Dëgjoni

Korrespondentët e Radios së Jashtme të Kinës njoftuan se më 13 korrik në mbrëmje, u zhvillua në Pallatin e Asamblesë Kombëtare Popullore të Kinës në Pekin ceremonia e hapjes së Festivalit të 8-të Ndërkombëtar të Korit të Kinës.

Festivali Ndërkombëtar i Korit i Kinës u krijua në vitin 1992 dhe zhvillohet një herë në çdo dy vjet. Në festivalin e këtij viti marrin pjesë afro 200 grupe të korit duke përfshirë 10 grupe të huaja të ardhura nga Danimarka, Rusia, Filipinet etj. Ato do të marrin pjesë edhe në konkursin e korit.

Ky festival është një nga aktivitetet e Festivalit të 4-të të Kulturës Olimpike të Pekinit.

U zhvillua në Pekin forumi i krijimit të muzikës olimpike

Korrespondentët e Radios së Jashtme të Kinës njoftuan se më 14 korrik, u zhvillua në Pekin forumi i krijimit të muzikës olimpike të Pekinit.

Në këtë forum morën pjesë më se 120 personalitete të qarqeve muzikore kineze dhe të huaja duke përfshirë muzikantin që krijoi motivin bazë të Lojërave Olimpike të Seulit Geroge Moroder, muzikantë të famshëm kinezë dhe funksionarë të lartë të shoqërive të mëdha muzikore. Pjesëmarrësit diskutuan thellësisht për muzikën olimpike, bashkëpunimin ndërkombëtar për krijimin e muzikës së Lojërave Olimpike të Pekinit etj.

Ky forum është një nga aktivitetet e Festivalit të Kulturës Olimpike të Pekinit.

U hap në Pekin libraria më e madhe në gjuhën kineze në botë

Gazeta kineze "Xinjingbao" njoftoi se më 15 korrik, u hap në Pekin libraria "Poli i Tretë" me një sipërfaqe prej 20 mijë metrash katrorë. Kjo është libraria më e madhe në gjuhën kineze në botë.

Në librarinë "Poli i Tretë" ka 300 mijë lloje libra që ndahen në 4 temat e modës, të kulturës, të teknikë-shkencës dhe të jetës.

Në Mongolinë e Brendshme do të ndërtohet muzeumi i parë i kulturës së kombësisë Xiongnu në Kinë

Agjencia kineze e lajmeve Hsinhua njoftoi se tani po ndërtohet në qytetin Huhehot të Mongolisë së Brendshme të Kinës muzeumi i parë i kulturës së kombësisë Xiongnu në Kinë. Investimet e ndërtimit të muzeumit do të arrijnë në 15 milionë juanë. Parashikohet se muzeumi do të përurohet më 1 maj të vitit 2007.

Në këtë muzeum do të shfaqen lulëzimi e zhvillimi i kombësisë Xiongnu, institucionet e pushtetit të kombësisë Xiongnu, shoqëria, ekonomia e zakonet e kombësisë Xiongnu, shkëmbimet midis Xiongnut dhe kombësive të tjera.

Xiongnu ishte një kombësi e lashtë kineze që krijoi më herët pushtetin e vet në veri të Kinës. Kombësia Xiongnu u lulëzua në shekullin e 3-të para erës sonë dhe u rrëzua në shekullin e parë. (Fani)