Ju flet Radio e Jashtme e Kinës. Të dashur dëgjues, unë jam Pina, ju përshëndes përsëri nga Pekini. Në programin e sotëm muzikor ju ftoj të dëgjoni një grup këngësh popullore të bukura të Kinës verilindore. Në radhë të parë do të dëgjojmë së bashku këngën "Përcjellja e të dashurit", të kënduar nga këngëtarët Ye Mao dhe Liao Sha.

Kënga që po dëgjoni titullohet "Përcjellja e të dashurit". Kjo këngë me fjalë të çiltra shpreh ndjenjat e thella të vajzës për të dashurin e saj që po largohet. Në këngë thuhet: "Unë po e përcjell të dashurin tim jashtë portës, e pyes duke e zënë për dore se kur do të kthehet ? Do të të shkruaj me siguri, që të mos kesh merak, vajzë e dashur."

Verilindja përfshin provincat Heilongjiang, Jilin dhe Liaoning të Kinës. Ajo është zona kryesore fushore e Kinës që ka toka pjellore, lumenj të gërshetuar dhe pyje të dendur. Në këtë zonë ka komunikacion të zhvilluar dhe shkëmbimet ekonomike dhe kulturore midis 3 provincave janë të shpeshta, prandaj këngët popullore të këtyre provincave kanë stil dhe strukturë melodike të përafërt. Këngët popullore të kësaj zone janë të shumëllojshme, por më kryesorja është kënga e shkurtër. Tani le të dëgjojmë së bashku këngën popullore të këtij lloji: "Kthehemi në shtëpinë e nënës së nuses". Kjo këngë, me melodinë e gjallë dhe të shkathët tregon se si kthehet me gëzim një çift i ri në shtëpinë e nënës së nuses.

Këngët popullore të Kinës verilindore janë të gjalla, të sinqerta dhe entuziaste e pasqyrojnë plotësisht entuziazmin, opitimizmin dhe çiltërsinë e banorëve të kësaj zone. Tani le të dëgjojmë këngën me titull: "Shitësi shëtitës i ri".

Kjo është një këngë popullore e krijuar nga këngëtari i njohur kinez Guo Song në bazë të melodive të këngëve popullore të Kinës verilindore. Kënga me melodinë e gëzueshme dhe të shpejtë përshkruan një shitës i ri që çon mallra në fshatra ku mirëpritet shumë nga të gjithë. Në këngë thuhet: "Duke i rënë daulles dhe gongut, sjell mallra me karrocë. Mallrat e mia janë cilësore dhe të shumëllojshme, fletore për të mësuar, basma të bukura që u pëlqejnë vajzave, dhe shalle për djemtë."

Në fund të programit tonë muzikor, do të dëgjojmë së bashku këngën popullore të verilindjes "Ninullë". Kjo këngë me melodinë e shtruar shpreh ndjenjat dhe dashurinë e pakufishme të nënës për fëmijën.

Ju flet Radio e Jashtme e Kinës. Të dashur dëgjues, dëgjuam së bashku një grup këngësh popullore të Kinës verilindore. Mirudëgjofshim të shtunën tjetër, në mikrofon për ju.(Pina)