Dëgjoni

Uji është pjesa më e rëndësishme përbërëse e trupit të njeriut dhe humbja e 15% të ujit të trupit rrezikon jetën e njeriut. Prandaj pirja e ujit ditë për ditë është e domosdoshme për çdo njeri. Por rrallë gjendet ndokush që vret mendjen për hollësitë e të pirit të ujit, për shembull, për kohën, dendurinë dhe sasinë e të pirit të ujit në ditë. Hulumtimet shkencore tregojnë se të pish ujë në mënyrë shkencore dhe sipas ligjeve është shumë më e dobishme për shëndetin sesa të pish ujë sipas qejfit.

Një djalë me emrin Yu Guanxiong, që jeton në qytetin Çongqing të Kinës Jugperëndimore, pinte dikur 25 litra ujë në ditë. Por sa më shumë ujë pinte, aq më pak ushqime hante ai në ditë, si rrjedhim, pesha e trupit të tij u pakësua 10 kilogramë brenda 4 muajve. Kështu, ai u detyrua të shkonte për vizitë të doktori. Pas analizave, doktori i spitalit Numër 1 pranë Universitetit të Mjekësisë të Çongqingut, profesori Li Çifu, tha se ai djalë vuante nga diabeti insipindus, si pasojë e dëmtimit të trurit në një aksident rrugor.

"Dy veshkat në trupin e njeriut, që funksionojnë si diga e një rezervuari, ndalojnë humbjen e ujit të trupit. Kjo 'digë' kontrollohet nga një lloj substance që sekreton truri. Meqenëse truri i tij ishte dëmtuar, veshkat në trupin e tij kishin mbetur të pakontrolluara, Si pasojë, një sasi e madhe uji humbej prej tyre, prandaj ai ndiente në çdo kohë një etje të madhe dhe dëshironte të pinte sa më shumë ujë. Ja, kjo është sëmundja, nga e cila vuante ai."

Nga hulumtimet shkencore del se sasia e ujit që merr trupi i njeriut, duhet të jetë e barabartë me sasinë e ujit që nxirret nga trupi. Prandaj, përveç ujit që e marrim duke ngrënë ushqimet, duhet të pimë në ditë 1000-2000 mililitra ujë, domethënë 6 a 8 gota ujë, që të plotësohen nevojat e metabolizmit të organizmit tonë. Por sasia e ujit që duhet të pimë në ditë, nuk është diçka e pandryshueshme. Duhet të shtohet kjo sasi në verën me vapë ose në rastet e sporteve të rënda dhe të punës në mjedis me temperaturë të lartë.

Atëherë, në ç' kohë dhe në ç' mënyrë duhet të pimë ujë? Ndoshta shumë njerëz mund të thonë: të pimë ujë kur kemi etje. Por profesor Li Çifu tha se kjo përgjigje nuk është e drejtë.

"Askush nuk duhet të pijë ujë vetëm kur ka etje, sepse kur ai ndien etje, kjo tregon se trupit të tij tashmë i mungon uji, gjë që ngacmon nervat e tij qendrore. Pini ujë edhe në kohën kur nuk ndieni etje dhe mos prisni kohën e mungesës së ujit."

Etja është një sinjal që jep organizmi i njeriut kur ka nevojë për ujë dhe shumë njerëz e plotësojnë këtë nevojë vetëm kur e ndiejnë atë. Por në fakt, trupi i njeriut në këtë kohë ra në gjendjen e dehidratimit. Zakoni i keq i njerëzve, për të pirë ujë vetëm kur kanë etje, e shpie shumë shpesh trupin e tyre në gjendjen e dehidratimit, dhe kjo gjë është shumë e dëmshme për shëndetin. Prandaj, në të pirët e ujit, më mirë të respektohet ky parim: të pimë ujë më dendur dhe me një sasi të vogël çdo herë.

Më mirë të pimë nga një gotë ujë në mëngjes pas pastrimit të dhëmbëve, rreth orës 10, rreth orës 3 pasdite, para darkës dhe para gjumit të natës. Organizmi i njeriut ka nevojë urgjente për ujë sidomos në mëngjes, pas gjumit, prandaj po të pimë një gotë ujë në këtë kohë, uji mund të hyjë shpejt në gjak dhe ta hollojë gjakun, duke shpejtuar qarkullimin e tij, duke shmangur efektivisht sëmundjet e enëve të gjakut të zemrës dhe të trurit, duke favorizuar furnizimin me gjak dhe metabolizmin e veshkave, e më tej, duke eliminuar substancat helmuese dhe duke pastruar stomakun dhe zorrët. Duhet të pimë një gotë ujë edhe rreth orës 10, sepse kemi nevojë të plotësojmë ujin e trupit, të humbur si djersë dhe si urinë. Duhet të pimë një gotë ujë edhe pas dreke për të forcuar funksionin tretës të organizmit. Zëvendësimi i kafesë dhe çajit me një gotë ujë rreth orës 3 pasdite, gjithashtu, favorizon në plotësimin e ujit të organizmit.

Docenti Zhou Bo i spitalit numër 1 pranë Universitetit të Mjekësisë të Çongqingut tha se duhet të kemi shumë kujdes për të pirë ujë kur merremi me sporte.

"Pirja e ujit në kohën kur merremi me sport, kërkon shumë kujdes. Për shkak të lëvizjeve në sporte, na dalin shumë djersë dhe, rrjedhimisht, humbim një sasi të madhe uji të organizmit. Po të pimë ujë vetëm në kohën kur ndiejmë etje, na ka humbur tashmë ekuilibri. Duhet medoemos të pimë ujë para dhe pasi merremi me soprt, por duhet të pimë shumë herë dhe në sasi të vogël në çdo herë dhe të mos pimë shumë ujë menjëherë, përndryshe, kjo mund të çojë në helmimin me ujë."

Ne nuk duhet të pimë "ujin e vjetruar", që ka qëndruar për një kohë të gjatë, sepse ky ujë pengon zhvillimin e organizmit të fëmijëve dhe shpejton plakjen e njerëzve të moshuar. Të mos pimë as ujin e zier për herë të dytë, sepse ky ujë përmban subnitrat të trashur, që mund të çojë në helmimin e organizmit të njeriut. (Zheng)