dëgjoni

Me rastin e 1 Qershorit, Ditës Ndërkombëtare të Fëmijëve, institucionet përkatëse të vendeve të ndryshme do të organizojnë veprimtari të shumëllojshme për fëmijët, si mbrëmje artistike me këngë e valle fëmijësh, koncerte muzikore ku interpretojnë fëmijë në vegla të ndryshme muzikore kombëtare e evropiane, takime të fëmijëve së bashku me prindërit e tyre nëpër parqe e pallate, ekspozita mbi edukimin e fëmijëve, ndeshje e gara sportive fëmijësh dhe ekskursione të fëmijëve në fshat dhe në zonat malore etj. Edhe shfaqja e filmave për fëmijë në kinema dhe në televizion është një pjesë e rëndësishme e këtyre veprimtarive.

Edhe qeveria kineze i ka kushtuar një rëndësi të madhe edukimit të fëmijëve me filma dhe vepra të tjera artistike

Në Televizionin Qendror të Kinës ka një kanal të posaçëm për fëmijë, ku shfaqen shpesh filma të rinj dhe të vjetër kinezë dhe të huaj për fëmijë.

Në Kinë janë krijuar një numër filmash shumë të mirëpritur edukativë për fëmijë, si "Ylli i kuq i ndritur", "Ushtari Zhangga" etj.

Edhe në Shqipëri në të shkuarën janë xhiruar një numër filmash shumë të mirëpritur edukativë për fëmijë, si "Mëngjese lufte", "Guximtarët", "Beni ecën vetë" etj. Edhe këta filma shqiptarë për fëmijë u kanë lënë mbresa të thella shikuesve kinezë, sidomos fëmijëve të asokohshëm.

Filmi për fëmijë "Beni ecën vetë" është filmi që ka fituar çmimin e parë në Festivalin e parë të kinematografisë shqiptare.

Duke folur rreth asaj se përse e nisi dhe përse e shkroi skenarin e këtij filmi, autori i skenarit të filmit " Beni ecën vetë", z. Kiço Blushi, tha:..1.. "Është një nxitje instiktive, pse në atë kohë fëmijët filluan të bënin një jetë ndryshe nga fëmijët e së kaluarës, kishin filluar të mbylleshin në apartamente dhe nuk kishin marrëdhënie shumë të forta me natyrën, me shoqërinë. Fëmijët në atë kohë mund t'i quaje zogj apartamentesh, që rriteshin në inkubator".

Për të shkrimi i një skenari për fëmijë nuk ishte një gjë e vështirë, sepse shumica e episodeve të filmit janë nga kujtimet e fëmijërisë së tij.

"Kjo temë tani është bërë akoma më e rëndësishme dhe më e ndjeshme jo vetëm në Shqipëri, por dhe në botë, sepse vërej që fëmijët tani nuk rriten më në rrugë, nuk kanë marrëdhënie me rrugën, domethënë me natyrën, por janë gjithnjë e më të izoluar dhe më të mbyllur, gjë që e dëmton rritjen e fëmijëve dhe të njeriut në mënyrë të shëndetshme. Kjo temë më bëri pastaj që të shkruaj pas skenarit një roman". "Edhe filozofët kinezë e kanë thënë që një njeri që nuk rritet i lirë në fëmijëri, nukmund të jetë i lirë kur të rritet. Pra tema e 'Beni ecën vetë' është që njeriu duhet të rritet në marrëdhënie të lirë me natyrën, me njerëzit".

Kiçoja u tregoi gazetarëve se në kohën e fëmijërisë së tij, ai shkonte shpesh në fshat te gjyshi. Gjatë jetës në fshat, ai ka përfituar shumë dhe është kalitur e është bërë më i shëndetshëm.

Edhe filmi shqiptar për fëmijë "Guximtarët" është një film i mirëpritur në Shqipëri dhe në Kinë.

Në një artikull të faqes së internetit "Shqipëria.com" shkruhet: " Në filmin " Guximtarët " rolin e "qulacit" një fjal i vogël që ishte aq dobët n fiskulturë , sa nuk kalonte dot as kalucin e luan Artanb Santo. Por në fund të filmit, falë përpjekjeve të mëdha të tij, djali i vogël e kalon kaluçin. E njëjta gjë ndodhi edhe në jetë me Artan Santon, djalin e vogël që u bë i madh, i cili tashmë ka arritur të kalojë me sukses "kaluçin e jetës". Ai është aksioner dhe drejtor i përgjithshëm i "Credins Bank", e para bankë e themeluar me kapital 100 për qind shqiptar.

Që i vogël Artani kishte dëshirë të bëhej mjek, jurist ose arkitekt. Por ishte ekonomia ajo që do ta ndiqte për tërë jetën, e cila, edhe pse kundër dëshirës së tij, do të bëhej një pjesë e madhe dhe e pandarë e suksesit të tij.

Gjatë intervistës me gazetaren e RJK-së, Drejtori i përgjithshëm i "Credins Bank" Artan Santo tha:...3...

"Në film, ishte roli i një personazhi qullaci, që ishte shumë mirë me mësime, por në fizkulturë kishte nota negative. Por edhe në jetë unë isha djali i vetëm në shtëpi, as motra as vëlla, isha i vetëm, isha shumë mirë me mësime, por nuk e kisha qejf fizkulturën, kështu si filmi dhe jeta shkuan shumë mirë së bashku... Kështu që mbas disa muajsh përzgjedhjesh më thanë që unë do të kem rolin kryesor në filmin 'Guximtarët'.

Ndihem mirë sepse jo vetëm atëherë bëra emër, por edhe sot njerëzit e brezit tonë, ose tani që transmetohen filmat e vjetër shqiptarë, thonë që 'Ja pra, ai që ishte qullac, u bë guximtar dhe tashti drejton në një nga bankat më me emër në Shqipëri".

Pra, filmat për fëmijë kanë luajtur një rol të rëndësishëm për edukimin dhe rritjen e fëmijëve.

Filmat e mirëpritur kinezë dhe shqiptarë për fëmijë do të mbetën gjithmonë në kujtesën e njerëzve dhe shpresojmë se edhe në të ardhmen do të krijohen më shumë filma të bukur dhe edukativë për fëmijë.(Zhai)