dëgjoni

Zheng Enbo është specialist i gjuhës dhe i letërsisë shqiptare, ai është edhe anëtar i Shoqatës së Shkrimtarëve të Kinës dhe anëtar i Shoqatës së Përkthyesve të Kinës. Gjatë mbi 40 vjetëve, Zheng Enbo ka përkthyer në gjuhën kineze shumë novela dhe poezi të famshme shqiptare si "Gjenerali i ushtrisë së vdekur", "Antologjia e poezive të Agollit", "Bagëti e bujqësi" etj. Njëkohësisht ai ka botuar "Historinë e letërsisë shqiptare", "Historinë e letërsisë shqiptare në shekullin e 20-të", "Historinë moderne të letërsisë shqiptare", "Historinë e letërsisë së Evropës Lindore" etj.

Në shenjë mirënjohjeje për rezultatet e mëdha të Zheng Enbo-së në fushën e përhapjes së letërsisë shqiptare, Lidhja e Shkrimtarëve dhe e Artistëve e Shqipërisë shpalli pranimin e Zheng Enbo-së si anëtar nderi të saj. Zheng Enbo është i pari anëtar nderi i huaj në këtë shoqatë. Para kësaj, edhe Lidhja e Shkrimtarëve dhe Artistëve e Elbasanit e pranoi Zheng Enbo-në si anëtar nderi të saj.

Ditët e fundit, Zheng Enbo dha një intervistë për korrespondentin e radios sonë ku kujtoi dy balerinë shqiptarë që shfaqën baletin kinez "Regjimenti i ushtareve" së bashku me balerinë kinezë para 40 vjetëve.

Në vitet '60 të shekullit të kaluar, marrëdhëniet kino-shqiptare ndodheshin në një periudhë të artë, shkëmbimet në të gjitha fushat ishin të shpeshta. Në vitin 1966, nën drejtimin dhe me ndihmën e regjisores së famshme kineze të baletit Jiang Zuhui dhe të balerinit kinez Zhang Ce, Trupa Shtetërore e Baletit e Shqipërisë shfaqi baletin kinez "Regjimenti i ushtareve" në skenën e Tiranës. Dy balerinë të famshëm shqiptarë Zoica Haxho dhe Agron Aliaj interpretuan përkatësisht rolet kryesore Qiong Hua dhe Lao Si. Shfaqja pati sukses të madh. Në vjeshtën e vitit 1967, Trupa Artistike Amatore e Tiranës erdhi në Kinë për një shfaqje 3-mujore. Zoica Haxho dhe Agron Aliaj ishin aktorët kryesorë të trupës, ndërsa Zheng Enbo ishte përkthyesi i mysafirëve shqiptarë. Zheng Enbo kujtoi:

"Trupa artistike e Tiranës përbëhej nga 100 veta, Zoica Haxho dhe Agron Aliaj ishin aktorët kryesorë. Ata jo vetëm morën pjesë në shfaqjet e trupës, por edhe bënë prova së bashku me aktorë të Trupës së Baletit të Kinës për baletin 'Regjimenti i ushtareve'. Gjatë bërjes së provave, dy balerinët shqiptarë lidhën miqësi të thellë me artistët kinezë."

Për të interpretuar mirë dy rolet kineze në baletin "Regjimenti i ushtareve", dy balerinët shqiptarë bënë përpjekje të palodhshme duke kapërcyer vështirësi të panumërta gjatë provave. Ata të dy bënë prova pa pushim dhe pa marrë parasysh lodhjen dhe sëmundjet. Një herë, Agron Aliaj bëri mbi 10 orë prova për një lëvizje me qëllim që të vallëzonte mirë si një aktor kinez.

Në festën kombëtare të vitit 1967, artistët shqiptarë dhe artistët kinezë shfaqën së bashku në teatrin "Tianqiao" të Pekinit baletin "Regjimenti i ushtareve" duke ngjallur jehonë të madhe. Shikuesit kinezë shprehën përshëndetje të madhe për interpretimin e suksesshëm të dy balerinëve shqiptarë. Specialistët ishin të mendimit se dy balerinët shqiptarë kishin talent më të madh se aktorët kinezë. Televizioni e transmetoi këtë shfaqje të dhënë së bashku nga artistë të të dy vendeve. Më 7 tetor, ish-kryetari i shtetit i Kinës Mao Cedun zhvilloi një takim të posaçëm me dy balerinët shqiptarë. Me ftesën e gazetës kineze "Renminribao", Zoica Haxho dhe Agron Aliaj shkruan posaçërisht një artikull që u botua në shumë gazeta kineze. Kjo shfaqje me bashkëpunimin e artistëve kinezë e shqiptarë ishte një ngjarje e rëndësishme në historinë e shkëmbimeve kulturore kino-shqiptare. Zheng Enbo tha?

"Kjo ishte hera e parë që artistë kinezë dhe të huaj shfaqnin së bashku një balet kinez. Kjo shfaqje ka rëndësi të madhe historike."

Zheng Enbo lidhi miqësi të ngushtë me dy balerinët shqiptarë. Ata i kanë ruajtur gjithmonë lidhjet me njëri-tjetrin. Vitin e kaluar, Zheng Enbo punoi për 10 muaj në Shqipëri. Ai bëri një vizitë të posaçme te Agron Aliaj. Ai tha:

"Agron Aliaj ka mbushur 70vjeç dhe nuk ka dalë në pension. Ai është regjisor i Trupës Shtetërore të Baletit të Shqipërisë dhe vazhdon të merret me artin e baletit. Zoica Haxho jeton në SHBA. Shpresoj nga zemra që dy miqtë e mi të vjetër të jetojnë në lumturi." (Fani)