Dëgjoni

Poezia e lashtë kineze është një xhevahir në kulturën tradicionale kineze. Vitet e fundit, disa muzikantë kinezë kanë dubluar shumë poezi të lashta kineze me muzikë me qëllim që këngëtarët mund të këndojnë këto poezi. Wang Sufen është këngëtarja e famshme kineze që këndon poezi të lashta kineze.

62-vjeçarja Wang Sufen është profesoresha e Universitetit të Muzikës të Kinës. Asaj i pëlqente shumë këndimi qysh në moshë të re, ideali i saj është që të bëhet një këngëtare e shquar. Wang Sufen tha:

"Më pëlqente këndimi qysh në moshë të re. Nëna ime këndon shumë bukur, jam e mendimit se kam trashëguar genin e nënës në fushën e këndimit. Pas hyrjes në shkollën fillore, mësuesja më stërviste shpesh për këndim."

Në vitin 1961, Wang Sufen u pranua nga shkolla e mesme pranë Universitetit të Muzikës të Kinës për të studiuar specialitetin e muzikës vokale. Nëpërmjet studimeve të zellshme, në vitin 1964, Wang Sufen u pranua me rezultate të mira nga Universiteti i Muzikës i Kinës për të studiuar bel kanto. Pas mbarimit të studimeve, ajo u bë pedagoge e këtij universiteti.

Në fillim të viteve '80 të shekullit të kaluar, Universiteti i Muzikës e dërgoi Wang Sufen të shkojë në provincën Fujian të Kinës jugore për të mësuar "zërin e jugut". "Zëri i jugut" është një lloj muzike e lashtë kineze që përhapet kryesisht në qytetin Quanzhou të provincës Fujian. Teksti dhe melodia e "zërit të jugut" janë shumë të bukur dhe kanë magji të veçantë. "Zëri i jugut" këndohet me dialekt dhe në mënyrën e veçantë të vokalizimit. Kjo ishte një sfidë e madhe për Wang Sufen. Wang Sufen kujtoi:

"Në janar të vitit 1983, Universiteti i Muzikës më dërgoi në qytetin Quanzhou për të mësuar 'zërin e jugut'. Ansambli i 'zërit të jugut' i Quanzhout dërgoi posaçërisht një mësues për mësimdhënie. Mësuesi më mësoi të këndoj 'hënën'. Kjo është një këngë e gjatë, në fillim unë nuk e kuptoja fare tekstin e këngës."

Procesi i mësimit ishte shumë i vështirë, por Wang Sufen nuk hoqi dorë nga përpjekjet. Ajo kapërcei vështirësi të panumërta dhe zotëroi më në fund "zërin e jugut" brenda një muaji. Në vitin 1984, në Quanzhou u zhvillua koncerti i "zërit të jugut" që tërhoqi përfaqësues të ardhur nga Malajzia, Singapuri, Hongkongu, Tajvani etj. Në këtë koncert, Wang Sufen këndoi "hënën" duke ngjallur jehonë të madhe. Suksesi i madh e ndihmoi Wang Sufenin të kuptojë vlerën e çmuar të kulturës tradicionale kombëtare kineze, ajo vendosi të bëjë përpjekje për të përhapur muzikën kombëtare kineze.

Pas kthimit në Pekin, Wang Sufen filloi të merret me këndimin e këngëve të poezive të lashta kineze. Për të kënduar më mirë këto këngë, Wang Sufen ka studiuar posaçërisht poezi të lashta kineze, njëkohësisht ka mësuar disa arte popullore të këndimit. Wang Sufen lidhi mënyrën e vokalizimit të bel kantos me mënyrën e këndimit të këngëve kombëtare kineze dhe krijoi mënyrën e vet të këndimit të këngëve të poezive të lashta kineze duke fituar përshëndetjen e specialistëve dhe dëgjuesve.

Gjatë 20 vjetëve të fundit, Wang Sufen ka kënduar afro 200 këngë të poezive të lashta kineze dhe ka zhvilluar me sukses 3 koncerte. Njëkohësisht ajo ka përgatitur shumë studentë të shquar. Wang Sufen është e mendimit se poezia e lashtë kineze është trashëgimia e çmuar kulturore e Kinës. Në kohën moderne ku përhapet kudo rokenrolli, këndimi i këngëve të poezive të lashta kineze ka rëndësi të madhe. Ajo tha:

"Kam dhënë mësimin e këndimit të këngëve të poezive të lashta kineze për 7 vjet me radhë. Poezia e lashtë kineze ka përmbajtje të pasura kulturore. Si një muzikante, kam përgjegjësi të përhap kulturën tradicionale kombëtare nëpërmjet muzikës." (Fani)