Kina ka një popullsi prej një miliard e 300 milionë banorësh, mbi 800 milionë e të cilëve jetojnë në fshat. Prandaj zhvillimi i prodhimit bujqësor dhe ngritja e nivelit të jetesës së fshatarëve janë gjithmonë detyrat kryesore të punës së qeverisë kineze. Vitet e fundit, shpejtimi i vazhdueshëm i procesit të informatizimit në Kinë ka ushtruar gradualisht ndikim edhe mbi zhvillimin e fshatit. Siç mësohet, shumë ndërmarrje po shfrytëzojnë teknologjinë e re dhe të produkteve të reja për t'i ndihmuar fshatarët në arritjen e zhvillimit ekonomik.

Në fund të vitit të kaluar, qyteti i Pekinit filloi punën për krijimin e 300 pikave shërbyese të informacionit, që ka për qëllim ngritjen e nivelit të informatizimit të fshatrave të Pekinit dhe për t'u dhënë fshatarëve shërbimin e informacionit në internet. Përurimi i këtyre pikave u solli masave popullore të fshatrave të Pekinit lehtësi në jetë. Fshatarja Liu Guiying, e cila banon në fshatin Shangzhen të qarkut Pinggu të Pekinit, i tha gazetarit se duke hapur kompjuterin, fshatarët mund të gjejnë informacione të ndryshme në ndihmë të prodhimit dhe të biznesit të tyre.

"Për sa i përket prodhimit, një informacion i mirë mund të krijojë një efektivitet relativisht të mirë ekonomik. Fshatarët mund të njohin në kohë gjendjen e shitjes në treg, gjë që mund të sjellë ndikim të madh mbi të ardhurat e tyre".

Fshatarja Liu Guiying i tha gjithashtu gazetarit se fshatarët e fshatit Shanzhen mund të paguajnë shpenzimet telefonike, të energjisë elektrike dhe të tjera në internet. Pika shërbyese e informacionit mund të sigurojë dhënien e njohurive të ndryshme në përdorimin e internetit, duke luajtur rol shumë të madh nxitës për zhvillimin ekonomik vendor. Shoqëria e telekomunikacionit me përgjegjësi të kufizuar "Hengxintong" e Pekinit është një ndërmarrje për krijimin e pikave shërbyese të informacionit në periferi të Pekinit. Tani, kjo shoqëri ka krijuar 36 pika pune në fshatrat e periferisë së Pekinit. Me ndihmën e punonjësve të saj, fshatarët mund të përdorin falas kompjuterin për të kërkuar informacionet përkatëse. Ndihmësi i drejtorit të përgjithshëm të kësaj shoqërie, z. Fu Bin, i tha gazetarit se pika shërbyese e informacionit ka krijuar lehtësi për shitjen e produkteve bujqësore dhe mund të shtojë të ardhurat e fshatarëve.

"Ne mund t'i ndihmojmë fshatarët për blerjen e mallrave në internet dhe mund t'u japim informacion për tregun. Nëpërmjet informacioneve në internet, fshatarët mund të shesin dhe të blejnë drejtpërdrejt produktet bujqësore".

Pekini është një treg shumë i madh. Ndërmarrjet e fshatrave të Pekinit kanë kushte shumë të mira zhvillimi.

Përveç dhënies së informacioneve rreth kërkesës e ofertës së produkteve bujqësore fshatarëve, disa ndërmarrje të shkencës dhe të teknologjisë së lartë e kanë çuar procesin e informatizimit të fshatit në një nivel më të lartë. Shoqëria "Hengxintong" e sipërpërmendur ka bashkëpunuar me fshatrat e Pekinit në turizmin e lidhur me zakonet popullore. Ajo u ka dhënë qytetarëve të Pekinit informacione rreth turizmit të lidhur me zakonet popullore të fshatit për t'i tërhequr ata për të bërë turizëm në fshat dhe për t'u sjellë fshatarëve më shumë të ardhura. Duke folur për këtë, drejtori i degës së biznesit pranë kësaj shoqërie, z. Wang Fenglei, tha:

"U japim qytetarëve pikat në fshatra ku mund të bëjnë turizëm, gjë që mund të shtojë konsumin vendor dhe të ardhurat e fshatarëve".

Siç mësohet, si rezultat i teknologjisë informative, turizmi lidhur me zakonet popullore i Pekinit ka pasur një zhvillim relativisht të shpejtë. Nëpërmjet informacioneve të publikuara në internet, dy pikat turistike të qarkut Pinggu të Pekinit pritën afro 9 mijë turistë gjatë pushimeve të festës së 1 Majit të këtij viti. Të ardhurat nga turizmi arritën në 240 mijë juanë.

Në procesin e informatizimit të fshatit kinez, dhënia e përgatitjes përkatëse fshatarëve është një punë e rëndësishme, e cila ka për qëllim që fshatarët të përvetësojnë teknologjinë e informacionit e të përmirësojnë prodhimin dhe biznesin e tyre. Specialisti i Qendrës studimore të teknologjisë së informatizimit të bujqësisë, z. Yang Baozhu, tha se sot niveli i përgjithshëm i njohurive të fshatarëve kinezë është ende i ulët. Procesi i informatizimit duhet të nxitet nëpërmjet rrugëve të ndryshme.

Zoti Yang Baozhu u shpreh gjithashtu se brenda 5 vjetëve të ardhshëm, Kina do të investojë disa miliardë juanë në fshat për të ndërtuar infrastrukturën dhe për të përgatitur teknikë. Ai njoftoi se në të ardhmen, fshati kinez do të nxitë pandërprerë zhvillimin e prodhimit bujqësor nëpërmjet teknologjisë së informatizimit.