Kina është një vend i madh bujqësor, por zhvillimi ekonomiko-shoqëror i fshatit për një kohë të gjatë ka mbetur prapa atij të qytetit. Për ta ndryshuar këtë gjendje, qeveria kineze ka vendosur që brenda 5 vjetëve të ardhshëm të shpejtojë hapat e ndërtimit të fshatit. Gjatë vizitës pak kohë më parë në provincën Jiangsu të Kinës lindore korrespondenti i Radios së Jashtme të Kinës mësoi se fshatrat e atjeshëm kanë ndërmarrë veprime që nëpërmjet krijimit të zonave të zhvillimit ekonomik, shpejtimit të urbanizimit etj. të nxisin zhvillimin e fshatit.

Stacioni i parë ku u ndalëm ishte distrikti Guanan në veri të kësaj province, shkruan korrespondenti. Ky distrikt është bazë e prodhimit të pambukut cilësor e Kinës dhe distrikt model ekologjik në rang vendi. Funksionari vendor z. Sun Min, i tha korrespondentit se koncepti tradicional i përfilljes së bujqësisë dhe shpërfilljes së tregtisë ishte një faktor i rëndësishëm që frenonte zhvillimin ekonomik. Ai tha:

"Për një kohë të gjatë zhvillimi ekonomik i distriktit Guanan ka mbetur prapa. Në vitin 2002 ky distrikt ishte në vendin e fundit në gjithë provincën përsa u përket shfrytëzimit të investimeve të huaja, të ardhurave mesatare për frymë të fshatarëve dhe rrogave mesatare për frymë të punonjësve."

Njerëzit synojnë ndryshimin. Administrata qeveritare vendore vendosi të krijojë zonën e zhvillimit ekonomik duke shfrytëzuar kushtet e favorshme të lumit Guanhe, që përshkon këtë distrikt, i cili ka ujë të thellë, dhe ka vijë bregdetare mbi 160 kilometra të gjatë dhe shumë skela në ujë të thellë.

Kjo zonë zhvillimi ka tërhequr shumë ndërmarrje dhe fonde, ka ngritur nivelin ekonomik dhe të jetesës së banorëve vendës dhe po ndryshon gradualisht konceptin e banorëve të këtushëm të shpërfilljes së tregtisë. Shumë fshatarë janë mësuar të punojnë në fabrika në kohën kur nuk ka shumë punë bujqësore.

Në një fabrikë të prodhimit të veshjeve, korrespondenti pa nga afër punën intensive të punëtorëve. Veshjet e prodhuara nga kjo fabrikë eksportohen drejtpërdrejt në vende të tjera sipas porosive. Punëtorja Xiao Hongxia i tha korrespondentit se para 3 vjetëve ajo shkoi në Japoni për të punuar, ndërsa tani në këtë fabrikë merret me të njëjtën punë si në Japoni dhe të ardhurat janë më të pakta, por megjithatë asaj i pëlqen kjo punë. Ajo u shpreh:

"Sigurisht jashtë vendit fitoja më shumë, por kishta vështirësi në të folur dhe në komunikim. Tani fabrika jonë administrohet shumë më mirë se dikur dhe në kohën e punës të gjithë punojnë në qetësi pa shëtitur andej-këtej."

Pas ndërtimit disavjeçar, distrikti Guanan është bërë një zonë e zhvillimit ekonomik bregdetar.

Të dashur dëgjues, distrikti Guanan është vetëm një miniaturë e zhvillimit të fshatrave të provincës Jiansu në lindje të Kinës. Kjo provincë është një nga zonat me zhvillimin më të mirë të fshatrave, sepse kushtet e këtushme gjeografike janë të mira, ka lumenj e porte të shumta dhe transporti është shumë i zhvilluar, prandaj forma kryesore e zhvillimit të ekonomisë fshatare është shfrytëzimi i plotë i burimeve natyrore, i krahëve të pasura të punës dhe tërheqja e biznesmenëve dhe investimeve.

Zona industriale e Suzhout e provincës Jiangsu është një objekt i bashkëpunimit ndërkombëtar, i ndërtuar sipas marrëveshjes së nënshkruar nga qeveria kineze dhe ajo e Singaporit. Degët e saj kryesore industriale janë informacioni elektronik, makineritë e imta, farmaceutika biologjike, materialet e reja etj. Zv/shefja e Zyrës së Komitetit Administrativ të zonës industriale të Suzhout, zj. Yao Wenlei, i tha korrespondentit se krahas ndërtimit të zonës industriale, ata orientuan edhe ndërmarrjet e qytezave dhe lokaliteteve përreth të rregullojnë strukturën për të nxitur zhvillimin e fshatrave moderne. Ajo tha:

"Tani 90% e fshatarëve kanë hyrë në shtëpi moderne, fshatarët e moshuar marrin pensione nga qeveria, ndërsa të rinjtë pas përgatitjes profesionale punojnë në ndërmarrje. Çdo vit u japim ndihma familjeve të varfra fshatare dhe kështu janë zgjidhur në përgjithësi vështirësitë e tyre."

Korrespondenti mësoi se Zona Industriale e Suzhout u ka krijuar fshatarëve shumë vende pune, si mirëmbajtja e pemëve dhe livadheve, pastrim, shërbimet familjare etj. dhe i inkurajon ata të krijojnë vetë ndërmarrje."

Meriton të përmendet fakti se Administrata Qeveritare vendore ka marrë masa dëmshpërblimi për marrjen e tokave të punueshme të fshatarëve gjatë ndërtimit të kësaj zone. P.sh. administrata qeveritare e distriktit Guanan çdo vit u jep fshatarëve në para 10% të të ardhurave nga punimi i tokës, siguron jetën themelore të të miturve nën moshën 18 vjeç dhe siguron jetën e banorëve meshkuj mbi 60 vjeçarë dhe atyre femra mbi 55 vjeçare. Në të njëjtën kohë, ajo kualifikon fshatarët që të jenë të aftë të punojnë në ndërmarrje.

Le të shohim se si është zhvilluar fshati Huaxi në jug të provincës Jiangsu. Ky fshat administrohet si një ndërmarrje, produktet e tij kryesore janë stofrat, veshjet, trikotazhet etj. Duke u mbështetur në epërsinë e përqendrimit të industrisë tekstile në deltën e lumit Jance ky fshat ka siguruar treg të gjerë dhe konsumatorë të qëndrueshëm. Përgjegjësi Sun Haiyan e njohu korrespondentin me modelin e zhvillimit të fshatit Huaxi:

"Ne e kemi ndarë fshatin nga ndërmarrja. Në mënyrë unike administrohet ekonomia, përdoren kuadrot, organizohen krahët e punës, shpërndahet mirëqenia dhe planifikohet ndërtimi i fshatit."

Sot është formuar Kompania e përgjithshme e fshatit Huaxi, pranë saj janë 9 kompani të mëdha, mbi 60 ndërmarrje dhe të ardhurat nga shitja e produkteve ka arritur në mbi 30 miliardë juanë.

Të dashur dëgjues, në provincën Jiangsu shumë fshatra dhe toka të punueshme të dikurshme janë shndërruar prej kohësh në zona të zhvillimit ekonomik, edhe fshatarët e atjeshëm kanë filluar një jetë krejt të re. (Pina)