dëgjoni

Në këtë program do t'ju paraqes një grup këngësh popullore kineze të kënduara nga këngëtarja tajvaneze e Kinës Cai Qin. Së pari ju ftoj të dëgjoni këngën: "Në atë vend të largët".

Kënga që po dëgjoni titullohet : "Në atë vend të largët". Kjo këngë e përpunuar nga kompozitori i njohur kinez Wang Luobin në bazë të këngëve popullore të Kinës veri-perëndimore ka ritme të lehta e të thjeshta. Zëri i pastër dhe kumbues dhe interpretimi me ndjenja të thella i këngtares Cai Qin i ka shtuar kësaj kënge një bukuri elegante.

Në këngë thuhet: "Në atë vend të largët, është një vajzë e mirë, kur kalojnë pranë çadrës së saj, të gjithë njerëzit e kthejnë kokën për ta parë. Fytyra e saj trëndafil e buzëqeshur ndrit si dielli i kuq, sytë e saj të shkruar dhe të shkathët janë si hënë e ndritur e natës."

Në qarqet e këngëve në gjuhën kineze, këngëtarja tajvaneze Cai Qin është një pemë përherë e gjelbër. Qysh në fund të viteve '70 të shekullit të kaluar, ajo u bë e njohur me interpretimin e këngës "Është pikërisht si butësia jote". Që nga ajo kohë zëri i saj i pastër, kumbues dhe i shtruar dhe stili i saj elegant dhe i fisëm i këndimit mirëpritet ngrohtësisht nga spektatorët e moshave të ndryshme. Gjatë 20 vjetëve të karrierës së saj artistike Cai Qin nxori në qarkullim mbi 40 albume këngësh dhe fitoi shumë çmime në konkurse të ndryshme muzikore.

Në vitin 2004, Cai Qin nxori albumin e saj të 42-të me titull: "Nën rrezet e argjendta të hënës". Ajo punoi vetë si inspektore e përgjithshme dhe zgjodhi 13 nga 200 këngë popullore kineze si këngë të albumit të saj. Këngët popullore kineze të ripërpunuara, si "Në atë vend të largët", "Jasemini", "Nën rrezet e argjendta të hënës", "Kënga e dashurisë Kangding" etj. janë paraqitur me një pamje krejt të re, duke u dhënë spektatorëve një kënaqësi të veçantë. Më poshtë do të dëgjojmë së bashku këngën kryesore të këtij albumi me titull " Nën rrezet e argjendta të hënës"

Kjo është një këngë popullore që është e përhapur gjerësisht në gjirin e banorëve të kombësisë Tatar në Rajonin Autonom të Singjiang-ujgurit në veri-perëndim të Kinës. Kjo këngë me melodinë e rrjedhshme dhe lirike shpreh kujtimet e njerëzve për dashurinë e dikurshme.

Në këngë thuhet: "Në rënishte të argjendtë, janë shpërndarë rrezet e argjendta të hënës. Po kërkoj gjurmët e së kaluarës, por këto gjurmë janë të paqarta. Gjurmët e paqarta janë si në ëndërr. Ku je fshehur, moj vajzë e larguar prej kohësh ? "

Në fund të programit, do të shijojmë së bashku këngën popullore të Rajonit Autonom Guanxi-Zhuan me titull: " Shkoj perin në gjilpërë".

Kënga që po dëgjoni titullohet "Shkoj perin në gjilpërë". Pas ripërpunimit kjo këngë është më e lehtë dhe më e bukur, sidomos interpretimi i Cai Qinit i ka shtuar këngës shije të këndshme dhe të jetës..

Në këngë thuhet: "Shkoj perin në gjilpërë, djali nuk e kupton mendimin e vajzës. Zogu e di se peshku jeton në ujë, ndërsa peshku nuk e di se zogu jeton në pyll. Po s'e pe peshkun, mos i hidh faj ujit, po s'e pe zogun, mos i hedh faj pyllit. 9 nga 10 djem janë të pakujdesshëm." (Pina)