Shteti Çi, që gjendej në bregdetin e pjesës veriore të provincës Shandong të sotme të Kinës, ishte një shtet i madh dhe i fuqishëm ndër pricipatat e shumta të dinastisë Zhou. Çi Huangong, emri i vërtetë Jiang Xiobai, trashëgoi fronin në vitin 685 para erës së re dhe u bë monarku i brezit të 15-të të shtetit Çi. Ngritja e tij në fronin e monarkut u quajt në historiografi si një legjendë.

Kur ai ishte një princ, në shtetin Çi ndodhën turbullira dhe ai me vëllanë e tij princi Gju ikën në mërgim. Më vonë, monarku i shtetit Çi u vra në një grush shteti dhe, me të marrë vesh lajmin, të dy vëllezërit u nisën për t'u kthyer në shtetin Çi, për të trashëguar fronin. Princi Gju kishte një këshilltar me emrin Guan Zhong, i cili bëri çmos të ngrinte princin Gju në fron. Gjatë rrugës, Guan Zhong qëlloi me shigjetë princin Xiaobai. Ky i fundit bëri sikur u vra deri në vdekje, megjithëse shigjeta kishte qëlluar në grremçin e rripit të mesit. Guan Zhong besoi se Xiaobai u vra, prandaj me princin Gju ngadalësuan hapat e udhëtimit. Ndërsa, princi Xiaobai filloi një udhëtim ditë e natë në një rrugë tjetër dhe arriti në shtetin Çi 6 ditë më herët. Kështu, ministrat e ngritën princin Xiaobai në fronin e monarkut të shtetit Çi dhe u quajt "Çi Huangong".

Pasi erdhi në fuqi, Çi Huangong vuri njerëzit e talentuar në postet e rëndësishme, madje pa marrë parasysh urrejtjen e mëparshme, e emëroi si kryeministër Guan Zhong, që u mundua dikur të vriste atë. Dhe Guan Zhong justifikoi besimin e tij. Gjatë 40 vjetëve në postin e kryeministrit, Guan Zhong pati merita të mëdha për fuqizimin dhe begatinë e shtetit Çi.

Çi Huangong mori një sërë masash reformuese dhe bëri të gjitha përpjekjet për t'i dhënë fund gjendjes së vështirë të krijuar nga turbullirat, që zgjatën për një kohë të gjatë në shtetin Çi. Kështu, shteti Çi u shndërrua shpejt në vendin më të begatshëm ndër principatat. Mbi këtë bazë, Çi Huangong filloi të synonte për të vendosur një status të hegjemonit, nëpërmjet aktiviteteve ushtarake, politike dhe diplomatike. Asokohe, ekzistonin rreth 130 principata të dinastisë Zhou, emrat e të cilave janë shënuar në librat historiografike kineze. Ndër to, 10 e ca ishin relativisht të fuqishme, por secili prej tyre kujdesej vetëm për çështjet e veta, kurse të voglat dhe të dobëtat e kishin të vështirë vetëmbrojtjen përballë sulmeve të pakicave kombëtare, siç ishin kombësitë Rong, Di, Yi e të tjera, të cilat orvateshin gjithmonë të sulmonin shtetet e fushave qendrore. Në ato rrethana, Çi Huangong hodhi parullën "Respektoni mbretin e dinastisë Zhou, u rezistoni sulmeve nga jashtë", gjë që fitoi simpatinë e oborrit mbretëror të dinastisë Zhou dhe u përkrah nga principatat e tjera.

Gjatë 42 vjetëve të jetës së tij politike në fronin e monarkut të shtetit Çi, Çi Huangong organizoi shumë herë takimet e monarkëve të principatave. Duke bërë përpjekjet për të vendosur hegjemoni, ai ishte për vendosjen e marrëdhënieve të mira midis principatave, për pakësimin e luftërave dhe për rezistencën e përbashkët kundër trazirave nga jashtë, gjë që ishte e dobishme për zhvillimin e ekonomisë dhe kulturës dhe për stabizilin e jetesës së popullit. (Zheng)