dëgjoni

Të dashur lexues, jam Drita-Daming, ju përshëndes në programin tonë muzikor. Sot do t'ju njoh me këngët ruse të interpretuara nga këngëtari veteran kinez Zhu Chongmao. Në radhë të parë ju ftoj të shijoni këngën ruse me titull: "Mbrëmje në periferinë e Moskës".

Kjo është një këngë e ish-Bashkimit Sovjetik, e përhapur gjerësisht në vitet '50 të shekullit të kaluar në Kinë. Melodia e saj e bukur dhe teksti i saj lirik përshkruajnë me hollësi dëshirat e njerëzve të atëhershëm për dashurinë. Dhe interpretimi i kësaj kënge nga Zhu Chongmao karakterizohet nga ndjenjat e thella e të holla, prandaj ka forcë të madhe tërheqëse.

Zhu Chongmao ka lindur në vitin 1922 në provincën Gjiansu të Kinës Lindore. Ai ka studiuar në Shkollën e Operës në Chongqing të Kinës jugperëndimore dhe më vonë studioi operën perëndimore me mësuesin e vokalit të ish-Bashkimit Sovjetik Suhamlinsky. Për shumë vjet ai punoi si artist solo në Teatrin e Operës të Shangait, në Ansamblin e Radios të Kinës etj., si edhe si dirigjent i korit dhe instruktor artistik etj. Zhu Chongmao ka përvojë të pasur të interpretimit me ndjenjë të hollë lirike dhe me shqiptim shumë të qartë. Tani ju ftoj të shijoni këngën e ish-Bashkimit Sovjetik, të interpretuar prej tij, "Vendlindja".

Në këngë thuhet kështu: "Shikoni atë arë të gjelbër dhe atë fushë të gjerë, plot pamje të bukur. Oh, natyra e madhe e Rusisë, është vendlindja ime. Dëgjoni zërin e bukur të laureshës, bilbili po këndon në pyll, ky vis i dashur rus është vendlindja ime."

Gjatë praktikës shumëvjeçare artistike, Zhu Chongmao ka studiuar jo vetëm mjeshtërinë e interpretimit perëndimor, por ka përvetësuar edhe mjeshtërinë e interpretimit të operës dhe të rapsodëve folklorikë kinezë, duke e shkrirë në stilin e tij të interpretimit. Kështu është formuar shkallë-shkallë stili i tij artistik, që është bërë më tërheqës për dëgjuesit. Tani ju ftoj të shijoni "Këngën e mysafirit indian", të kënduar nga Zhu Chongmao. Kjo këngë është zgjedhur nga Opera e kompozitorit rus Nikolai Andreiviç Rimsky-Korsakov "Satko".

Në fund të këtij programi muzikor ju ftoj të dëgjoni këngën ruse: "Këngë djepi", të kënduar nga Zhu Chongmao. Kjo këngë me melodi të rrjedhshme e të qetë ka stil të theksuar rus.

Në këngë thuhet: "Fli, bebi im i dashur, tund e tund, fli shpejt. Hëna e ndritur të ledhaton qetë. Le të rrëfej një tregim dhe le të këndoj një këngë të bukur, mbylli sytë, gjumë të ëmbël".

Zhu Chongmao këndon në mënyrë të ëmbël dhe lirike me ndjenjë prekëse.

Të dashur lexues, shijuat një tufë këngësh ruse të interpretuara prej këngëtarit veteran kinez Zhu Chongmao. Mirudëgjofshim herën tjetër! ( Drita-Daming )