dëgjoni

Penda Dugjang-yean e lumit Mingjang në provincën Siçuan të Kinës Jugperëndimore, që u ndërtua para 2200 vjetëve me nismën dhe nën drejtimin e ekspertit hidraulik kinez Li Bing, ka qenë vepra më e madhe krijuese dhe puna më e suksesshme në ekonominë ujore të Kinës në lashtësi dhe luan rolin e saj edhe sot për mbrojtjen nga vërshimi i ujit dhe për ujitjen e kulturave bujqësore. UNESKO-ja e ka përfshirë atë në listën e "Trashëgimive kulturore botërore".

Lumi Mingjang është një nga 4 degët e lumit Jance, që kalojnë nëpër Pellgun Siçuan. Emri i provincës Siçuan, që do të thotë "provinca e katër lumenjve", ka ardhur pikërisht nga këto 4 degë. Lumi Mingjang, më e madhja ndër të 4 degët e lumit Jance në këto zona, buron nga pjesa veriperëndimore e Pellgut Siçuan dhe, pasi përshkon një sërë luginash të thella midis maleve të larta, hyn në distriktin Guanxian, i cili ndodhet në kuadrin e fushës së madhe Çengdu. Uji i lumit Mingjang rrjedh rrëmbyeshëm në rrjedhën e sipërme dhe ngadalshëm në fushën Çengdu, prandaj një sasi e madhe dheu dhe rëre mbetej këtu, duke bllokuar shtratin e lumit. Asokohe, në verë dhe vjeshtë ndodhnin shumë shpesh përmbytje, kurse, pas stinës së reshjeve të shiut, kaplloste thatësira.

Në fund të shekullit të 4-të para erës së re, shteti Çin, që ishte në varësinë e dinastisë Zhou, vendosi këtu organet e veta administrative të qarqeve dhe distrikteve. Në vitin 250 para erës së re, Li Bing u emërua guvernatori i qarkut Shu dhe u ngarkua me detyrën për të sistemuar lumin Mingjang. Li Bing, që kishte përvetësuar njohuri astronomike dhe gjeografike, iu përvesh punës menjëherë. Ai, së bashku me të birin, bënë kërkime gjeografike duke studiuar në vend relievin e zonave të rrjedhës së lumit Mingjang dhe duke sqaruar shkaqet e fatkeqësive të përmbytjes, dëgjuan mendimet e banorëve vendas që kishin grumbulluar një farë përvojë në mbrojtjen nga vërshimi i ujit, bënë projekte të kujdesshme, mobilizuan banorët vendas dhe ndërtuan Pendën Dugjang-yan në lumin Mingjang, që mbeti një vepër e famshme shekullore.

Penda Dugjang-yan u ndërtua dhjetëra vjet më herët se Muri i Madh i dinastisë Çin. Ky i fundit është ndërtuar me qëllim mbrojtjen nga sulmet e kombeve të veriut dhe ka humbur sot rolin e tij të mëparshëm, kurse Penda Dugjang-yan është ndërtuar për ujitje, për shmangien e përmbytjeve dhe për transportin ujor, si rezultat, fusha Çengdu është bërë "Toka e hambarit" që siguron korrje të bollshme edhe në raste thatësire, edhe në raste të lagështirës së tepruar.

Gjatë mbi 2200 vjetëve, Penda Dugjang-yan ka luajtur gjithmonë rolin e saj pozitiv dhe është bërë një gur themeltar në historinë e hidraulikës në botë. Brezat e mëvonshëm ndërtuan pranë Pendës Dugjang-yan një tempull në kujtim të Li Bingut dhe të birit. Por më vonë, Li Bing dhe i biri u shenjtëruan në zemrat e popullit. Në vitin 1974, në shtratin e lumit jashtë Pendës Dugjang-yan, u zbulua një statujë guri 3 metra e lartë. Nga një ekspertizë sipas hieroglifeve në statujë del se kjo është një statujë e Li Bingut që u gdhend në shekullin e 2-të të erës së re. Figura e Li Bingut në statujë, që mban në kokë një kurorë të lartë, është veshur me një pallto të gjatë, të lidhur në mes me një rrip me gur nefriti dhe me të dy duart të vëna në gjoks, duket me temperamentin e një personi të moshuar, të qetë dhe të matur. Të gjitha këto pasqyrojnë plotësisht respektin e atëhershëm të popullit për Li Bing. (Zheng)