Kompania e telekomukacionit Motorola, e njohur në botë ndërtoi në vitin 1994 në zonën ekonomike Taida fabrikën e prodhimit të celularëve. Përgjegjësi i kësaj kompanie për punët propagandistike dhe publike z. Yang Boning i tha korrespondentit se fabrika e celularëve në zonën ekonomike Taida është baza më e madhe e prodhimit të celularëve të kompanisë Motorola në mbarë botën.

"Kina është pjesë shumë e rëndësishme dhe tregu më i madh i kompanisë Motorola në botë. Celularët e prodhuar në fabrikën e zonës Taida jo vetëm shiten në tregun kinez, por eksportohen edhe në vende të ndryshme të botës. Kompania Motorola ka në Kinë dy qendra të saj, qendrën e prodhimit dhe atë të studimit."

Z. Yang Boning u shpreh se në fillim të investimeve të Kompanisë Motorola në Kinë, hapja e Kinës ishte shumë e kufizuar dhe kishte shumë kufizime ndaj investimeve të huaja. Zona ekonomike Taida i dha lejen Kompanisë Motorola të krijonte ndërmarrjen me investime të huaja në këtë zonë, duke shprehur konceptin e saj të hapjes ndaj botës.

Në bazë të zhvillimit dhe forcimit të pandërprerë të zonës ekonomike Taida, projektuesit e zonës së re Binhai të Tiencinit filluan të mendojnë se si të marrin një zhvillim më të madh duke shfrytëzuar pozitën e vet gjeografike. Zona Binhai është në formë rripi e krijuar sipas vijës së gjirit Bohai, ku ndodhet porti më i madh artificial i Kinës, porti i Tiencinit dhe zona e përjashtimit nga taksat, prandaj këtu ka kushte shumë të mira të zhvillimit të transportit dhe të qarkullimit të mallrave.

Porti i Tiencinit ka një sipërfaqe të përgjithshme prej 200 kilometrash katërore, ku mund të hyjnë dhe dalin çdo kohë anijet e tonazhit prej 150 mijë tonësh, vëllimi vjetor i ngarkim-shkarkimit i kalon të 200 milionë tonët. Deri në fund të vitit të kaluar në zonën e përjashtimit nga taksat janë tërhequr mbi 5700 ndërmarrje kineze dhe të huaja dhe është ndërtuar baza më e madhe e përpunimit dhe eksportimit të drithrave, vajit dhe domateve. Gjatë vizitës, korrespondenti mësoi se në 5 vjetët e ardhshëm, zona e re Binhai do të zgjerojë më tej portin dhe zonën e tij të përjashtimit nga taksat. Sekretari i Komitetit të komunikacionit të qytetit Tiencin z. Liu Mingde tha:

"Në portin e Tiencinit do të ndërtohet një linjë e thellë ku mund të lundrojnë anije me tonazh prej 250 mijë tonësh dhe vëllimi vjetor i ngarkim-shkarkimit do të arrijë në 300 milionë tonë, kështu Tiencini do të bëhet një port modern ndërkombëtar me ujë të thellë, me instalime të përparuara dhe me funksione të përsosura, një port nyjë i konteinerëve në Azinë veri-lindore, duke luajtur rolin e qendrës ndërkombëtare të transportimit dhe të qarkullimit të mallrave në veri të Kinës."

Sot në zonën e re Binhai të Tiencinit është formuar struktura industriale me degë industriale të informacionit, të prodhimit të automobilave, të naftës dhe petrokimisë, të teknologjisë biologjike, mjekësisë e farmaceutikës moderne dhe të shfrytëzimit të energjisë si degë kryesore. Krahas rritjes ekonomike, zona Binhai po mendon se si të ruajë zhvillimin përpjesëtimor eknomik, shoqëror dhe të mjedisit. Tani në këtë zonë mbi 500 kilometra katërorë toka të lagështa janë ruajtur mirë, përqindja e gjelbërimit ka arritur në 35%, dhe sasia e energjisë së shpenzuar për 10 mijë juanë GDP është vetëm 10% e mesatares së shpenzimit të energjisë së mbarë vendit.

Gjatë vizitës në degën e Kompanisë aksionere të naftës dhe petrokimisë të Kinës në Tiencin, korrespondenti pa nga afër drerë dhe palonj që shëtisnin qetë-qetë në kopshtin e kësaj ndërmarjeje të industrisë së rëndë kimike, me pemë, lule dhe peizazhe të shumëllojshme. Përgjegjësi i kësaj ndërmarrjeje z. Zheng Vanjun u shpreh se ndërmarrja e tyre i kushton rëndësi të madhe fakti se si të pakësohen ndikime negative të prodhimit mbi mjedisin. Ai tha:

"Ne kemi përmirësuar mjedisin nëpërmjet gjelbërimit dhe trajtimit të ujërave të përdorur. Para shkarkimit në fabrikën e përgjithshme të trajtimit të ujërave të përdorur, ne i trajtojmë një herë në fabrikën tonë dhe pastaj i shkarkojmë në fabrikën e përgjithshme."

Zhvillimi përpjesëtimor i ekonomisë dhe i mjedisit u ka krijuar banorëve të zonës së re Binhai një mjedis të këndshëm të jetës dhe të punës. Korrespondenti ynë pa këtu ndërtesa të rregullta dhe të pastra, rrugë të gjera në zonën e banimit, kopshte dhe sheshe pushimi etj. Zj. Florenee Cherry nga Amerika që punon dhe jeton në këtë zonë të re i tha korrespondentit se ajo është e habitur shumë nga puna e hollësishme e mbrojtjes së mjedisit në këtë zonë. Ajo tha:

"Për një kohë të gjatë ata grumbullojnë të gjitha letrat e përdorura, mbeturinat metalike dhe plastike ashtu si në vendin tim, për t'i ripërdorur, kështu mbrohet edhe mjedisi. Mbrojtja e mjedisit dhe e rruzullit tokësor është shumë e rëndësishme, sepse natyra duhet të jetë në ekuilibër, po të prishet ky ekuilibër do të ndodhin fatkeqësi, prandaj duhet ta mbrojmë me të gjitha forcat mjedisin."

Zhvillimi i qëndrueshëm, përpjesëtimor dhe i gjithanshëm është synim konsekuent i Kinës, funksionari i Komitetit Administrativ të Zonës së re Binhai i tha korrespondentit se në të ardhmen zona e tyre krahas zhvillimit të shëndetshëm të ekonomisë, do t'i kushtojë vëmendje zhvillimit afatgjatë, ndërtimit të zonës ekologjike dhe të përshtatshme për banimin e njerëzve. (Pina)