5 qershori është "Ditë botërore e mjedisit". Po atë ditë, qeveria kineze publikoi librin e bardhë mbi "Mbrojtjen e mjedisit të Kinës nga viti 1996 deri në vitin 2005". Në këtë libër thuhet se tani, prirja e ndotjes së mjedisit dhe e shkatërrimit ekologjik të Kinës filloi të zbutet.

Ky libër që publikua po atë ditë, nga zyra informative e Këshillit të Shtetit të Kinës, është libri i 2-të i bardhë i publikuar gjatë 10 vjetëve të fundit lidhur me problemin e mbrojtjes së mjedisit. Teksti i plotë ka mbi 16 mijë hieroglife dhe ndahet në 12 pjesë, si parandalimi i ndotjes industriale, bashkëpunimi ndërkombëtar për mbrojtjen e mjedisit etj. Në një konferencë shtypi që u organizua më 5 qershor, në Pekin, zv/drejtori i Drejtorisë së përgjithshme shtetërore për mbrojtjen e mjedisit të Kinës Zhu Guangyao i njohu gazetarët kinezë dhe të huaj me përmbajtjen konkrete të librit të bardhë.

Qysh nga fillimi i viteve 70 të shekullit të 20-të, krahas zhvillimit të shpejtë dhe të vazhdueshëm të ekonomisë kineze, kontradikta midis zhvillimit dhe mjedisit ka dalë në pah nga dita në ditë. Mungesa e burimeve, prishja e mjedisit ekologjik etj. janë bërë probleme të rëndësishme në zhvillimin e Kinës. Gjatë 10 vjetëve të kaluar, qeveria kineze i ka kushtuar rëndësi shumë të madhe punës për mbrojtjen e mjedisit dhe e ka përcaktuar mbrojtjen e mjedisit si një politikë bazë shtetërore, duke marrë një sërë masash për forcimin e mbrojtjes së mjedisit. Zhu Guangyao tha se 10 vjetët e fundit ishin periudha me investimet më të mëdha të Kinës në mbrojtjen e mjedisit.

"Gjatë 10 vjetëve të fundit, investimet në mbrojtjen e mjedisit me parandalimin e ndotjes së mjedisit si përbërës kryesor, janë shtuar nga viti në vit. Investimet e vitit të kaluar në këtë fushë arritën në 238 miliardë e 800 milionë juanë, duke zënë 1,31% të vëllimit të prodhimit të përgjithshëm të vendit. Përsa i përket Kinës, kjo përqindje nuk ishte e lehtë".

Ai tha, gjithashtu, se vitet e fundit, prirja e ndotjes së mjedisit dhe e shkatërrimit ekologjik të Kinës filloi të zbutet, sasia e shkarkimit të ndotjeve industriale është ulur në mënyrë të dukshme dhe mjedisi ekologjik i disa krahinave filloi të përmirësohet.

Përveç këtyre, Kina ka nënshkruar mbi 50 marrëveshje ndërkombëtare për mbrojtjen e mjedisit, si "Projekt-konventa e OKB-së për ndryshimin e klimës", "Protokoli i Kiotos" etj, duke zbatuar aktivisht kërkesat e rregulloreve të këtyre marrëveshjeve.

Në këtë libër vihet, gjithashtu, në dukje se qeveria dhe populli kinez kanë bërë përpjekje shumë të mëdha për mbrojtjen e mjedisit. Për shkak se Kina ndodhet në fazën e zhvillimit të shpejtë të industrializimit dhe të urbanizimit dhe në periudhën kur kontradikta midis rritjes ekonomike dhe mbrojtjes së mjedisit është bërë shumë e dukshme, gjendja e mjedisit mbetet ende shumë serioze. Duke folur për këtë, zv/drejtori i Drejtorisë së përgjithshme shtetërore të mbrojtjes së mjedisit të Kinës Zhu Guangyao tha: "Ne jemi të mendimit se gjendja e tanishme e mjedisit të përgjithshëm është ende shumë serioze. Në shumë zona, problemi i vjetër i mjedisit nuk është zgjidhur, por një problem i ri i mjedisit ka dalë përsëri. Mund të thuhet se problemi i ndotjeve të ujit, ajrit dhe tokës në vendin tonë është shumë i dukshëm".

Në këtë libër thuhet se për këtë problem të dukshëm, Kina ka parashtruar qartë objektivin kryesor të mbrojtjes së mjedisit gjatë 5 vjetëve të ardhshëm. Si një vend i madh në zhvillim, zgjidhja si duhet e problemit të mjedisit përputhet me objektivin e zhvillimit të Kinës. (Sihai)