dëgjoni

Agjencia kineze e lajmeve Zhongxin njoftoi se më 27 korrik, ambasada e Kinës në Japoni u shpreh se me rastin e 35-vjetorit të normalizimit të marrëdhënieve kino-japoneze, nga 17 nëntori deri më 17 dhjetor të këtij viti, Kina do të zhvillojë në Japoni Festivalin e Kulturës Kineze. Ky festival do të jetë aktiviteti i shkëmbimeve kulturore me përmasat më të mëdha midis dy vendeve këtë vit.

Siç bëhet e ditur, tema kryesore e këtij festivali është muzika. Gjatë festivalit, do të shfaqen dhe ekspozohen në Japoni muzika e lashtë, opera tradicionale, simfonia, akrobacia, piktura etj. të Kinës.

Do të zhvillohet në Wuhan panairi i sektorit kulturor të Kinës qendrore

Gazeta kineze "Kultura Kineze" njoftoi se më 27 tetor të këtij viti, do të zhvillohet në qytetin Wuhan të provincës Hubei panairi i parë i sektorit kulturor të Kinës qendrore.

Ky panair organizohet bashkërisht nga Ministria e Kulturës e Kinës, Drejtoria e Përgjithshme Shtetërore e Radio-Film-Televizionit, Drejtoria e Përgjithshme e Shtypit dhe 6 provinca të Kinës qendrore si Hunan, Hubei, Anhui etj. Tema kryesore e këtij panairi është "Kina qendrore magjike". Në panair do të paraqiten arritjet e fundit kulturore dhe produktet kulturore të Kinës qendrore.

Njëkohësisht në panair do të zhvillohen një sërë aktivitetesh duke përfshirë ekspozitën e arteve tradicionale folklorike të 6 provincave, festivalin ndërkombëtar të artit akrobatik etj.

Qarqet akademike kineze përkujtuan Qi Gongun

Korrespondenti i Radios së Jashtme të Kinës njoftoi se më 26 korrik, qarqet kulturore e akademike kineze përkujtuan 1-vjetorin e vdekjes së Qi Gongut. Më se 150 specialistë e studiues të qarqeve arsimore, historike, të shtypit etj. morën pjesë në bisedën rreth veprave akademike të Qi Dongut.

Qi Gong ka qenë arsimtar, dijetar dhe piktor i famshëm kinez. Ai lindi në vitin 1912 dhe ishte pasardhës i familjes perandorake të dinastisë Qing të Kinës.

Siç bëhet e ditur, Shtëpia Botuese "Kina", Shtëpia Botuese "Tregtia" dhe Shtëpia Botuese e Universitetit Pedagogjik të Pekinit do të zbatojnë bashkërisht "Planin e botimit të Qi Gongut". Sipas planit, çdo vit këto shtëpi botuese do të botojnë disa vepra akademike me nivel të lartë për të përkujtuar Qi Gongun.

Lojërat kineze në internet zhvillohen shpejt

Gazeta kineze "Shtypi kinez" njoftoi se siç bëhet e ditur nga Forumi i 4-t ndërkombëtar i sektorit të argëtimeve digjitale të Kinës i zhvilluar në Shangai, sektori kinez i lojërave në internet po përballet me raste të mira zhvillimi.

Sipas statistikave, vitin e kaluar, numri i lojtarëve kinezë në internet arriti në 26 milionë, shifër kjo që u shtua 30% në krahasim me vitin 2004. Të ardhurat e shitjes së lojërave në internet arritën në 3.7 miliardë juanë. Lojërat kineze në internet kanë zënë 60% të tregut duke i kaluar për herë të parë lojërat e huaja. (Fani)