dëgjoni

Zheng Quan është i vetmi kinez që ka marrë titullin e "Mjeshtrit ndërkombëtar të prodhimit të violinave" nga Shoqata Ndërkombëtare e Prodhimit të Violinave. Në vitet '80 të shekullit të kaluar, Zheng Quan krijoi shkollën kineze të prodhimit të violinave duke arritur rezultate të mëdha në këtë fushë.

Zheng Quan lindi në vitin 1950 në Shangai në një familje intelektualësh. Qysh në moshë të re, Zheng Quan filloi të mësojë t'i bjerë violinës. Në vitet '70 të shekullit të kaluar, ai u pranua në një ansambël të provincës Anhui dhe u bë violinist. Zheng Quan ishte shumë i aftë për të krijuar objekte të ndryshme dhe prodhonte shpesh materiale skenike. Gradualisht ai nisi të tregojë interes të madh për prodhimin e violinave. Zheng Quan tha:

"Kam interes të madh për prodhimin e violinave dhe kam kushte të mira për prodhim. Jam violinist dhe mund t'i zotëroj mirë marrëdhëniet midis violinës dhe tingujve."

Në vitin 1978, Zheng Quan hyri në Institutin e Studimeve të Veglave Muzikore të Pekinit për të studiuar dhe kjo ishte një pikë kthese për pasionin e tij. Pas dy vjetëve, Zheng Quanit i propozuan të studionte në Universitetitn Qendror të Muzikës të Kinës. Pas diplomimit ai nisi punën në studion e prodhimit të violinave të këtij universiteti.

Pas fillimit të punës, Zheng Quan shkoi në shumë qytete të mëdha si Shangai, Guangzhou etj. për të mësuar mjeshtërinë e prodhimit të violinave nga mjeshtër të famshëm. Nëpërmjet mësimit të zellshëm, cilësia e violinave të prodhuara nga Zheng Quani u ngrit shumë. Për të rritur më tej nivelin e vet, në vitin 1983, Zheng Quan shkoi për të studiuar në shkollën ndërkombëtare të prodhimit të violinave të Italisë në Kremona.

Gjatë 4 vjetëve në Itali, përveç gjumit, Zheng Quan e harxhonte pothuajse tërë pjesën tjetër të ditës duke studiuar. Përpjekjet e tij patën rezultate të dukshme. Në vitin 1987, Zheng Quan fitoi çmimin e artë të Konkursit të parë kombëtar të prodhimit të violinave të Italisë dhe filloi të tërheqë vëmendjen e qarqeve ndërkombëtare muzikore dhe të prodhimit të violinave. Shumë violina të prodhuara nga Zheng Quani u përdorën nga muzikantë të famshëm botërorë dhe u mblodhën nga shkolla e Kremonës dhe Muzeumi Shtetëror i Bullgarisë. Për shkak të rezultateve të arritura në fushën e prodhimit të violinave, Shoqata Ndërkombëtare e Prodhimit të Violinave i dha Zheng Quanit titullin e "Mjeshtrit ndërkombëtar të prodhimit të violinave".

Megjithëse talenti i Zheng Quanit tërhoqi vëmendjen e qarqeve ndërkombëtare të prodhimit të violinave, në atë kohë, niveli i përgjithshëm kinez i prodhimit të violinave nuk ishte shumë i lartë. Në vitin 1988, Zheng Quan vendosi të kthehet në atdhe për të krijuar shkollën kineze të prodhimit të violinave. Ai tha:

"Niveli i interpretimit në violinë nga kinezët është ngritur pandërprerë, por niveli i prodhimit të veglave muzikore nuk është zhvilluar shumë shpejt. Për të ngritur nivelin e prodhimit, pas kthimit në atdhe, krijova në Universitetin Qendror të Muzikës qendrën studimore të prodhimit të violinave. Shpresoj se kjo qendër do të përgatisë më shumë talente kineze të prodhimit të violinave."

Në vitin 1989, Zheng Quan pranoi studentët e parë në prodhimin e violinave. Zheng Quan u mëson studentëve teorinë dhe mjeshtërinë e përparuar botërore të prodhimit të violinave, si rezultat, niveli i studentëve është ngritur shumë shpejt. Në konkursin ndërkombëtar të prodhimit të violinave të zhvilluar në vitin 2003 në Itali, ndër 20 fituesit e çmimit 7 ishin studentë të Zheng Quanit.

Zheng Quani nxit aktivisht përhapjen e njohurive të prodhimit të violinave dhe shkëmbimet midis Kinës dhe qarqeve ndërkombëtare të prodhimit të violinave. Në vitin 2002, Zheng Quan zhvilloi në Shangai ekspozitën e parë të veprave të mjeshtërve të prodhimit të violinave të Kinës. Njëkohësisht ai ka organizuar në shumë qytete seminare lidhur me prodhimin e violinave. Ai tha:

"Për të prodhuar një violinë të mirë, një mjeshtër duhet të bëjë përpjekje të palodhshme. Njëkohësisht prodhimi i violinave është një lloj arti ku nevojiten shumë njohuri përkatëse."

Tani niveli i prodhimit të violinave në Kinë është ngritur shumë shpejt. Zheng Quan shpreh shpresën se në të ardhmen, Kina do të krijojë stilin e vet të veçantë në fushën e prodhimit të violinave. (Fani)