dëgjoni

Tani po zhvillohet në Galerinë e Arteve Figurative të Kinës në Pekin ekspozita e pikturave me bojë vaji të Feng Shaoxies "Pëllumba në Lindjen e Mesme". Këto piktura me temë kryesore paqen në Lindjen e Mesme kanë ngjallur jehonë të madhe ndër qarqet artistike kineze dhe shikuesit paqedashës.

Në ekspozitën e Feng Shaoxies janë vendosur 18 piktura të mëdha . Në pikturën e parë të ekspozitës "Pëllumba në Lindjen e Mesme", Feng Shaoxie ka vizatuar një pëllumb të bardhë të plagosur e prapa pëllumbit ka flamurë të Palestinës dhe Izraelit. Në pikturat e tjera, shikuesit mund të shohin ish-kryeministrat e Izraelit Yitzhak Rabin, e Sharon, ish-udhëheqësin e Palestinës Arafat, jetimë palestinezë e izraelitë, Murin e Veçimit etj. dhe mund të njohin nga këto piktura vëmendjen e madhe të autorit për procesin e paqes në Lindjen e Mesme.

Teoricieni i famshëm kinez i arteve figurative dhe kryeredaktori i revistës "Artet Figurative" Wang Zhong tha?

"Kjo është një ekspozitë e veçantë, pikturat e Feng Shaoxies paraqesin plotësisht dëshirën e artistëve kinezë për arritjen e paqes në Lindjen e Mesme. Në të kaluarën kishte pak piktorë kinezë që krijonin vepra lidhur me problemin e paqes në Lindjen e Mesme. Feng Shaoxie është një piktor me mjeshtëri dhe përgjegjësi të lartë shoqërore."

Feng Shaoxies iu deshën 2 vjet për të krijuar veprat e ekspozitës "Pëllumba në Lindjen e Mesme". Duke folur për shkakun e krijimit të këtyre pikturave, Feng Shaoxie tha?

"U kushtoj vëmendje të madhe problemeve të rëndësishme ndërkombëtare e atyre në Kinë dhe më pëlqen të krijoj piktura me temë kryesore politike. Jam i mendimit se një artist duhet të ketë përgjegjësi shoqërore dhe të pasqyrojë problemet shoqërore në veprat e veta."

Feng Shaoxie lindi në vitin 1964 në një fshat të provincës Guangdong të Kinës jugore dhe i pëlqente vizatimi qysh në moshë të re. Tani ai është nënkryetar i Shoqatës së Artistëve të Qytetit Foshan. Për të ngritur më tej nivelin artistik, Feng Shaoxie hyri në Institutin e Studimeve të Artit të Kinës për të studiuar teorinë dhe mjeshtërinë e arteve figurative. Në vitin 2003, Feng Shaoxie zhvilloi në Galerinë e Arteve Figurative të Kinës ekspozitën individuale të pikturës "Tregu kulturor i Kinës". Veprat e tij pasqyquan vërtet problemet në tregun kulturor duke tërhequr vëmendjen e qarqeve të ndryshme shoqërore e si pasojë Feng Shaoxien e quajnë "Piktori i kritikës".

Në vitin 2004, Feng Shaoxie filloi t'i kushtojë vëmendje problemit të Lindjes së Mesme dhe vendosi të krijojë vepra lidhur me këtë temë. Feng Shaoxie tha:

"Shpresoj që nëpërmjet pikturave të mia do t'i bëj thirrje komunitetit ndërkombëtar të bëjë përpjekje të mëtejshme për të zgjidhur konfliktin palestinezo-izraelit në mënyrë paqësore. Njëkohësisht këto piktura do të tregojnë se kombi kinez është një komb paqedashës."

Gjatë 2 vjetëve, Feng Shaoxie mblodhi shumë të dhëna dhe i ftoi njerëzit të përkthejnë shumë materiale nga gjuhë të huaja. Ky ishte një proces shumë i vështirë. Feng Shaoxie tha:

"Bëra përpjekje të palodhshme për krijimin e pikturave të ciklit 'Pëllumba në Lindjen e Mesme'. Lexova shumë materiale me qëllim që pikturat e mia të pasqyrojnë problemin e Lindjes së Mesme në mënyrë të baraspeshuar dhe objektive. Nëpërmjet leximit të materialeve, thellova njohjen për këtë problem. Kjo ka pasur rëndësi të madhe për krijimin e këtyre pikturave."

Pikturat e Feng Shaoxies kanë tërhequr vëmendjen e njerëzve për çështjen e paqes në Lindjen e Mesme. Feng Shaoxie shprehu shpresën se me përpjekjet e përbashkëta të komunitetit ndërkombëtar, do të realizohet paqja e përhershme në Lindjen e Mesme. (Fani)