Sipas njoftimit të faqes së internetit të Televizionit Qendror të Kinës, me rastin e l Qershorit, Ditës Ndërkombëtare të Fëmijëve, të gjitha institucionet publike kulturore do të hapen në mënyrë të privilegjuar për fëmijët.

Gjatë kësaj dite, muze të ndryshme publike, ekspozita, pallate të arteve figurative, pallate tekniko- shkencore dhe institucione të tjera kulturore publike do të hapen falas ose me çmim të privilegjuar për të vegjlit. Kjo është kërkuar në "Qarkoren e përbashkët me rastin e 1 Qershorit, Ditës Ndërkombëtare të Fëmijëve për vitin 2006", të lëshuar bashkërisht nga l7 sektorë përkatës, si Drejtoria propagandistike e KQ të PK të Kinës, Federata pankineze e bashkimit të grave, Bashkimi Qendror i Rinisë, Ministria e Arsimit e Kinës, Shoqata e shkencave e Kinës etj.

Në qarkore thuhet se drejtoritë propagandistike, Bashkimet e grave, Bashkimet e Rinisë Komuniste, shoqatat shkencore të varura nga provincat, rajonet autonome dhe qytetet e varura drejtpërdrejt nga qendra duhet të organizojnë si duhet aktivitetet për festën ndërkombëtare të fëmijëve. Ata duhet të kryejnë punë konkrete për fëmijët e familjeve të varfra, të familjeve me një prind, të familjeve të punëtorëve që kanë dalë nga puna etj, të zgjidhin problemet e tyre, të tregojnë një kujdes të veçantë për fëmijët e punëtorëve që kanë shkuar në qytete, fëmijët e mbetur në fshat, fëmijët me të meta fizike, të zgjidhin problemet e tyre të dala gjatë shkollimit, në sigurimin publik, në shëndetësi dhe në jetën kultutore.

Siç mësohet, gjatë ditëve të festës së fëmijëve, Komisioni i Këshillit të Shtetit të Kinës për çështjet e grave dhe fëmijëve dhe Komiteti Qendror i Bashkimit të Rinisë do të organizojnë edhe një mbrëmje madhështore artistike me temën " Ëndrra për të ardhmen". Sektorët e kulturës do të organizojnë paraqitjen dhe përhapjen e një numri këngësh të njohura për fëmijë. Federata pankineze e Bashkimit të Grave do të dërgojë edhe ekipe për të vizituar fëmijët e mbetur në fshat dhe fëmijët e zonave të varfra, si dhe do të organizojë edhe ceremoninë e nisjes së aktiviteteve seriale të pritjes së Lojërave Olimpike nga fëmijët e mbarë vendit me titull: "Pritja me gëzim e Lojërave Olimpike të vitit 2008 dhe fluturimi i ëndrrave " etj. ( Zhai)