Me t'u hapur dera e Pallatit të librarisë të Pekinit, një librari e madhe e shitjes së librave me pakicë në Kinë, njerëzit vërsulen pandërprerë në detin e librave, ku ata zgjedhin dhe blejnë librat e parapëlqyer dhe ndjejnë njëkohësisht ndryshime në tregun e librave.

Z. Wang Heng që po zgjidhte libra i tha korrespondentit se tani kapaku i librit është përmirësuar shumë.

"Në krahasim me disa vjet më parë, tani janë arritur përparime të mëdha në botimin dhe lidhjen e librave, hieroglifet janë botuar shumë qartë."

Zj. Li Fen që po zgjidhte këtu libra u shpreh:

"Llojet e librave janë të shumta, mund të gjesh të gjitha llojet e librave që të pëlqejnë."

Vitet e fundit, Pallati i librarisë i Pekinit ka rujatur një rritje vjetore shitjeje prej 20%. Vitin e kaluar vëllimi i përgjithshëm i shitjes arriti në 440 milionë juanë. Sipas të dhënave jo të plota, në vitin 2005 në Kinë u botuan mbi 220 mijë lloje librash, duke u shtuar 8% në krahasim me vitin 2004 dhe mbi 10 herë më shumë se 10 vjet më parë.

Në vitet '80 dhe '90 të shekullit të kaluar, në libraritë e Kinës nuk kishte shumë njerëz, sepse librat e botuara nga shtëpitë botuese shtetërore të Kinës, që nuk synonin shumë fitime, nuk mund të plotësonin kërkesat e lexuesve.

Në përputhje me kërkesat e zhvillimit të ekonomisë së tregut qysh nga fundi i shekullit të kaluar, Kina nisi reformën e tregut të botimeve. Të nxitur nga reforma, njësitë botuese të Kinës shndërruan sistemin e vet, duke u bërë forcë kryesore e tregut, dhe janë formuar një numër i madh ndërmarrjesh botuese me aftësi konkurruese në treg. Në vitin 2002 u formua grupi botues i Kinës, ndërmarrja më e madhe botuese e Kinës, nga më shumë se 10 shtëpi botuese. Drejtori i përgjithshëm i këtij grupi z. Yang Muzhi shtjelloi qëllimin e formimit të tij:

"Ne kemi qëllim që të gjallërojmë sistemin tonë dhe të krijojmë një kolektiv të ri e të gjallë me aftësi luftarake, dhe pas 3 deri 5 vjet përpjekjeve ta bëjmë grupin tonë një "aeroplanmbajtëse" të vërtetë në qarqet botuese."

Kjo "aeroplanmbajtëse" me burime të pasura botuese, me të hyrë në detin tregtar, ka treguar forcën e saj të madhe, duke botuar një sërë librash të mira. Në vitin 2004, ky grup nxori në qarkullim koleksionin e librave kineze, ku janë përmbledhur së bashku librat letrare, historike, filozofike, shkencore e arsimore, artistike, fjalorët, si dhe "veprat e njohura të përkthyera në gjuhën kineze" etj. të autorëve kinezë të shekullit të 20-të, duke formuar koleksionin më të madh të kohës moderne të Kinës. Tani botimet e këtij grupi zënë mbi 7% të tregut të mbarë vendit.

Gjatë reformës, një numër i madh ndërmarrjesh të reja botuese filluan të tregojnë gjallërinë dhe forcën konkurruese në treg. "Raporti i tregut të librave kinezë të shitjes me pakicë" tregon se rritja mesatare vjetore e kapitaleve të 7 ndërmarrjeve botuese eksperimentale si Grupi Botues i Kinës, Grupi Botues Liaoning, Kompania Aksionare Botuese me përgjegjësi të kufizuar e Shangait, Grupi Botues i Shekncave etj. ka arritur në 24%.

Drejtori i Grupit botues Liaoning, z. Ren Huiying shprehu mendimin se krijimi i të rejave në sistem dhe politika e privilegjuar e shtetit janë shkaku kryesor i rritjes së shpejtë të sektorit botues:

"Reforma e sistemit dhe e mekanizmit ka shtuar gjallërinë e grupit tonë. Grupi ynë zbaton ndarjen e ndërmarrjes nga administrata dhe ne gëzojmë një sërë politikash të privilegjuara."

Ndërmarrjet botuese kineze të tipit të ri zbatojnë edhe strategjinë e zhvillimit jashtë vendit duke marrë pjesë aktivisht në konkurrencën ndërkombëtare. Ekspozita e librave që organizohet çdo vit në Frankfurt, ekspozita më e madhe e librave në botë dhe tregu i biznesit të të drejtave të ribotimit, është një arenë ndërkombëtare për të kontrolluar zhvillimin e sektorëve botues të vendeve të ndryshme. Në pavionin kinez të ekspozitave të kaluara kishte pak njerëz, pak libra dhe pak aktivitete tregtare. Ndërsa në ekspozitën e këtij viti delegacioni kinez i përbërë prej 200 vetash solli afro 10 mijë lloje librash të reja, ndër të cilat mbi 2 mijë lloje librash janë në gjuhët kineze dhe angleze.

Në ekspozitat e kaluara sasia e importimit të të drejtave të ribotimit nga Kina ishte mbi 10 herë më e madhe krahasuar me sasinë e eksportimit, duke krijuar një gjendje të paekuilibruar midis importit dhe eksportit. Në ekspozitën e këtij viti Kina importoi të drejtat e ribotimit të 881 librave dhe eksportoi të drejtat e ribotimit të 615 librave, duke shtuar pjesën e botimeve kineze në tregun ndërkombëtar.

Drejtori i Drejtorisë së politikave dhe rregulloreve ligjore të Komisionit Shtetëror të Shtypit dhe të Botimit të Kinës z. Wang Tao u shpreh:

"Kjo është një situatë e mirë që s'e kemi parë për shumë vjet, e cila është krijuar si rezultat i forcimit të potencialit dhe të aftësisë së krijimit të të rejave të ndërmarrjeve botuese kineze nëpërmjet reformës."

Gjatë mbi 10 vjetëve të fundit, sektori kinez i botimit ka realizuar ndryshimin e tij nga sistemi i ekonomisë së planifikuar në ekonominë e tregut, dhe nga ky ndryshim kemi parë rritjen dhe forcimin e sektorit botues kinez dhe lulëzimin e tregut të librave. Me thellimin e reformës, sektori botues kinez me siguri do të zhvillohet gjithënjë e më mirë. ( Pina )