dëgjoni

Ju flet Radio e Jashtme e Kinës. Të dashur dëgjues, unë jam Pina, ju përshëndes përsëri nga Pekini. Në programin e sotëm "Këngët popullore" ju ftoj të dëgjoni këngët popullore të provincës Yunnan të interpretuara nga këngëtarja e njohur kineze Huang Hong.

Në provincën Yunnan në jugperëndim të Kinës ka shumë këngë popullore të pasura dhe të larmishme. Kënga që po dëgjoni titullohet "Gurgullon përroi" dhe këndohet nga këngëtarja e njohur Huang Hong. Kjo është një këngë e famshme dashurie, e quajtur nga Perëndimi "serenadë e Lindjes". Në këngë thuhet: "Doli hëna e ndritur, më merr malli për të dashurin në thellësinë e maleve, ti po ecën në qiell si hënë, gurgullon përroi i kulluar rrëzë malit". Para gjysmë shekulli, Hung Hong u bë e njohur pikërisht duke kënduar këtë këngë. Ajo e këndon në mënyrë elegante, të rrjedhshme dhe me ndjenje të thellë.

Huang Hong është një nga këngëtaret e brezit të vjetër. Ajo ka lindur në vitin 1928 në qytetin Kunming të provincës Yunnan. Që kur ishte e vogël, asaj i pëlqente shumë të dëgjonte operën vendore dhe këngët popullore. Në shkollën e mesme ajo zuri vendin e parë në konkursin vokal të studentëve, dhe në vitin 1949 pas shpalljes së RP të Kinës, ajo u pranua si këngëtare soliste në Ansamblin e Këngëve dhe Valleve të provincës Yunnan.

Kënga që po dëgjoni titullohet "Kur do të çelin lulet huai ?". Kjo këngë përshkruan në mënyrë të gjallë vajzën që po pret me padurim kthimin e të dashurit të zemrës. Në këngë thuhet: "Para portës së shtësisë është një pemë huai?pres të dashurin tim duke kapur një degë të saj. Nëna më pyet ç'po shikoj, po pres të çelin lulet huai."

Huang Hong që jetonte në vendlindjen e saj Yunnan, është ushqyer pandërprerë nga arti popullor dhe si rezultat i përpjekjeve të veta ajo e ngriti me shpejtësi nivelin e saj të këndimit. Në vitin 1953, në festivalin e parë të këngëve dhe valleve popullore të organizuar nga Ministria e Kulturës e Kinës, Huang Hong këndoi me zërin e saj të ëmbël dhe të pastër dhe me stilin e veçantë këngët "10 motra", "Gurgullon përroi" etj. dhe u mirëprit ngrohtësisht nga shikuesit. Më poshtë do të dëgjojmë së bashku këngën e kënduar prej saj me titull "10 motra". Kjo këngë përshkruan çastin e gëzueshëm të punës së vajzave që vjelin çaj.

Për të ngritur nivelin e këndimit, Hung Hong ka mësuar shpesh nga artistët popullorë të provincës Yunan dhe nga këngëtarët e tjerë. Si rezultat, këngët e kënduara prej saj kanë ruajtur karakterin e tyre origjinal, por njëkohësisht ajo u ka shtuar atyre edhe elegancë dhe forcë. Tani le të shijojmë këngën popullore të provincës Yunnan "Le të fillojmë një këngë malësore".

Huang Hong është jo vetëm një këngëtare, por edhe një krijuese e talentuar. Ajo mblodhi, përpunoi dhe krijoi gati 100 këngë, dhe shumë prej tyre janë të përhapura gjerësisht. Tani do të dëgjojmë këngën popullore të dashurisë "Këpucët kanë rënë në lumë". Kënga përshkruan një vajzë, e cila për ta mbajtur afër të dashurin, ka hedhur këpucët e saj në lumë për ta zgjatur kohën.

Më poshtë do të dëgjojmë së bashku këngën popullore "Melodia e lojës në male". Loja në male është një aktivitet tradicional i banorëve të provincës Yunan që zhvillohet në fund të pranverës dhe në fillim të verës, ku njerëzit shkojnë në periferi për të parë garën e kuajve. Gjatë këtij aktiviteti, këngëtarët edhe këndojnë në çast, përmbajtjet e këngëve janë të pasura dhe tekstet e këngëve janë humoristike, në to pasqyrohet shumë mirë mençuria dhe zgjuarsia e këngëtarëve.

Si anëtare e delegacionit artistik të Kinës, Huang Hong ka vizituar Poloninë, Rumaninë, Japoninë, Mianmarin dhe shumë vende të tjera, dhe me këngët e saj të përzemërta ka ngritur një urë miqësie midis popullit kinez dhe popujve të botës.

Huang Hong ka nxjerrë shumë albume me këngë popullore. Në vitin 1989, ajo fitoi çmimin më të lartë të qarqeve kineze të disqeve ? çmimin e parë të diskut të artë.

Në fund të programit ju ftoj të dëgjoni këngën popullore të provincës Yunnan "Gjysmëhëna ndrit përroin". Kënga përshkruan një çift të rinjsh që bëjnë dashuri buzë përoit.

Ju flet Radio e Jashtme e Kinës. Të dashur dëgjues, dëgjuat këngët popullore të provincës Yunnan, të kënduara nga këngëtarja e njohur kineze Huang Hong. Mirudëgjofshim të shtunën tjetër, në mikrofon për ju Pina.