43-vjeçari Meng Jinghui u diplomua në vitin 1986 në fakultetin e letërsisë kineze të Universitetit Pedagogjik të Pekinit. Për shkak që i pëlqente shumë drama, ai vazhdoi studimet pasuniversitare në fakultetin e regjisurës të Universitetit Qendror të Dramës të Kinës. Në vitin 1992, Meng Jinghui u pranua të punonte në Teatrin Qendror të Dramës. Po atë vit, drama "Sifan" e përpunuar dhe e drejtuar nga ai fitoi çmimin e shfaqjes së shquar dhe çmimin e regjisorit të shquar të vendit. Megjithëse kjo ishte vepra e parë e tij, "Sifan" ngjalli jehonë të madhe në qarqet e dramës të Kinës.

"Sifan" është një dramë plot me ide të reja. Meng Jinghui bashkoi një fabul të operës së lashtë kineze "Sifan" me dy tregime të veprës së shkrimtarit italian Bokacio "Dekameroni". Ky është një krijim i ri në qarqet e dramës kineze. Duke folur për idealin e vet për dramën, Meng Jinghui tha:

"Përpiqem të krijoj gjëra të reja në dramat e mia dhe dua t'u shfaq shikuesve imagjinatën e jashtëzakonshme. Shpresoj se shikuesit mund t'i shikojnë dramat e mia në një atmosferë të lirë dhe të lehtë. Kjo nuk është një gjë e thjeshtë."

Në fund të viteve '90 të shekullit të kaluar, Meng Jinghui hyri në periudhën e kulmit të krijimtarisë dhe ishte regjisor i shumë dramave që tërhoqën vëmendjen e gjerë të shikuesve dhe të medias. Ndër to, drama "Rinoqeronti" u shfaq më se 100 herë. Kjo dramë përshkruan një tregim dashurie të një rritësi rinoqeronti Ma Lu. Ma Lu kaloi pothuajse çdo vuajtje për të gjetur dashurinë, por nuk pati rezultat. Në fund Ma Lu i dëshpëruar e vrau rinoqerontin e rritur nga ai. Në këtë dramë, Meng Jinghui ndërthuri tragjedinë e komedinë duke pasur sukses të madh.

Drama "Vdekja aksidentale e një anarkisti" e versionit kinez konsiderohet si një nga veprat tipike të Meng Jinghuit. Autori i kësaj drame është fituesi italian i çmimit Nobel për letërsinë në vitin 1997 Dario Fo. Nëpërmjet përpunimit të Meng Jinghuit, drama u përshëndet nga shikues dhe specialistë. Meng Jinghui tha:

"Drama 'Vdekja aksidentale e një anarkisti' u dha shikuesve një rast të mirë për shkëmbimet shpirtërore me autorin. Në këtë dramë dua të them se krahas lirisë dhe barazisë, edhe drejtësia është shumë e rëndësishme."

Në 3 vjetët e fundit, Meng Jinghui ka qenë regjisor edhe i dy dramave për fëmijë "Mali magjik" dhe "Labirinti". Ai u shfaq fëmijëve kinezë imagjinatën e veçantë duke fituar përshëndetjen e tyre. Këto dy drama u shfaqën afro 100 herë në mbarë vendin dhe kjo është diçka e jashtëzakonshme në qarqet e dramave për fëmijë.

Dramat e Meng Jinghuit sjellin pandërprerë risi si në fushën e interpretimit ashtu edhe në fushën e përmbajtjes. Meng Jinghui ka parë shumë drama të lashta greke dhe drama moderne perëndimore dhe ka mendimin e vet për dramat moderne kineze. Ai është i mendimit se zhvillimi i dramave lidhet ngushtë me zhvillimin e shoqërisë. Dramat moderne duhet të përputhen me kërkesat e shikuesve. Në fushën e interpretimit, Meng Jinnghui u jep aktorëve liri të plotë duke u dhënë shikuesve hapësirën e imagjinatës.

"Hëna" është vepra e fundit e Meng Jinghuit. Karakteristika më e spikatur e kësaj drame është që tema kryesore dhe fabula nuk janë shumë të qarta. Meng Jinghui u shpreh se ai dëshiron të bëjë një provë për të gjetur një rrugë të re dramaturgjike. Ai tha?

"Nuk jam një regjisor konservator. Dua të kërkoj më shumë gjëra të reja për të nxitur zhvillimin e dramës kineze."

Meng Jinghui është i mendimit se skena e dramës është një hapësirë e gjerë për artistët. Ai shpreson t'u japë shikuesve më shumë drama të shkëlqyeshme. (Fani)