Vitet e fundit, qeveria kineze ka shtuar gradualisht investimet në fshat dhe si rezultat të ardhurat e fshatarëve janë shtuar dukshëm. Por në shumë krahina fshatarët kanë hasur një vështirësi të re në grumbullimin e fondeve kur dëshirojnë të zgjerojnë vëllimin e prodhimit ose kur sulmohen nga fatkeqësitë e natyrës.

Në provincën Hainan në skajin jugor të Kinës, numri i fshatarëve përbën 60% të popullsisë së përgjithshme të saj. Vitet e fundit, me zhvillimin e peshkimit në ujra të thella, peshkatarët dëshirojnë t'i zëvendësojnë anijet e vjetra prej druri që nuk u rezistojnë dallgëve dhe shtrengatave të fuqishme, me anije më të forta prej çeliku. Por një anije e tillë me tonazh100 tonë kushton 2 milionë juanë, kjo është padyshim një shifër astronomike për peshkatarët e thjeshtë. Peshkatari Lin Mingfang shprehu shqetësimin e tyre. Ai tha:

"Të gjithë ne duam të blejmë anije të madhe, por s'kemi para."

Vështirësia e peshkatarit Lin Mingfang ka zbuluar problemet e sistemit financiar të fshatit kinez. Bankat tregtare të Kinës nuk duan t'u japin kredi fshatarëve dhe objekteve të fshatit, ndërsa Shoqëria e sigurimeve u orfon atyre shumë pak lloje sigurimesh. Lidhur me shkaqet e këtyre dukurive, shefi i seksionit të studimit të ekonomisë fshatare të Qendrës së studimit e të zhvillimit pranë Këshillit të Shtetit të Kinës z. Han Jun tha kështu:

"Shkaku kryesor është se koha e marrjes së fitimeve nga investime të tilla është e gjatë, fitimet janë të pakta, por rreziku është i madh dhe kostoja është e lartë, ndaj bankat nuk kanë interes të madh në kreditë bujqësore. Edhe sigurimet bujqësore në Kinë nuk janë zhvilluar shpejt."

Prapambetja e sistemit financiar të fshatit tashmë ka tërhequr vëmendjen e madhe të qeverisë kineze. Kryeministri kinez Wen Jiabao vuri në dukje në planin e zhvillimit ekonomik dhe shoqëror kinez për këtë vit se do të thellohet më tej reforma financiare dhe do të përsoset sistemi financiar i fshatit. Kjo tregon se qeveria kineze ka kuptuar se krahas shtimit të investimeve për bujqësinë, duhet të zgjerohen kanalet e grumbullimit të fondeve për të ndihmuar fshatarët të zgjerojnë vëllimin e prodhimit, të përballojnë fatkeqësitë e natyrës dhe të ngrenë nivelin e jetesës. Nënkryetari i Komitetit të Përhershëm të Asamblesë Kombëtare Popullore të Kinës z. Cheng Siwei u shpreh se mbështetja financiare është shumë e rëndësishme për zhvillimin e fshatit kinez. Ai tha:

"Zhvillimi i bujqësisë varet nga kapitali, krahët e punës dhe faktorë kompleksë. Tani në fshat nuk mungojnë krahët e punës, por mungon kapitali. Prandaj problemi më i madh aktual është që fshatarët të kenë para, kjo kërkon që palët përkatëse financiare të bashkëpunojnë për të përkrahur zhvillimin e fshatit."

Specialistët përkatës shprehën mendimin se dhënia e kredisë fshatarëve nga bankat e politikave është tani për tani një nga masat më të mira për zgjerimin e kanaleve të grumbullimit të fondeve të fshatarëve, sepse bankat e politikave janë krijuar nga qeveria, fondet e tyre kanë ardhur nga buxheti shtetëror, dhe qëllimi i tyre i bizneseve nuk është vetëm për të marrë fitime, ndaj ato janë më të përshtatshme të ngarkohen me detyrën e përmirësimit të shërbimeve financiare të fshatit. Tani, Banka Shtetërore e Zhvillimit të Kinës, një nga 3 bankat e politikave të Kinës, po provon t'u ofrojë fshatarëve shërbimet e kredisë. Drejtori i kësaj banke z. Chen Yuan i tha korrespondentit se për të pakësuar rrezikun e kredisë dhe koston e shqyrtimit, kjo bankë ka krijuar në bashkëpunim me administratat qeveritare vendore e shumë shoqata të besimit, të cilat vlerësojnë shkallën e besimit dhe aftësinë e shlyerjes të kredimarrësve dhe pas shqyrtimit prej tyre banka u jep kredi.

Në të njëjtën kohë, qeveria po transformon kooperativën e kredisë të fshatit. Kooperativa e kredisë e fshatit është organi financiar kooperativ i krijuar dikur në sistemin e ekonomisë së planifikuar të Kinës, detyra e saj është t'u japë fshatarëve mbështetjen financiare për prodhimin dhe jetën. Por vitet e fundit këto kooperativa nuk janë zhvilluar dhe administruar si duhet, dhe kanë shumë hua me rrezik. Për këtë qeveria vendosi t'i kthejë ato gradualisht në banka tregtare të fshatit, ku zbatohen sistemi i ri administrativ dhe koncepti i ri për të ngritur efikasitetin e biznesit. Tani në Kinë janë formuar 72 banka të tilla dhe 9 të tjera janë në formim e sipër. Gjatë vizitës, korrespondenti mësoi se këto banka tregtare fshatare po luajnë rolin e tyre në zhvillimin e bujqësisë. Drejtori i Bankës Tregtare të Fshatit të Pekinit z. Jin Weihong tha:

"Tani kredia që ka dhënë banka jonë për zhvillimin e fshatit zë 67% të kredisë së përgjithshme, mund të themi se pjesa më e madhe e kredisë përdoret në zhvillimin e fshatit."

Krahas zgjidhjes së vështirësisë së fshatarëve për të marrë kredi, janë zhvilluar edhe sigurimet bujqësore në Kinë. Në janar të vitit 2005, në provincën Heilongjiang të Kinës veri-lindore u krijua Shoqëria e parë e sigurimeve bujqësore e Kinës, Shoqëria e sigurimeve bujqësore Yangguang. Familjet fshatare paguajnë 65% të shumës së sigurimeve, ndërsa pjesën tjetër e paguajnë administrata qeveritare dhe sektori bujqësor i provincës. Në vitin 2005, kjo shoqëri e sigurimeve siguroi mbi 150 hektarë tokë të mbjella me kultura bujqësore dhe të ardhurat nga sigurimet arritën në 200 milionë juanë. Drejtori i Shoqërisë së sigurimeve Yangguan z. Sun Zhenjun i tha korrespondentit se në qershor të vitit të kaluar kur ndodhën fatkeqësitë e ngricës në disa krahina të provincës Heilongjiang duke dëmtuar dhjetra mijë hektarë tokë të punueshme, Shoqëria e sigurimeve pagoi në kohë dëmshpërblimet dhe kështu fshatarët rifilluan prodhimin.

"Për një fatkeqësi të ngricave që preku një sipërfaqe prej 2,8 hektarësh paguam 1 milion e 800 mijë juanë, fshatarët arritën të rifillojnë menjëherë prodhimin dhe siguruan korrje të bollshme, duke treguar rolin e madh të sigurimeve bujqësore."

Specialistët shprehën mendimin se ka shumë për të bërë në forcimin e sistemit financiar të fshatit kinez. Duke folur se ç'është sistemi relativisht i përsosur financiar i fshatit, shefi i seksionit të studimit të ekonomisë fshatare të Qendrës së studimit të zhvillimit pranë Këshillit të Shtetit z. Han Jun tha:

"Sistemi financiar i fshatit duhet t'u japë kredi sa më shumë fshatarëve, të investojë sa më shumë fonde në fshat, depozitat e fshatarëve duhet t'u jepen atyre si kredi dhe të zhvillohen mirë sigurimet bujqësore. Ja ky është një sistem relativisht i përsosur financiar i fshatit ." ( Pina)