga dëgjuesit shqiptarë etj, Elsa Lila u ftua për të dhënë intervistë në emisionet e gjuhës shqipe. Si këngëtare sukseseshme e emigruar në Itali, ajo zhvilloi një intervistë në gjuhën italiane për emisionin e gjuhës italiane e në gjuhën angleze në "Inetradio", ku u xhirua edhe videoja për uebsajtin e kësaj radioje si dhe në "CRI Newsradio" ( emisionet e lajmeve botërore të RJK-së).

Në këto intervista, zonjusha Elsa Lila i njohu dëgjuesit e kësaj radioje me sukseset e saj në skenat e muzikës botërore dhe me përshtypjet e saj për Pekinin. Ndër të tjerat ajo tha : "Për mua është hera e dytë që gjendem në Pekin dhe është gjithmonë një kënaqësi që të rikthehem në këtë qytet të bukur dhe me tradita. Eshtë një qytet që mbart mbi supe një histori të lashtë, një kulturë të mrekullueshme. Kam pasur rastin të shëtis disa nga monumentet, si Pallati i madh i Mao Ce Dunit, Pallati i Verës i Perandorit dhe disa tempuj. Më kanë pëlqyer shumë dhe jam ndier shumë mirë midis këtij populli mikpritës."

Në intervistën për redaksin e gjuhës shqipe, ajo recitoi edhe poezinë e poetit të njohur shqiptar Naim Frashëri:

Malet e Shqipërisë e ju, o lisat e gjatë,

fushat e gjera me lule q'u kam ndër mend dit' e natë,

ju, bregore bukuroshe,

e ju, lumenjt' e kulluar,çuka, kodra, brinja, gërxhe dhe pyje të gjelbëruar,

do të këndoj bagëtinë që mbani ju e ushqeni

o vendëthit e bekuar ju mendjen ma dëfreni.

Ti Shqipëri më jep nder, me jep emrin shqiptar,

Zemrën ti ma gatove plot me dëshirë e me zjarr.

Në fund të kësaj interviste, ajo këndoi për dëgjuesit shqiptarë edhe këngën e saj mjaft të mirëpritur: "Moj e bukura more "...4...

Në redaksinë e gjuhës shqipe, Elsa Lila vizitoi uebsajtin në shqipe dhe lexoi gazetën " Dritare" në gjuhën shqipe.

Nga artikujt e kësaj gazete, Elsa mësoi se në emisionin e CCTV-së "Magjia e filmave shqiptarë" po përgatiten të transmetohen edhe tregimet nga disa filma të vjetër shqiptarë, të rrëfyera gjatë intervistave me shumë kineastë të vjetër shqiptarë. Ndër ta, shumë janë miq të familjes së saj, si regjisorët e njohur Piro Milkani, Zhanfise Keko, Mevlan Shanaj etj.

Për arsye se edhe Elsa ka lindur në një familje artistësh e është rritur në gjirin e artistëve shqiptarë, si dhe ka parë shumë nga këta filma të vjetër, ajo u ftua si një nga shikuesit e rinj shqiptarë edhe në rubrikën e CCTV-së "Magjia e filmave artistikë" dhe u intervistua nga gazetari i parë i kësaj rubrike Zhao Yigong.

Z.Zhao e mirëpriti atë duke thënë se " pjesëmarrja juaj në këtë rubrikë kryesisht me intervistat e kineastëve veteranë do të tërheqë vëmendjen e teleshikuesve kinezë."

Në intervistë, ajo tregoi përshtypjet e saj për filmat me temë nga lufta dhe filmat për fëmijë që kanë ushtruar një ndikim pozitiv në rritjen e saj.

Në intervistë Elsa bëri edhe krahasime midis filmave të djeshëm dhe të sotëm, ndër të tjera ajo tha :

Pasi mori vesh se filmi artistik shqiptar "Ngadhënjim mbi vdekjen" ishte shumë i njohur dhe i mirëpritur nga brezi i vjetër në Kinë, dhe kënga e këtij filmi ishte e përhapur dikur në Kinë, megjithëse nuk i kujtohej ky film, Elsa Lila e mësoi dhe e interpretoi aty për aty tani për tani këngën e filmit "Ngadhënjim mbi vdekjen" në gjuhën shqipe dhe atë kineze.

Pjesa që po dëgjoni është kënga nga filmi shqiptar "Ngadhënjim mbi vdekjen " e interpretuar nga Elsa Lila për këtë rubrikë.

Elsa Lila ka dëshirë të madhe për të dhënë shfaqje në Kinë dhe gjatë qëndrimit në Pekin, me ndihmën e gazetares sonë, ajo u takua me muzikantin dhe drejtuesin e njohur artistik të shumë rubrikave dhe spektakleve madhështore të CCTV-së Bian Liunin. Pasi dëgjoi këngët e interpretuara prej saj, z. Bian Liunin e vlerësoi lart dhe e ftoi atë të marrë pjesë në Festivalin Ndërkombëtar të muzikës fshatare të organizuar në qytetin Sining të provincës Qinhai. Për arsye se në fund të korrikut, Elsa kishte plane të tjera, ajo e falënderoi z. Bian për ftesën dhe u shpreh se do të mësojë gjuhën kineze dhe kur të vijë herë tjetër, do t'u sjellë muzikëdashësve kinezë këngët e saj të bukura në gjuhën kineze.

Me afrimin e Lojërave Olimpike të vitit 2008 në Pekin dhe me shtimin e shkëmbimeve kulturore midis Kinës dhe botës së jashtme, si këngëtarë të tjerë të huaj, edhe zonjusha Elsa Lila do të ketë shumë shanse për të dhënë shfaqje në Kinë.

Ne i urojmë saj suksese të reja jo vetëm në skenat e Evropës, por edhe në skenat e Kinës.( Zhai)