dëgjoni

60-vjeçari Chen Xiaodong është një ushtarak e njëkohësisht ai është edhe një shkrimtar i famshëm. Veprat e tij si novela, poezi, tekste këngësh, komente, drama etj. janë përshëndetur gjerësisht.

Tani Chen Xiaodong po krijon skenarin e dramës televizive "Shkencëtari Qian Xuesen". 95-vjeçari Qian Xuesen është një shkencëtar i famshëm i aerodinamikës dhe i raketave që quhet "Ati i fluturimit kozmik" dhe "Ati i raketave" i Kinës. Para më shumë se 20 vjetëve, Chen Xiaodong filloi të mbledhë të dhënat përkatëse lidhur me Qian Xuesenin dhe ka botuar disa biografi të tij. Chen Xiaodong tha:

"Qian Xuesen është një shkencëtar i famshëm në botë dhe ka dhënë kontribut të madh për çështjen e mbrojtjes kombëtare kineze. Gjatë më shumë se 20 vjetëve, kam mbledhur të dhëna të hollësishme lidhur me të. Në bazë të këtyre të dhënave, po krijoj skenarin e dramës televizive. Jam i mendimit se shikuesit kanë interes ta njohin këtë shkencëtar të madh."

Chen Xiaodong u pranua në ushtri pas mbarimit të mësimeve të shkollës së mesme. Qysh nga ajo kohë, ai filloi të shkruajë për të pasqyruar jetën e ushtarakëve. Gjatë shumë vjetëve, ai ka botuar shumë reportazhe që pasqyrojnë zhvillimin e ushtrisë kineze, arritjet tekniko-shkencore në fushën e fluturimeve kozmike etj. Me rezultatet e mëdha në fushën e letrave, Chen Xiaodong ka fituar shumë çmime kombëtare. Ai tha:

"Në fakt para se të bëhesha ushtarak, isha një admirues i artit dhe veçanërisht më pëlqente shumë letërsia. Pas pranimit në ushtri, fillova të shkruaj poezi, pastaj nisa të shkruaj komente, reportazhe dhe novela."

Në vitin 1984, Chen Xiaodong hyri në Universitetin e Artit të Ushtrisë Kineze për të studiuar letërsi. Në universitet ai lexoi shumë libra, ndër të cilët veprat letrare që përshkruajnë Luftën e Dytë Botërore ushtruan ndikim të madh mbi të. Chen Xiaodong studioi posaçërisht letërsinë moderne ushtarake kineze dhe është i mendimit se në kohë paqeje, shkenca e teknologjia e mbrojtjes kombëtare është një temë e rëndësishme në letërsinë ushtarake. Reportazhi "Një njeri që ndjek Ajnshtajnin" është vepra përfaqësuese e tij. Ky reportazh përshkruan një specialist të raketave që bëri sakrifica për çështjen shkencore dhe fitoi vlerësimin e lartë të shkrimtarit të famshëm kinez Liu Baiyu. Ai tha:

"Kohët e fundit kam shkruar shumë reportazhe të shkencëtarëve ushtarakë që kanë dhënë kontribut të madh për zhvillimin e çështjes së mbrojtjes kombëtare të atdheut. 'Një njeri që ndjek Ajnshtajnin' është reportazhi im i parë me këtë temë dhe ka ngjallur jehonë të madhe në fushën e letërsisë ushtarake. Shkrimtari i famshëm Liu Baiyu është i mendimit se unë jam shkrimtari përfaqësues i kësaj fushe."

Njëkohësisht Chen Xiaodong i ka kushtuar vëmendje të madhe çështjes së fluturimit kozmik të Kinës. Vitet e fundit, ai ka shkruar vepra letrare me disa milionë fjalë lidhur me çështjen e fluturimit kozmik. Reportazhi "Ëndrra për fluturim" i shkruar nga ai bëri të njohur shumë ndodhi të fshehta në procesin e zhvillimit të çështjes së fluturimit kozmik të Kinës. Lexuesit janë shprehur se ky reportazh është një histori e zhvillimit të çështjes së fluturimit kozmik të Kinës.

Krahas shkrimit për shkencëtarët ushtarakë, Chen Xiaodong ka shkruar edhe për shumë ushtarë të zakonshëm. Ai tha:

"U kushtoj vëmendje edhe ushtarëve të zakonshëm. Pikërisht ata ushtarë mbrojnë paqen e atdheut. Në të ardhmen do të krijoj më shumë vepra letrare që përshkruajnë jetën e tyre."

Chen Xiaodong u shpreh se shkenca e teknologjia kozmike është një fushë e re ushtarake e shumë njerëz janë të mendimit se kjo është një fushë misterioze. Por në fakt, në këtë fushë punojnë njerëz të zakonshëm, ata po japin kontributin e vet për paqen dhe progresin njerëzor. Si një shkrimtar, kam përgjegjësi të bëj të njohur jetën e vërtetë të tyre. (Fani)