dëgjoni

Kombësia tibetiane, që është një nga 56 kombësitë e Kinës, ka një popullsi mbi 4 milionë banorë dhe është e përqendruar kryesisht në rrafshnaltën Çinhaj-Tibet të Kinës jugperëndimore. Kjo kombësi është një kombësi shumë punëtore dhe është e aftë në të kënduar dhe në të vallëzuar. Ajo ka trashëgimi të pasura kulturore, si në letërsi, poezi, muzikë, koreografi, skulpturë, pikturë, arkitekturë etj. Sidomos këngët e saj popullore janë shumë të bukura. Në programin e sotëm ju ftoj të shijoni disa melodi të përpunuara mbështetur në këngët popullore tibetiane, që ju t'i afroheni popullit tibetian nëpërmjet muzikës.

Melodia që po dëgjoni është një melodi e interpretuar me instrumentin popullor kinez Erhu, e përpunuar në bazë të këngës popullore tibetiane "Në Pekin ka një diell të artë". Besoj se kjo melodi e bukur ju ka sjellë në rrafshnaltën me dëborë, në gjirin e banorëve mikpritës tibetianë. Kënga "Në Pekin ka një diell të artë" është e përhapur shumë në Kinë. Kompozitori e përpunoi atë duke e shndërruar në këtë melodi të gëzueshme, duke shprehur gëzimin e banorëve tibetianë që janë bërë zotë të vendit pas shpalljes së Republikës Popullore të Kinës në vitin 1949.

Më poshtë ju ftoj të dëgjoni melodinë "Emalinji", e përpunuar duke u mbështetur në këngën popullore tibetiane dhe melodinë e valles Duixie. "Duixie" është një formë e valles popullore në Tibet. Mbrëmjeve të pranverës, burra e gra, pleq e fëmijë të kombësisë tibetiane kërcejnë në një rreth të madh duke kënduar. Kërcimi i tyre është entuziast dhe këngët e tyre janë krenare. Në melodinë "Emalinji" përshkruhet pikërisht pamja e kërcimit të hareshëm të banorëve tibetianë. Në gjuhën tibetiane "Emalinji" do të thotë "Hej, dëgjoni!" Le ta dëgjojmë këtë melodi së bashku.  

Kombësia tibetiane ka shumë festa të vetat, si Viti i Ri sipas kalendarit tibetian, festa Vanguo, festa Xueduen etj. Pas festës së Vitit të Ri, festa që kremtohet më shumë në Tibet është festa Vanguo. Në gjuhën tibetiane "vanguo" do të thotë "rrotullime në ara", me anë të të cilave banorët tibetianë urojnë korrje të bollshme të kulturave bujqësore. Le të dëgjojmë tani këngën "Festa Vanguo".

Vallja Xuezi është një valle e cila kërcehet shpesh nga banorët tibetianë. Në fund të këtij programi muzikor, të dashur dëgjues, ju ftoj të shijoni melodinë orkestrale, të përpunuar mbështetur në këngën popullore tibetiane "Vallja Xuezi".

Të dashur lexues, shijuat një tufë melodish e këngësh të kombësisë tibetiane. ( Drita-Daming )