Në materialet historike kineze, shënimet lidhur me jetën dhe veprimtarinë e Da Yusë karakterizohen nga ngjyrimet mitologjike. Në gojëdhënat kineze thuhet se, 5000 vjet më parë, hyjnia e ujit u zemërua aq shumë saqë goditi qiellin duke bërë një zgavër të madhe në të, si pasojë, uji i lumit qiellor u derdh poshtë, duke për mbytur tokat. Kreu i fisit, Yao e ngarkoi Gunin me detyrën për sistemimin e ujërave. Pas një udhëtimi të gjatë, duke hequr vuajtje të shumta, Guni arriti në malin Kunlun perëndimor, erdhi te perandori i qiellit dhe iu lut që t'i dhuronte atij një lloj dheu me emrimin "Sirang" për të sistemuar ujërat e furishme. Mirëpo perandori i qiellit nuk pranoi. Ky lloj dheu ishte i shenjtë dhe rritej sa herë që frynte erë. Guni, që i kishte në zemër banorët që vuanin në mes të përmbytjes, e vodhi dheun Sirang, duke shfrytëzuar një çast pakujdesie të rojtarëve të oborrit qiellor. Pasi u kthye në lindje, Guni e hodhi nxitimthi dheun Sirang në ujë. Dhe vërtet, dheu Sirang filloi menjëherë të rritej shpejt. Kur niveli i ujit ngrihej një metër, dheu Sirang rritej një metër; kur niveli i ujit ngrihej 10 metra, dheu Sirang rritej 10 metra. Kështu, uji i furishëm u bllokua jashtë digës dhe banorët shpëtuan nga rrethimi i ujit.

Kur mori vesh se Guni vodhi dheun Sirang, perandori i qiellit dërgoi menjëherë në tokë trupa ushtarake qiellore, të komanduara nga gjeneralët qiellorë, të cilët e morën përsëri dheun Sirang. Me t'u tërhequr dheu Sirang, uji u vërsul menjëherë, duke rrëzuar digat, duke shkatërruar arat dhe kopshtet dhe duke mbytur shumë banorë. Kreu i fisit, Yao u zemërua shumë dhe dha një urdhër, ku thuhej: "Guni dinte vetëm të bllokonte ujin duke ndërtuar diga, por nuk dinte se po të shembeshin digat, do të shkaktoheshin dëme edhe më të mëdha. Ai punoi 9 vjet për sistemimin e ujërave, por më kot. Faji i tij meriton vdekjen." Kështu, Guni u dënua me vdekje.

Pas 20 vjetëve, biri i Gunit, Da Yu u rrit dhe u bë goxha burrë. Kreu i ri i fisit, Shun që kishte trashëguar fronin e Yaos, e urdhëroi Da Yunë që të vazhdonte kauzën e madhe për sistemimin e ujërave, që nuk e kreu dot babai i tij. Da Yu nxori mësim nga disfata e babait të tij dhe e kreu me sukses detyrën për sistemimin e ujërave. Ai i shkarkoi ujërat në det, duke hapur kanale dhe duke pastruar shtratin e lumenjve.

Në shumë krahina të Kinës, janë ruajtur gojëdhënat për Da Yunë dhe janë ndërtuar në periudha të ndryshme tempuj dhe varreza të Da Yusë. Sipas gojëdhënave, kur u ngarkua me këtë detyrë, Da Yu kishte vetëm 4 ditë që ishte martuar. Gjatë 13 vjetëve të punës për sistemimin e ujërave, ai kaloi tri herë pranë portës së shtëpisë së tij, por nuk hyri asnjëherë brenda. Meqenëse Da Yu pati merita të mëdha në sistemimin e ujërave, kreu i fisit, Shuni abdikoi me gjithë qejf, duke ia lënë fronin Da Yusë. Më vonë, Da Yu themeloi dinastinë Xia, e para dinasti në historinë kineze. Që në atë kohë, shoqëria kineze filloi të zhvillohej nga shoqëri e komunës primitive në shoqëri skllavopronare. Da Yu, si një figurë legjendare në gojëdhënat mitologjike kineze, u bë gradualisht një shembull për monarkët e periudhave të ndryshme të Kinës së lashtë, i cili përputhej me kriteret e konfucionizmit. Rrëfimi mbi veprën e Da Yusë për sistemimin e ujërave do të vazhdojë të mbetet në kulturën kineze. (Zheng)