dëgjoni

Wang Fuli është aktore e famshme kineze e filmit. Ajo ka kaluar shumë etapa të zhvillimit të filmit kinez dhe ka interpretuar shumë role të karaktereve të ndryshme.

57-vjeçarja Wang Fuli duket shumë e re. Ajo ka ruajtur gjithmonë entuziazmin e madh për jetën dhe për interpretimin. I ati i Wang Fulit është një admirues i operës së Pekinit, prandaj Wang Fulit i pëlqente shumë opera e Pekinit qysh në moshë të re. Në moshën 11-vjeçare, Wang Fuli hyri në shkollën e operës për të mësuar operën e Pekinit. Për shkak të mësimit me zell dhe talentit të madh, Wang Fuli pati progres të madh në interpretimin e operës së Pekinit. Pas mbarimit të mësimeve në shkollën e operës, Wang Fuli hyri në Trupën e Operës së Pekinit të provincës Jiangsu dhe u bë një aktore opere.

Wang Fuli hyri rastësisht në qarqet e filmit. Në vitet '70 të shekullit të kaluar, studioja e prodhimit të filmit e Changchunit kërkoi në mbarë vendin një aktore për rolin kryesor të filmit "Rruga e artë". Wang Fuli pati fatin të zgjidhej. Në ato vite, në Kinë xhiroheshin çdo vit pak filma, prandaj ky ishte një rast i paimagjinueshëm për Wang Fulinë. Wang Fuli është një aktore e talentuar, ajo e luajti me sukses rolin në film duke fituar përshëndetjen e gjerë të shikuesve. Midis aktorit të operës dhe aktorit të filmit ka dallime të mëdha, ndaj Wang Fuli kapërceu shumë vështirësi në fushën e interpretimit. Ajo tha:

"Në skenën e operës së Pekinit, duhet të interpretoj rolin. Kurse në film, duhet të interpretoj si në jetë. Në fillim nuk isha shumë e mësuar me interpretimin në film, por me ndihmën e regjisorit, zotërova gradualisht mjeshtërinë e interpretimit në film."

Wang Fuli u bë shumë e famshme për shkak të interpretimit të spikatur në filmin "Rruga e artë". Pas disa vjetëve, ajo luajti një grua noprane fshatare në filmin "Niu Baisui". Në këtë film, personazhi i interpretuar nga Wang Fuli grindet shpesh me bashkëfshatarët, por në jetë, Wang Fuli nuk grindet fare me të tjerët. Për të luajtur mirë këtë rol, para xhirimit, Wang Fuli shkoi posaçërisht në fshat për të parë nga afër jetën e fshatarëve dhe për të vëzhguar grindjet e grave fshatare. Wang Fuli e interpretoi shumë mirë rolin në film dhe kjo grua fshatare e interpretuar nga ajo fitoi përshëndetjen e shikuesve. Për shkak të interpretimit të shquar në filmin "Niu Baisui", Wang Fuli fitoi çmimin e aktores më të mirë të filmit të Kinës në atë vit.

Filmi "Tregimet në malin Tianyun" i regjisorit të famshëm kinez Xie Jin është një film i rëndësishëm në historinë e filmit kinez. Ky film u xhirua në vitin 1980 kur sapo filloi të zbatohet në Kinë politika e hapjes ndaj botës së jashtme dhe përshkruan fatin e trishtuar të një intelektualeje gjatë Revolucionit Kulturor. Wang Fuli interpretoi personazhin kryesor të filmit Song Wei. Wang Fuli kujton:

"Në këtë film pati një skenë puthjeje që shkaktoi diskutime të gjera në shoqërinë kineze. Sepse në atë kohë në filmat kinezë nuk kishte skena të tilla."

Në filmin "Agimi" të adaptuar nga drama e dramaturgut të famshëm kinez Cao Yu, Wang Fuli interpretoi një lavire në vitet '30 të shekullit të kaluar. Për ta luajtur mirë këtë rol, Wang Fuli ngjyrosi dhëmbët me ngjyrë të verdhë dhe mësoi të pijë cigare. Pas mbarimit të xhirimit të filmit, Wang Fuli u mësua keq me duhanin, por në fund ajo hoqi dorë nga ky zakon i keq. Wang Fuli tha:

"Në filmin 'Agimi' nevojitej të pija shumë cigare. Gradualisht u mësova keq me duhanin. Por duhani dëmton lëkurën, prandaj hoqa dorë më në fund prej tij."

Edhe bashkëshorti i Wang Fulit Wang Qun është një aktor filmi, por ai nuk është shumë i famshëm si Wang Fuli. Gjatë mbi 30 vjetëve pas martesës, ndjenjat midis tyre janë gjithmonë të thella. Tani Wang Fuli është bërë gjyshe dhe po gëzon lumturinë e jetës. (Fani)