"Për të kursyer energjinë duke e shfrytëzuar atë në mënyrë racionale, duhet të ngrihet më tej niveli i përpunimit në shfrytëzimin e vendburimeve të energjisë dhe të rritet më tej cilësia e produkteve, gjë që është një mënyrë e re e kursimit të energjisë. Tani për tani, nafta bruto, qymyrguri, energjia elektrike dhe gazi natyror janë burimet kryesore të energjisë në vendin tonë, por me zhvillimin e ekonomisë, pesha specifike e naftës bruto dhe qymyrgurit bruto ndwr burimet e energjisë do të pakësohet, kurse shfrytëzimi i energjisë elektrike, sidomos i energjisë elektrike bërthamore, dhe i energjisë së erës e energjisë diellore do të zhvillohet më shpejt."

Kur flasim për mbrojtjen e mjedisit në fshat, kemi parasysh kryesisht zhvillimin e bujqësisë ekologjike. Tani për tani, mbrojtja e mjedisit ekologjik në Kinë bëhet kryesisht nëpërmjet pyllëzimit nga njeriu, por kjo punë do të shndërrohet në rimëkëmbjen e pyjeve në mënyrë natyrore. Duke filluar nga viti 2002, në rajonin autonom Guangsi të Kinës Jugperëndimore, po zbatohet plani i "pakësimit të tokave të mbjella me kultura bujqësore dhe i shtimit të sipërfaqes së pyllëzuar" dhe janë arritur tashmë suksese të dukshme në këtë drejtim. Lidhur me këtë punë, foli zoti Li Liming, shefi i zyrës përkatëse pranë Drejtorisë së pylltarisë të rajonit autonom Guangsi.

"Deri tani, kemi pyllëzuar 220 mijë hektarë toka të punueshme, që mbilleshin më parë me kultura bujqësore; kemi pyllëzuar edhe 488 mijë hektarë toka malore, ku rriteshin më parë pak drurë. Sipërfaqja e tokave të gjelbëruara në gjithë rajonin tonë është shtuar 1.8% në krahasim me vitin 2002. Kemi sistemuar edhe tokat djerrw, gjë që na ka sjellë efektivitet ekologjik, sepse që nga viti 2002 deri tani, nuk ka ndodhur asnjëherë erozion i tokave. "

Duke iu përgjigjur pyetjes nëse mbrojtja e mjedisit sjell humbje në zhvillimin e bujqësisë, drejtori Li Liming tha:

"Në fakt, të ardhurat e fshatarëve janë shtuar gjatë zbatimit të këtij plani, sepse ata marrin subvencione nga shteti për shkak të pakësimit të tokave të tyre të punueshme. Për çdo hektar tokë, shteti jep në vit 3150 juanë si subvencion për blerjen e drithërave dhe 300 juanë si subvencion për shpenzimet e tjera. Në disa zona, ku janë pyllëzuar tokat me pemë frutore, kanë filluar të merren të ardhura nga produktet frutore, si gështenja, arra dhe fruta të tjera. Shërbimet, që u bëhen pemwve frutore, janë mw të lehta në krahasim me shërbimet bujqësore në ara, prandaj fshatarëve tanë u janë dhënë mundësi të ikin nga fshati për punë në qytet dhe ky është një nga faktorët e shtimit të të ardhurave të fshatarëve tanë. Zbatimi i planit të pakësimit të tokave të mbjella me kultura bujqësore dhe i shtimit të sipërfaqes së pyllëzuar mirëpritet nga fshatarët."(Zheng)