dëgjoni

Gazeta kineze "Xinbao" njoftoi se nga 1 deri më 25 shtator, do të zhvillohet në Pekin Stina e dytë ndërkombëtare e dramave e Teatrit Shtetëror të Dramës të Kinës.

Tema kryesore e kësaj stine është "Ibseni i përjetshëm". Artistët nga Kina, Norvegjia dhe SHBA-ja do të shfaqin 6 drama për të përkujtuar 100-vjetorin e vdekjes së dramaturgut norvegjez Ibsen.

Teatri Shtetëror i Dramës i Kinës u krijua në vitin 2001. Në vitin 2004, ky teatër filloi të zhvillojë stinën ndërkombëtare të dramave në çdo dy vjet. Tema kryesore e stinës së kaluar ishte "Çehovi i përjetshëm".

U zhvillua në Xiamen të Kinës Konkursi i 4-t botëror i koreve

Gazeta kineze "Xiamenwanbao" njoftoi se më 19 korrik, u zhvillua në qytetin Xiamen ceremonia e dhënies së çmimeve të etapës së parë të Konkursit të 4-t botëror të koreve. Kori "Zërat pa kufi" i Austrisë dhe kori "Shkolla episkopale e djemve" i Hongkongut etj. fituan çmimet e para.

Në Konkursin e 4-t botëror të koreve morën pjesë më se 400 kore të ardhur nga 80 vende e rajone. Konkursi ndahet në dy etapa.

Konkursi botëror i koreve zhvillohet një herë në çdo dy vjet dhe organizohet nga Fondacioni Ndërkombëtar i Shkëmbimeve Kulturore me seli qendrore në Gjermani. Ky është konkursi ndërkombëtar i koreve me përmasat më të mëdha në botë.

U hap në Pekin ekspozita e veprave artistike të Bashkimit Sovjetik

Gazeta kineze "Rinia e Pekinit" njoftoi se më 20 korrik, u hap në Muzeumin e Kryeqytetit në Pekin ekspozita e veprave artistike të Bashkimit Sovjetik në vitet '30 deri '50 të shekullit të kaluar.

Në këtë ekspozitë janë vendosur 254 piktura, skulptura etj. të mbledhura nga Muzeumi Shtetëror Historik i Rusisë etj. Këto vepra artistike kanë ushtruar ndikim të madh mbi krijimet artistike të Kinës në vitet '50 e '60 të shekullit të kaluar.

Kjo ekspozitë do të zgjasë dy muaj dhe është pjesë e rëndësishme e "Vitit të Rusisë" në Kinë.

Do të zhvillohet Festivali i 28-të muzikor i Harbinit

Korrespondentja e Radios së Jashtme të Kinës njoftoi se nga 6 deri më 15 gusht, do të zhvillohet në qytetin Harbin të Kinës veriore Festivali i 28-të muzikor i Harbinit. Për shkak të zhvillimit të "Vitit të Rusisë" në Kinë këtë vit, komisioni organizator ftoi posaçërisht shumë artistë rusë të japin shfaqje në festival.

Festivali muzikor i Harbinit filloi në vitin 1961. Qysh nga viti 1996, ky festival organizohet bashkërisht nga Ministria e Kulturës e Kinës dhe bashkia e qytetit Harbin. (Fani)