dëgjoni

Në fillim të korrikut, në turneun "Uimbledon Open" tenistet kineze Zheng Jie/ Yan Zi u shpallën kampione si çift, ndërsa kinezja Li Na u përfshi në 4 tenistet më të mira si individ të këtij turneu. Pas vetëm gjysmë muaji, tenisi kinez pati një tjetër përparim historik: më 16 korrik, në garën shtesë të grupit botëror të Kupës së Federatës Ndërkombëtare të Tenisit për vitin 2006, ekipi kinez mundi ekipin e fortë gjerman me rezultatin 4:1, duke u përfshirë për herë të parë në 8 ekipet më të mira të grupit botëror të Kupës së Federatës. Në programin e sotëm, do të dëgjoni reportazhin me titull: Tenisi kinez i femrave ka pasur suksese të vazhdueshme.

Më 15 dhe 16 korrik u zhvillua në Pekin gara shtesë e grupit botëror të Kupës së Federatës Ndërkombëtare të Tenisit për vitin 2006. Dy palët kundërshtare ishin ekipi kinez, që nuk bënte pjesë në 8 ekipet më të mira të grupit botëror, si dhe ekipi gjerman, ekip i vjetër i fortë në arenën ndërkombëtare të tenisit dhe nga i cili doli ylli i shquar botëror Stefi Graf. Këto dy ekipe ishin takuar edhe dy herë të tjera në garat ndërkombëtare dhe ekipi gjerman kishte fituar në të dyja rastet. Por rezultati i fundit nuk vendoset nga historia. Paraqitja e ekipit kinez në këtë garë e habiti shumë ekipin gjerman.

Në dy ndeshjet e para të zhvilluara më 15 korrik, Li Na dhe Zheng Jie fituan përkatësisht ndaj kundërshtareve gjermane me të njëjtin rezultat 2:0. Në ndeshjet e ditës së dytë, tenistja nr.1 e Kinës Li Na u fut në ndeshje përsëri dhe fitoi me tenisten gjermane Kathrin Uoerle me rezultatin 2:0. Kështu ekipi kinez i fitoi të gjitha ndeshjet e para, d.m.th. ekipi kinez në fakt e fitoi këtë garë me 5 ndeshje gjithsej. Në ndeshjen e mëvonshme, gjermania Tatiana Malek fitoi ndaj kinezes Sun Tiantian 2:1, ndërsa në ndeshjen e fundit, çifti i ri kampion i turneut "Uimbledon Open", Zheng Jie/ Yan Zi, nuk u lanë kundërshtareve asnjë rast dhe i mundën me rezultatin 2:0. Rezultati përfundimtar ishte 4:1. Gjatë një interviste pas ndeshjeve, trajneri kryesor i ekipit kinez, Jiang Hongwei i vlerësoi anëtaret e ekipit të tij:

"Jam shumë i kënaqur nga loja e tyre, veçanërisht për shpirtin e tyre, që mundën të marrin pjesë në emër të vendit në këtë garë ekipore në gjendje jo të mirë fizike. Kësaj here, paraqitja e spikati. Duhet të përmend në veçanti Li Na, që ka një sëmundje syri dhe duhet të vizitohet te mjeku, por për të marrë pjesë në këtë garë, ajo e shtyu mjekimin e syrit. Fryma e saj e shërbimit ndaj atdheut meriton të vlerësohet. Anëtarja tjetër e ekipit Zheng Jie mori pjesë në garë me dëmtime në trup. Mjeku e këshilloi të pushonte dhe të mos merrte pjesë, por për këtë garë ekipore ajo hoqi dorë nga pushimi."

Kupa e Federatës Ndërkombëtare të Tenisit, që zhvillohet një herë në vit, konsiderohet si gara ekipore për femra e nivelit më të lartë në botë. Në bazë të niveleve kjo garë ndahet në 3 grupe, grupin botëror, grupin e dytë botëror dhe grupin rajonal. Përfshirja në grupin botëror, të përbërë nga 8 ekipe, është bërë një tregues kryesor për ekipet e forta të shkallës botërore. Në të kaluarën ekipi kinez nuk bënte pjesë në grupin botëror. Opinioni publik është i mendimit se përfshirja e ekipit kinez në grupin botëror është tjetër përparim i dukshëm i tenisit kinez të femrave dhe tregon se niveli i përgjithshëm i tenisit të femrave të Kinës ndodhet mbi nivelin mesatar botëror.

Me ngritjen e nivelit të tenisit të Kinës, edhe në publikun kinez është ngritur interesim për këtë sport. Gjithnjë e më shumë kinezë fillojnë të merren me këtë sport dhe ta parapëlqejnë. Edhe niveli i shikimit të ndeshjeve të tenisit është ngritur pandërprerë. Tenistja Li Na, që mori vetë dy pikë në ndeshjet me ekipin gjerman, tha se ky përparim i tenisit kinez të femrave në Kupën e Federatës nuk mund të ndahet nga inkurajimi i shikuesve në stadium. Ajo tha:

"Më vjen mirë kur ndeshja luhet në fushën tonë në krahasim me atë në fushë të huaj. Në prill të këtij viti kur mora pjesë në ndeshjet e grupit të dytë botëror në Indonezi, ndjeva se i gjithë stadiumi ishte i mbushur me përkrahës të kundërshtarit, ndërsa duartrokitjet për ne ishin shumë të dobëta. Por kësaj here, në ndeshjet në fushën tonë, ndjeva shumë përkrahës prapa meje."

Edhe trajneri kryesor i ekipit kinez, Jiang Hongwei, tha se me përhapjen disa-vjeçare, shikuesit kinezë kanë më shumë njohuri për tenisin dhe është ngritur edhe edukata gjatë shikimit të ndeshjeve. Ai tha:

"Kjo garë kishte atmosferën më të mirë ndër ndeshjet e tenisit të organizuara nga Kina dhe ishte më e suksesshmja. Shikuesit kinez i kanë mësuar rregullat e ndjekjes së ndeshjes dhe sjellja e tyre nuk ishte më e keqe se ajo e shikuesve në 4 turnetë e hapura kryesore. P.sh. pas ndeshjes së 4-t, fitorja e ekipit kinez ishte e sigurt, por shikuesit qëndruan në stadium për të parë ndeshjen e 5-të të çiftit, gjë që ishte inkurajimi dhe përkrahje e madhe për ne."

Më 17 korrik, sipas listës së fundit të renditjes botërore të tenisteve të publikuar nga WTA-së (Shoqata e Tenisit të Femrave), tenistja kineze Li Na u klasifikua në vendin e 15-të në botë si individ dhe Zheng Jie në vendin e 29-të. Në gusht do të hapet turneu "Amerika Open", turneu i fundit i këtij viti i garave të "Titullit të Madh". Tifozët kinezë po presin që tenistet kineze do të arrijnë rezultate më të mira. (Wang Lei)