dëgjoni

Në këtë program do t'ju flas për veglën muzikore frymore suona të përhapur gjerësisht në gjirin e popullit kinez. Poe së pari ju ftoj të dëgjoni melodinë tradicionale kineze me titull "Mbledhja e të gjithë anëtarëve të familjes", të interpretuar me suona.

Melodia që po dëgjoni titullohet "Mbledhja e të gjithë anëtarëve të familjes". Kjo melodi e hareshme përshkruan ndjenjat e gëzueshme të kinezëve kur mblidhen së bashku të gjithë anëtarët e familjes në ditët e festave tradicionale.

Suona është një vegël muzikore tradicionale popullore kineze që përdoret gjerësisht në aktivitetet artistike popullore dhe në operat lokale, por kjo vegël muzikore që ka një jetë 700 vjeçare në Kinë, nuk është një vegël muzikore origjinale kineze. Ajo e ka prejardhjen nga Persia e lashtë dhe zona arabe. Edhe emri i veglës suona është marrë nga gjuha e lashtë persiane. Pas përhapjes në zonat veriore të Kinës në shekullin e 13-të, suona është bërë një nga veglat muzikore të pazëvendëshueshme popullore kineze.

Melodia që po dëgjoni titullohet "Melodia e operës lokale të provincës Hebei". Ajo është e përhapur gjerësisht në veri të Kinës dhe pasqyron karakterin e çiltër dhe zemërgjerë të banorëve të atjeshëm. Vegla muzikore suona me forcën e saj të madhe shprehëse, është e përshtatshme për të pëshkruar atmosferën entuziaste plot hare dhe skenat madhështore. Sidomos në meloditë e gjalla dhe me forcë të madhe kjo vegël muzikore shpreh më mirë ndjenjat e brendshme të njerëzve. Edhe pakicat kombëtare të Kinës, si ato ujgure, tibetiane, mongole, koreane, li, miao etj. kanë suonat e veta.

Me suona interpretohen më shumë këngët popullore, operat lokale etj. me karakter të theksuar popullor. P.sh. melodia klasike e interpretuar me suona . "Këndojnë 100 zogjtë" fitoimedaljen e argjendtë të muzikës popullore në festivalin e 4-të botëror të të rinjve në vitet '50 të shekullit të kaluar. Le të dëgjojmë së bashku melodinë "Këndojnë 100 zogjtë". Kjo melodi popullore, që është e përhapur në zonat veriore të Kinës, përshkruan me ritmet e saj entuziaste dhe të hareshme peizazhin natyror plot gjallëri, duke imituar cicërimat e zogjve.

Në fund të programit, të dashur dëgjues, ju ftoj të dëgjoni melodinë me titull "Korrje të bollshme", të interpretuar me suona. Kjo melodi entuziaste pasqyron ndjenjat e gëzueshme të njerëzve që kanë marrë korrje të bollshme. (Pina)