dëgjoni

Libri "Arti ushtarak i Suncit" ka qenë vepra më e madhe mbi teorinë ushtarake në Kinë në lashtësi dhe është bërë sot një nga veprat kineze më me ndikim dhe të përhapura gjerësisht në botë. Sunci, autori i tij, quhet me respekt nga strategët kinezë dhe të huaj të kohës së lashtë dhe të kohës sonë si "Paraardhësi i ushtarakëve".

Sunci, emri i vërtetë i të cilit ka qenë Sun Vu, jetoi në shekullin 6 para erës së re, në periudhën e Pranverës dhe Vjeshtës, kur dinastia Zhou po binte nga dita në ditë dhe principatat e saj vazhdonin luftërat për rritjen e forave të veta. Gjatë 240 vjetëve të periudhës së Pranverës dhe Vjeshtës, ndodhën mbi 480 konflikte të mëdha dhe të vogla të armatosura. Në kohën e rinisë, Sunci mori pjesë në luftimet e ushtrisë së shtetit Vu. Pasi u plagos në fushën e betejës, ai u lirua nga ushtria, u vendos në malësi dhe u dha pas shkrimit. Luftërat midis shteteve të ndryshme i dhanë atij materiale të mjaftueshme. Pasi e përfundoi me sukses së shkruari, libri i tij "Arti ushtarak i Suncit" iu rekomandua mbretit të shtetit Vu, i cili kishte ndër mend të ndëshkonte ushtarakisht shtetin e fuqishëm Çu, por nuk guxonte, sepse i mungonte një njeri i talentuar që mund të komandonte ushtrinë e tij.

Mbreti i shtetit Vu e vlerësoi lart librin "Arti ushtarak i Suncit" dhe, për të provuar aftësinë drejtuese të Suncit, iu lut atij të stërviste gratë dhe vajzat e oborrit mbretëror. Sunci e pranoi dhe, gjatë stërvitjes, vrau një konkubinë të mbretit, e cila u tall me disiplinën ushtrarake. Mbreti i shtetit Vu ndjeu dhembje të madhe në zemër për humbjen e një konkubine që e donte shumë, por megjithatë e emëroi Suncin gjeneral të lartë të ushtrisë së tij.

Në vitin 506 para erës së re, shteti Vu filloi luftën kundër shtetit Çu. Të komanduar nga Sunci, 30 mijë ushtarë të shtetit Vu shpartalluan 200 mijë ushtarë të shtetit Çu, gjë që tronditi edhe shtetet e tjera. Gjatë mbi 20 vjetëve të mëvonshëm, të ndihmuar nga Sunci, mbretërit e dy brezave të shtetit Vu korrën fitore të njëpasnjëshme mbi shtetet e tjera. Por gjëja, që e bëri Suncin një figurë të famshme për 2600 vjet, nuk kanë qenë meritat e tij në luftë, por libri i tij ushtarak "Arti ushtarak i Suncit", që është një vepër e pavdekshme.

Libri "Arti ushtarak i Suncit" konsiderohet si vepra më e hershme në botë mbi teorinë ushtarake dhe quhet me nderim si "libri i parë ushtarak i lashtësisë në botë" dhe "kodi i shenjtë i shkencës ushtarake", sepse ky libër u botua 2300 vjet më parë se libri i autorit evropian Klausevits me titull "Për luftën".

"Arti ushtarak i Suncit", që është një libër me 6000 fjalë, ndahet në 13 kapituj. Çdo kapitull ka një temë dhe përmban një sërë taktikash dhe shembujsh. Ky libër me mendime të thella filozofike dhe taktika të shumta ka ushtruar dhe ushtron ndikim në fushën e mendimeve strategjike të botës.

Libri "Arti ushtarak i Suncit" është përkthyer në 29 gjuhë dhe është botuar në mijëra versione në botë. Akademitë ushtarake të disa vendeve e kanë përfshirë këtë libër ndër lëndët mësimore. Mendimet e shtjelluara në këtë libër zbatohen edhe në fushat politike dhe ekonomike. Shumë sipërmarrës dhe biznesmenë kinezë dhe të huaj i zbatojnë mendimet e Suncit në administrimin e ndërmarrjeve dhe në shitjen e mallrave në treg, duke arritur efektivitet pozitiv në "përdorimin e librit ushtarak në fushën tregtare". (Zheng)