Peshëngritësi i njohur kinez Tang Lingsheng ka lindur në vitin 1971 në Rajonin Autonom Guangsizhuang të Kinës jugperëndimore. Në moshën 12 vjeçare, ai hyri në shkollën sportive, duke filluar stërvitjen në peshëngritje. Në vitin 1985, Tang Lingsheng hyri në ekipin e Rajonit Autonom Guangsizhuang dhe dy vjet më pas në Spartakiadën e 7-të Kombëtare të Kinës, ai vendosi rekordin kombëtar dhe aziatik, duke fituar një vend në kombëtaren kineze.

Në vitin 1992 në kampionatin e peshëngritjes të Kinës, Tang Lingsheng zuri vendin e tretë në kampionatin kombëtar të peshëngritjes me rezultatin 295 kilogramë. Në vitin 1993 në kampionatin botëror të peshëngritjes, ai fitoi një medalje të bronztë në kategorinë 59 kg. Në vitin 1995, Tang Lingsheng u bë i njohur pasi fitoi 3 tituj kampion në kampionatin aziatik të peshëngritjes dhe vendosi një rekord aziatik. Në të njëjtin vit, në kampionatin e 26-të botëror të peshëngritjes, ai bëri të vetën medaljen e artë në kategorinë e 59 kg në stilin e shtytjes.

Në vitin 1996 në Lojërat Olimpike të Atlantës, Tang Lingsheng arriti kulmin e karrierës së tij sportive, në garën e kategorisë 59 kg, ai theu rekordin botëror me 307,5 kilogramë, duke fituar një medalje të artë për Kinën. Kjo ishte medalja e parë e artë olimpike e Kinës pas vitit 1984. Pas kësaj fitoreje të madhe, ai u bë një yll dhe fitoi një emër të bukur "Vinçi".

Kur u kthye në atdhe, ai u mirëprit nga liderët e shtetit dhe të vendlindjes. Kudo shkonte, ai trajtohej si VIP-i më i lartë. Qeveria e qytetit Guilin i dhuroi atij një apartament dhe një shpërblim prej mbi 4 milionë juanë.

Në vitin 1998, Tang Lingsheng mbylli karrierën e tij sportive dhe nisi punën si trajneri i ekipit të Rajonit Autonom Guangsizhuang. Por Tang Lingsheng nuk po mësohej fare me punën si trajner. Kur ishte sportist, ai jetonte dhe stërvitej në mënyrë të veçantë. Kur sportistët e tjerë ngriheshin të përgatiteshin për stërvitje, ai qëndronte gjithmonë në gjumë. Pasi u bë kampion olimpik, ai vazhdoi të jetonte në mënyrë zbavitëse. Edhe si trajner, ai nuk ngrihej herët dhe nuk bënte asnjëherë planifikim për stërvitje.

Një herë, Tang Lingsheng vuri bast me një sportist të tij: nëse ai ngrin 160 kilogramë, ky sportist do t'i nënshtrohej një stërvitjeje të rreptë. Por Tang Lingsheng ishte larguar nga stërvitja e rregullt për një kohë të gjatë, ndaj ai nuk arriti të ngrejë madje as 105 kilogramë. Pas kësaj humbjeje, Tang Lingsheng kuptoi se ai nuk ishte më një hero dhe vetëm mund të bënte diçka të thjeshtë si drejtues teknik. Prandaj, ai hyri në Universitetin Sportiv të Uhanit për studimin teorik. Por Tang Lingsheng nuk kishte fare interes për jetën në shkollë dhe në fund ai mori një vendim që të largohet nga peshëngritja.

Më pas, Tang Lingsheng ia kushtoi të gjithë vëmendjen e tij mbjelljes së hurmave. Ai i tregoi gazetarit se ka mbjellë mbi 20 mijë pemë hurme dhe sipas parashikimit, të ardhurat vjetore do t'i kalojnë një milionë juanët. Krahas hurmëve, Tang Lingsheng ka investuar edhe për mbjelljen e gështenjave. Dhe tani gjithçka është në rregull.

Duke vështruar pemët e hurmëve, Tang Lingsheng tha: "Në të kaluarën, mendoja se jam një hero i madh dhe nuk doja të punoja hap pas hapi. Tani unë po kuptoj që puna si trajner dhe studim në shkollë nuk përshtaten me karakterin tim. Duhet të bëj diçka që kam interes. Megjithëse po jetoj në zonën fshatare për mbjelljen e hurmave, jam shumë i gëzuar që po merrem me gjëra që më pëlqejnë. Kam gjetur një gjë të përshtatshme për mua dhe jeta ime ka rifilluar!" (Jiang Lei)