Wang Junxia është një atlete e njohur kineze dhe quhet "Sorkadhja e Lindjes".

Wang Junxia ka lindur në vitin 1979 në provincën Liaoning të Kinës verilindore. Për shkak që familja e saj ndodhej në vështirësi ekonomike, Wang Junxia-s iu desh të punonte shumë që në moshë të re. Në vitin 1988, ajo hyri në shkollën sportive të qytetit Dalian, duke filluar stërvitjen në vrapimet e distancave të gjata. Në vitin 1991, Wang Junxia hyri në ekipin e atletikës të provincës Liaoning, ku stërvitej nën drejtimin e trajnerit të njohur kinez Ma Junren. Pas stërvitjes së rreptë sistematike, cilësitë fizike dhe niveli i saj taktik u rritën mjaft, duke formuar një stil të posaçëm sportiv. Me taktikën e re, rezultatet e Wang Junxia-s u përmirësuan shumë dhe në vitin 1992, në kampionatin botëror të atletikës për të rinj, Wang Junxia mori titullin kampione në vrapimin me 10000 metra.

4 prilli ishte një ditë e mirë për Wang Junxianë, pasi ajo u shpall kampione në maratonë në Spartakiadën e 7-të Kombëtare të Kinës, duke vendosur një rekord të ri aziatik.

Asaj i dukej se ky do të ishte një vit i mbarë, por më pas vëllai i saj vdiq në një aksident. Për shkak që do të bënte përgatitje për kampionatin botëror të maratonës, Wang Junxia nuk kthehej në shtëpi dhe stërvitej në ekip. Duke marrë parasysh se Wang Junxia e donte shumë të vëllanë, prindërit i telefonuan trajnerit të saj, duke i thënë: "Mos i trego asaj për vdekjen e të vëllait, përndryshe ajo nuk do të përqendrohet në stërvitje!" Para nisjes për në kampionat, Wang Junxia i telefonoi familjes dhe prindërit e saj i thanë: "Gjithçka në familje është në rregull, duhet të përpiqesh për rezultat sa më të mirë, për të nderuar atdheun!" Pas telefonatës, prindërve u radhën lot.

Por Wang Junxia e mori vesh vdekjen e të vëllait nga një gazetë dhe u hidhërua shumë. Në fillim, ajo nuk e besoi, por në fund, ajo e kuptoi që prindërit nuk i kishin thënë me qëllim që të mos ndikonin në garën e saj të ardhshme. Ajo i tha trajnerit: "Falënderoj shumë për përkujdesjen nga drejtuesi i ekipit dhe vetëm me rezultat të mirë mund t'u shpërblej dashurinë e përkrahjen vëllait tim, prindërve të mi dhe drejtuesve."

Në Spanjë, Wang Junxia që mezi mbante hidhërimin në zemër, bëri të vetin titullin kampione. Në podin më të lartë, duke vështruar flamurin kombëtar kinez, Wang Junxia derdhi lot.

Zigzaget në jetë shpeshherë i ndihmojnë sportistit të formojë një gjendje të fortë psikologjike.

Gjatë përgatitjes për Lojërat Olimpike të Atlantës, Wang Junxia zhvilloi një stërvitje të mbyllur 6 mujore. Çdo ditë, ajo vraponte së paku 20 kilometra dhe nuk bënte asnjëherë pushim, madje as kur dëmtohej në gjunjë. Ajo inkurajohej gjithmonë nga besimi dhe synimi për medaljen e artë olimpike.

Sakrificat e mëdha sjellin gjithmonë përfundim të lumtur. Më 28 korrik të vitit 1996, Wang Junxia fitoi një medalje të artë në garën 5000 metrave për femra dhe një medalje të argjendtë në garën e 10000 metrave, duke u bërë atleti i parë kinez që fiton dy medalje në Lojërat Olimipike dhe duke u quajtur si "Sorkadhja e Lindjes".

Me vullnet të lindur dhe me stërvitje të pandërprerë, Wang Junxia u shndërrua nga një lepurushe e vogël në një sorkadhe e shenjtë dhe u bë heroinë e të gjithë popullit kinez. (Jiang Lei)