Ju flet Radio e Jashtme e Kinës. Të dashur dëgjues, unë jam Pina, po takohemi përsëri në programin e sotëm muzikor. Në këtë program do të shijojmë së bashku këngët popullore të Singjiangut, të kënduara nga këngëtari ujgur Rouzamuti.

Kënga që po dëgjoni titullohet "Një gotë raki e dashur", kënduar nga Rouzamuti. Në këngë thuhet: "Ndjenjat e mia miqësore janë si një gotë raki, o mik, pranoji të lutem. Shqiponjat fluturojnë rreth e rrotull mbi malin Tianshan e nuk ikin, ne mblidhemi së bashku dhe nuk duam të ndahemi. O mik, në çastet e gëzueshme rakia aromatike të deh dhe unë ngre një dolli për miqësinë tonë të përjetshme."  dëgjoni

Sapo dëgjuat këngën popullore të kombësisë ujgure "Një gotë raki e dashur", kënduar nga këngëtari Rouziamuti.

Rouzamuti, këngëtari solist i Ansamblit Qendror të këngëve dhe valleve të kombësive të Kinës, ka lindur në qytetin e Urumçit të Rajonit Autonom të Singjiang-Ujgurit. Që në vogëli atij i pëlqen të këndonte dhe të vallëzonte. Në vitin 1985 ai u pranua në fakultetin e muzikës të Konservatorit të Shangait. Pas diplomimit ai u pranua në Ansamblin e këngëve dhe valleve të qytetit Urumç dhe në vitin 1997 filloi të punojë si këngëtar solist në Ansamblin Qendror të këngëve dhe valleve të kombësive.

Kënga që po dëgjoni është një këngë popullore e kombësisë kazake me titull "Një trëndafil i bukur", kënduar nga Rouzamuti, përpunuar dhe kompozuar nga Wang Luobin. Kënga u këndon vajzave kazake të bukura si trëndafila dhe pasqyron dashurinë dhe adhurimin e djalit për vajzën e tij.  dëgjoni

Kur punonte në Ansamblin e këngëve dhe valleve të qytetit Urumç. Rouzamuti në bashkëpunim me kompozitorin e ndjerë Wang Luobin, këndoi shumë këngë popullore të Singjiangut, të përpunuara prej tij. Wang Luobin ishte kompozitor i njohur kinez, shumë këngë popullore të Singjiangut të përpunuara prej tij janë përhapur gjerësisht në Kinë. Duke dëgjuar shpjegimet e Wang Luobinit, Rouzamuti e kuptoi më mirë përmbajtjen e veprave muzikore dhe këndoi më bukur.  dëgjoni

Kjo këngë që po dëgjoni titullohet "Ku je vajza ime", e përpunuar në bazë të këngëve të kombësisë ujgure nga Wang Luobini. Kjo këngë dashurie e freskët dhe e rrjedhme, e kënduar nga Rouzamuti me zë të lartë dhe në mënyrë entuziaste e lirike, karakterizohet nga ngjyra dhe shija e theksuar kombëtare. Le ta dëgjojmë së bashku atë.