Tani ekonomia kineze ndodhet në periudhën e zhvillimit të qëndrueshëm dhe relativisht të shpejtë. Nga të dhënat statistikore më të reja del se rritja e vëllimit të prodhimit të përgjithshëm të Kinës në tremujorin e parë të këtij viti ishte mbi 10% më e lartë se e njëjta periudhë e vitit të kaluar. Në kohën kur ekonomia po rritet me shpejtësi, po ndodhin ndryshime shumë të mëdha në pamjen e qyteteve dhe fshatrave kineze, ku ngrihen njëra pas tjetrës ndërtesa të reja. Në të njëjtën kohë, për të realizuar zhvillimin përpjesëtimor të ndërtimit të qytetit dhe fshatit me mjedisin dhe për të kursyer burimet natyrore dhe energjinë, në Kinë po zhvillohet me të gjitha forcat sektori i ndërtesave të gjelbra të kursimit të energjisë. Në nënrubrikën e sotme "Ekonomia kineze" do t'ju flas për punën në këtë drejtim.

Tani në qytetet dhe fshatrat e Kinës çdo vit përurohen 1 miliard e 500 milionë deri në 2 miliardë metra katrorë ndërtesa të reja, dhe parashikohet se deri në vitin 2020, në Kinë do të shtohen 30 miliardë metra katrorë ndërtesa të reja. Si sasia e ndërtesave, ashtu edhe shpejtësia e ndërtimit janë të rralla në historinë e zhvillimit botëror të. Në rast se do të vazhdojë gjendja e tanishme e harxhimit të energjisë për ndërtesat, deri në vitin 2020 sasia e energjisë së harxhuar nga sektori i ndërtimit do të zërë 50% të sasisë së përgjithshme të harxhimit të energjisë të gjithë shoqërisë.

Për të realizuar zhvillimin përpjesëtimor të ndërtimit të qytetit dhe fshatit me mjedisin, qeveria kineze ka bërë përpjekje për të nxitur ndërtimin e ndërtesave të gjelbra, Ndërtesë e gjelbër quhet ndërtesa që u ofron njerëzve një hapësirë të shëndetshme, të këndshme dhe të sigurrt banimi, pune dhe për aktivitete, që shfrytëzon njëkohësisht me efikasitet të lartë burimet dhe që ushtron ndikim minimal mbi mjedisin. Në ngritjen e ndërtesave të tilla përdoren më shumë materialet e ndërtimit që transportohen me krahë dhe me automjete të vogla, për të pakësuar harxhimin e energjisë gjatë hallkave të transportimit. Në të njëjtën kohë brenda ndërtesave përdoren hinkat e dushit dhe rezervuarët e vegjël në tualet, e ndërsa jashtë instalohen pajisjet e shfrytëzimit të energjisë diellore dhe të grumbullimit të ujërave të shiut etj. për të kursyer burimet natyrore. Kohët e fundit ministri i Ndërtimit i Kinës z. Wang Guangtao u shpreh se ngritja e ndërtesave të kursimit të energjisë dhe transformimi i ndërtesave ekzistuese janë përfshirë në planin e zhvillimit të ardhshëm të Kinës. Ai tha:

"Ngritja e ndërtesave të gjelbra të kursimit të energjisë është një nga përmbajtjet kryesore të ndërtimit të qyteteve të parashtruara në "Planin shtetëror të zhvillimit afatgjatë dhe afatmesëm të shkencës dhe teknikës". Parashikohet se deri në vitin 2020, në Kinë do të kursehen në vit 420 miliardë kilovat-orë energji elektrike dhe 260 milionë tonë qymyrgur standard, si dhe do të pakësohen 846 milionë tonë gaz karbonik dhe gazra të tjera të serrës."

Për të nxitur zhvillimin e ndërtesave të gjelbra, qeveria kineze ka hartuar dhe publikuar shumë standarde të kursimit të energjisë dhe në 19 provinca, rajone autonome të kombësive dhe qytete të varura direjtpërdrejt nga qendra janë ndërtuar 5 milionë metra katrorë ndërtesa të kursimit të energjisë si objekte model.

Sipas të dhënave statistikore, nga 40 miliardë metra katrore ndërtesa ekzistuese tani në Kinë, mbi 13 miliardë metra katrorë duhet të transformohen për kursimin e energjisë, duke krijuar kështu një treg të madh prej 2,6 trilionë juanësh. Ky shans i madh tregtar ka tërhequr shumë ndërmarrje të përfshihen në studimin e teknologjisë dhe prodhimin e produkteve të ndërtesave të gjelbra. Në një ekspozitë të produkteve të ndërtesave të gjelbra të organizuar pak kohë më parë në Pekin, ndihmësi i drejtorit të përgjithshëm të Kompanisë së xhamit me përgjegjësi të kufizuar "Luqiang" të Pekinit z. Vu Shutian i tha korrespondentit se xhami veçues i nxehtësisë i prodhuar nga kompania e tij e kursen dukshëm energjinë. Ai tha:

"Ky xham veçues mund të përdoret si mur, derë, dritare etj. në të gjitha zonat e botës me klimë të ndryshme."

Z. Vu tha se ky xham mund të ndalojë në mënyrë efikase humbjen e nxehtësisë, duke pakësuar kështu harxhimin e energjisë elektrike të kondicionerëve dhe radiatorëve, dhe pjesët e këmbimit të këtij produkti mund të ripërdoren, duke ushtruar kështu ndikim të vogël mbi mjedisin. Deri tani mbi 100 milionë metra katrorë xham i tillë janë përdorur në ndërtesa të mëdha dhe të njohura të botës.

E ardhmja e zhvillimit të tregut të ndërtesave të gjelbra të Kinës ka tërhequr edhe biznesmenë të kësaj fushe nga bota. Drejtori i përgjithsëm i Kompanisë së kontrollit të ndriçimit "Delmatic", një kompani e njohur e teknologjisë së kursimit të energjisë, z. Stephen Woodnutt, i tha korrespondentit:

"Tregu i ndërtesave të gjelbra i Kinës ka forcë të madhe tërheqëse për ne, sistemi ynë i ndriçimit mund të përdoret gjerësisht në ndërtesat shterërore, tregtare dhe private. Ky sistem mund të instalohet jo vetëm në ndërtesat e reja, por edhe në ndërtesat e vjetra që transformohen."

Kina zhvillon aktivisht edhe bashkëpunim ndërkombëtar në nxitjen e ndërtesave të gjelbra të kursimit të energjisë dhe mëson nga teknologjia dhe përvoja e përparuar ndërkombëtare. Tani ka filluar objekti i transformimit të ndërtesave ekzistuese kineze për kursimin e energjisë në qytetin Tangshan të provincës Hëbei të Kinës, i mbështetur nga qeveria gjermane me 5 milionë euro. Nëpërmjet transformimit të mureve, dritareve dhe çative etj. të strukturës rrethuese të ndërtesave si dhe transformimit të sistemit të ngrohjes së tyre do të ngrihet efektiviteti i kursimit të energjisë i ndërtesave. Kohët e fundit Ministria e Ndërtimit e Kinës nënshkroi me Kompaninë e Përbashkët të Teknologjisë të SHBA-së një marrëveshje bashkëpunimi, për të studiuar dhe zhvilluar së bashku teknologjinë e ndërtesave të gjelbra dhe për të përhapur përvojën përkatëse të kursimit të energjisë. Ne jemi të besimit se nëpërmjet përpjekjeve të përbashkëta të qeverive, të qarqeve sipërmarrëse dhe të qarqeve tekniko-shkencore, puna e kursimit të energjisë në ndërtesa në Kinë do të arrijë përparime më të mëdha. ( Pina )