Kombësia pumi është një nga pakicat kombëtare me populli të vogël, më pak se 30 mijë banorë, të cilët përqendrohen kryesisht në distriktin Lanping të provincës Ynan të Kinës jugperëndimore. Nga ekonomia e prapambetur dhe nga shkaqe të tjera, për një kohë të gjatë kushtet e mësimdhënies te kombësia pumi kanë qenë relativisht të dobëta dhe njëkohësisht ekzistonin edhe dukuri të braktisjes së shkollës nga disa fëmijë të moshës shkollore. Vitet e fundit, me përkrahjen e madhe të qeverisë kineze, kushtet e mësimdhënies te kombësia pumi janë përmirësuar dukshëm dhe të gjithë fëmijët që braktisën shkollën, u rikthyen në shkollë.

Dëshmitare e këtyre ndryshimeve ka qenë një shkollë fillore e kombësisë pumi me emrin "Ganzhuhe" dhe drejtori i kësaj shkolle, zoti Xiong Yuven.

Çdo mëngjes, drejtori i shkollës "Ganzhuhe" Xiong Yuven ngrihet herët dhe e ndihmon kuzhinierin në përgatitjen e mëngjesit për nxënësit konviktorë. Duke folur për mensën e vogël, por të ndriçuar të nxënësve, drejtori Xiong tha me krenari:

"Të gjitha karriget dhe tavolinat e mensës janë të reja, ato janë tri tryeza, secila për 8 veta, gjithsej për 24 fëmijë konviktorë."

Shkolla fillore "Ganzhuhe" ka mbi 150 nxënës, një pjesë e të cilëve që e kanë shtëpinë larg shkollës, jetojnë në konviktin e shkollës. Më parë ushqimet e tyre ata i përgatitnin vetë, prandaj këta fëmijë kishin shumë probleme lidhur me ushqimin. Për ta zgjidhur këtë problem, shkolla ngriti për ta këtë mensë të vogël.

Përveç zgjidhjes së këtij problemi, u ftuan edhe disa mësues nga shkolla e distriktit Lanping, për të ngritur cilësinë e mësimdhënies në shkollën "Ganzhuhe". Mësuesja Zhang Min është një nga këta mësues të ftuar. Ajo u tha korrespondentëve:

"Mjedisi i jetës këtu ishte shumë i keq, kishte shumë minj, që lëviznin kudo nëpër dhomë, sidomos mbrëmjeve."

Por tani, me shtimin e investimeve të qeverisë, pranë shkollës "Ganzhuhe" është në ndërtim e sipër një konvikt dykatësh i mësuesve. Në shtator të këtij viti mësuesit mund të hyjnë për të banuar në këtë ndërtesë. Drejtori Xiong tha se pas ndërtimit të këtij konvikti, çdo mësues do të ketë nga një dhomë.

Për këtë shkollë fillore drejtori Xiong 57-vjeçar ushqen një ndjenjë të thellë. Dhjetëra vjet më parë ai ka qenë nxënës në këtë shkollë. Në atë kohë, shkolla përbëhej vetëm nga disa kasolle të thjeshta, të cilat nuk përballonin as shiun e verës dhe as erën e dimrit. Xiong Yuven i vogël vendosi që ndonjë ditë në të ardhmen ta ndryshojë këtë shkollë e ta bëjë më të bukur. Pas përpjekjesh të mëdha, Xiong Yuven kaloi provimet dhe hyri në shkollën pedagogjike të qarkut, ku studioi me shumë zell për realizimin e ëndrrës së fëmijërisë.

Ai tha: "Sipas mendimit tim, viset tona kanë qenë me të vërtetë të varfra, për shkakun kryesor të mungesës së intelektualëve. Nëse fshatarët tanë vazhdojnë të jetojnë kështu, viset tona nuk do të zhvillohen dhe do të jenë edhe më të varfra."

Në vitin 1995 Xiongu u kthye në vendlindje dhe, ashtu siç ëndërronte, u bë një nga mësuesit e shkollës "Ganzhuhe". Ndryshimet e shkollës e kanë forcuar vendosmërinë e Xiongut për të punuar si arsimtar në fshat.

Xiong Yuven tha: "Pasi u ktheva në vendlindje, vura re se shkolla ime ka bërë përparime, sepse ka përgatitur disa studentë dhe disa maturantë. Unë shpresoj se nga të diplomuarit e shkollës sime do të dalin më shumë studentë dhe më shumë talente."

Drejtori Xiong tha se fakti që e ka shtuar më shumë vendosmërinë e tij, është politika e qeverisë kineze për heqjen e pagesës së shkollimit të nxënësve në kushte të vështira ekonomike dhe njëkohësisht për dhënien atyre të disa subvencioneve.

Nxënësi 13-vjeçar Yin Zhaoquan e braktisi shkollën për shkak të vështirësive ekonomike, kur ishte në klasën e tretë. Por ai priste të rikthehej në shkollë.

Dëshira e Yin Zhaoquanit u realizua shumë shpejt. Sipas politikës së shtetit, shkolla ia hoqi atij pagesën e shkollimit dhe i jep edhe 40 yuanë subvencion për çdo muaj, me qëllim që ai të studiojë i qetë. Në Lamping ka 18 mijë nxënës që gëzojnë këtë politikë të privilegjuar të qeverisë.

Për të ardhmen e shkollës "Ganzhuhe", drejtori Xiong është plot besim.

"Deri tani nuk kemi asnjë nxënës që ka braktisur shkollën nga kushtet e vështira ekonomike. Unë besoj se nga gjiri i nxënësve do të dalin më shumë talente më të forta se unë."

Kur po largoheshin nga kjo shkollë e kombësisë pumi, korrespondentet tona dëgjuan nxënësit tek recitonin, zëri i të cilëve tingëllonte nëpër male.

( Drita-Daming )