"Kënga e bariut" është një këngë popullore mongole e përhapur gjerësisht, melodia e saj e bukur lirike ka karakteristika të theksuara të stepës. Pas përpunimit nga kompozitorja e njohur kineze Qy Xixian, kjo këngë pa shoqërim është bërë më e lehtë dhe më e rrjedhshme. Ajo përshkruan me bukuri peizazhin natyror të kullotës, duke shprehur dashurinë e blegtorëve për jetën.

Në këngë thuhet: " Në qiellin e kaltër valëviten retë e bardha, nën retë e bardha ka kope dhensh të bardhë si dëborë, të shpërndarë si pikë argjendi në kullotë."

Kori i Radios së Kinës është një kor i njohur profesional në Kinë. Gjatë 50 vjetëve pas formimit të tij, ky kor ka organizuar shumë koncerte dhe ka grumbulluar shumë këngë të bukura. "Këngë për tokën" është një album i këtij kori, në të cilin përfshihen 17 këngë kineze dhe të huaja, me tema të gjera dhe me stile të ndryshme të cilat kanë forcë të madhe prekëse dhe vlerë artistike.

Kënga që po dëgjoni me titullin "Kënga e dashurisë Kangding" është një nga këngët e albumit të sipërpërmendur. Kjo këngë me ritme të lehta dhe me melodi të bukur shpreh etjen dhe shpresën e njerëzve për dashurinë.

Më poshtë do të dëgjojmë së bashku këngën me titull "Nën rrezet e argjendta të hënës", të kënduar nga Kori i Radios së Kinës.

Kjo është një këngë popullore e kombësisë Tatar që është e përhapur në Rajonin Autonom të Singjang-ujgurit në veri-perëndim të Kinës. Melodia lirike e këngës përshkruan kujtimet e njerëzve për dashurinë e dikurshme. Në këngë thuhet: " Në rënishtet me ngjyrë të argjendtë janë të shpërndarë rrezet e argjendta të hënës. Ne po kërkojmë gjurmët e së kaluarës. Por këto gjurmë janë të paqarta si në ëndërr. Ku je fshehur vajza ime e larguar ?"

Tani do të dëgjojmë së bashku këngën "Gurgullon përroi"

Kjo është një këngë popullore e përhapur në provincën Yunan të Kinës jug-perëndimore, ajo me melodi të bukur dhe me tekst poetik përshkruan një panoramë të bukur: Nën rrezet e argjendta të hënës, ku mbizotëron qetësia, dëgjohet vetëm gurgullima e përroit. Vajza e bukur i ka shprehur ndjenjat e saj të thella ndaj të dashurit në melodinë e bukur.

Ju flet Radio e Jashtme e Kinës. Të dashur dëgjues, dëgjuat një grup këngësh popullore të kënduara nga Kori i Radios së Kinës. Mirudëgjofshim të shtunën tjetër, në mikrofon për ju Pina.