dëgjoni

Në bregdetin e Kinës juglindore ka një provincë. Para mbi 20 vjetëve, ajo ka qenë një nga zonat e zbatimit më herët të reformës dhe të hapjes në Kinë. Sot, kjo provincë është bërë përsëri një zonë kryesore e zhvillimit.

Në fund të viteve '70 të shekullit të kaluar, Kina zbatoi më parë politikën e reformës dhe të hapjes në disa provinca bregdetare. Në atë kohë, provinca Fujian shfrytëzoi epërsinë gjeografike afër Hong-Kongut dhe Makaos, duke siguruar statusin e provincës së madhe me investime të shumta të drejtpërdrejta të biznesmenëve të huaj. Pas mbi 20 vjetëve, në krahasim me provincën Guangdong, që filloi në të njëjtën kohë me Fujianin reformën dhe hapjen, zhvillimi i ekonomisë së Fujianit është më i ngadalshëm. Në vitin 2005, vëllimi i prodhimit të përgjithshëm të provincës Guangdong arriti në më shumë se 2 trilionë e 100 miliardë juanë, ndërsa i Fujianit vetëm pak mbi 650 miliardë juanë. Përveç kësaj, investimet e biznesmenëve tajvanezë në Fujian ishin më të pakta në krahasim me provincën Guangdong.

Kryetari i Akademisë së Shkencave Shoqërore të Provincës Fujian, z. Yan Zheng, tha se më parë, Fujiani ka thithur shumë investime të biznesmenëve tajvanezë, duke u mbështetur te marrëdhëniet ndërmjet të afërmve. Por, kjo nuk kënaq kërkesën e zhvillimit të ekonomisë.

"Fujiani është provinca më e afërt me Tajvanin. Për shkak të pengimit të autoriteteve tajvaneze, mallrat nuk mund të transportohen drejtpërdrejt nga bregu lindor i ngushticës së Tajvanit, duke shtuar kështu koston e biznesit. Atëherë, biznesmenët tajvanezë kërkuan një pikë të re për investime, Guangdong, sepse provinca Guangdong ka krijuar një mjedis shumë të mirë për investimet e Hong-Kongut dhe të Makaos në deltën e lumit Zhujiang. Por në fund të viteve '90, biznesmenët dhe disa shoqëri të mëdha të Tajvanit shfaqën interes shumë të madh për Shangain, kryeqendrën ekonomike të Kinës".

Zoti Yan Zheng tha se shpërndarja e industrive dhe ngadalësimi i ndërtimit të infrastrukturës kanë penguar zhvillimin ekonomik të Fujianit. Në përmirësimin e mjedisit të investimeve në krahina të ndryshme të Kinës, këto mungesa janë shumë të dukshme.

Zhvillimi i bregut perëndimor të ngushticës së Tajvanit u pranua në planin e zhvillimit ekonomik e shoqëror të Kinës gjatë 5 vjetëve të ardhshëm, gjë që i solli Fujianit një rast shumë të mirë. Tani, Fujiani po shpejton ndërtimin e porteve në bregun perëndimor të ngushticës së Tajvanit, duke u mbështetur te ekonomia portuale për nxitjen e zhvillimit të shpejtë të ekonomisë së bregut perëndimor të ngushticës së Tajvanit. Fujiani ka një vijë bregdetare prej më shumë se 3300 kilometrash, duke zënë kështu vendin e dytë në Kinë. Ngushtica e Tajvanit është një nga rrugët e arta ndërkombëtare të transportit të mallrave në botë. Tani, po ndërtohen në bregdetin e Fujianit skelat me thellësi të madhe nën ujë. Gjatë 5 vjetëve të ardhshëm, administrata e provincës Fujian do të investojë mbi 29 miliardë juanë në ndërtimin e porteve. Deri në vitin 2010, sasia vjetore e ngarkim-shkarkimit të mallrave në portet e të gjithë provincës do të arrijë në mbi 300 milionë tonë.

Duke folur për të mirën e zhvillimit të industrisë afër porteve, një përgjegjës i sektorit të administrimit të porteve, z. Cai Fuyong, i tha gazetarit:

"Njerëzit e dinë se, për sa i përket ndërmarrjes, përveç kostos së lëndëve të para dhe të tjerave, më e rëndësishmja është kostoja e logjistikës, ndërsa kostoja e transportit ujor është më e ulët. Ndërtimi i industrisë afër porteve mund të pakësojë shpenzimet e transportit të mallrave. Prandaj ne duhet të ndërtojmë një bazë industriale dhe bazë tregtare e të përpunimit".

Përmirësimi i porteve dhe i infrastrukturës ka tërhequr ndërmarrjet e shumta me investime tajvaneze. Tani, shumë industri të teknologjisë së lartë dhe të re janë vendosur në Fujian. Disa biznesmenë tajvanezë filluan ndërtimin e bazës së prodhimit në zonën e shfrytëzimit të teknologjisë së lartë dhe të re. Investimet e përgjithshme do të arrijnë në 500 milionë juanë.

Përveç industrisë së teknologjisë së lartë dhe të re, edhe kushtet klimatike të Fujianit janë shumë të afërta me të Tajvanit, duke tërhequr gjithashtu shumë biznesmenë tajvanezë për investime në bujqësinë vendore. Duke hyrë në zonën e krijimtarisë të fshatarëve tajvanezë që ndodhet në distriktin Zhangpu të pjesës jugore të Fujianit, kudo sheh bimë dhe lule të ndryshme. Biznesmeni tajvanez, z. Xu Ciyan ka krijuar një shoqëri të mbjelljes dhe të shitjes së luleve lanhua. Sipërfaqja e mbjellë është 14 mijë metra katrorë, nga 3 mijë metra katrorë që ishte më parë. Zoti Xu u shpreh se lulja lanhua e tij është shitur shumë mirë në tregun e Evropës. Ai tha gjithashtu:

"Zhvillimi i industrisë bujqësore të Tajvanit ka hyrë në fazën e shkencës dhe të teknologjisë së lartë, ndërsa pjesa kontinentale ka qëndruar në fazën tradicionale. Në qoftë se nuk ngrihet vëllimi i prodhimit, as fitimi nuk do të shtohet. Prandaj importimi i shkencës dhe i teknologjisë së lartë të Tajvanit dhe zhvillimi i përpunimit të produkteve bujqësore do t'u sjellë fshatarëve vendorë fitime të mëdha".

Provinca Fujian, që ndodhet midis deltës së lumit Jance me ekonominë më të zhvilluar në Kinë, dhe deltës së lumit Zhujiang e në bregun perëndimor të ngushticës së Tajvanit, po gjen aktivisht mundësi për rigjallërimin ekonomik.