Pingpongisti i njohur pekinas Wang Tao ka lindur në vitin 1967. Nën drejtimin e të atit, Wang Tao filloi stërvitjen në pingpong kur ishte vetëm 3 vjeçar. Në vitin 1988, ai hyri në kombëtaren kineze të pingpongut. Pasi u largua nga sporti, Wang Tao hyri në institutin e sportit të Sianit për studime universitare. Tani, ai punon si trajner i përgjithshëm në ekipin ushtarak të pingpongut. Wang Tao është gjeneralmajori i vetëm ndër sportistët ushtarakë. Për shkak që e mban raketën me dorën e majtë, Wang Tao quhet edhe "Dora e majtë e artë".

Në karrierën e tij sportive, Wang Tao ka fituar nëntë tituj kampion botëror, dhe afro njëzet tituj kampion i Kinës. Dhe në vitrinën e tij në shtëpi janë ekspozuar qindra medalje dhe dhjetëra kupa. Ai është udhëheqësi i vërtetë në kombëtaren kineze të pingpongut.

Kur mbushi 3 vjeç, i ati i dha për ditëlindje një dhuratë të veçantë, një raketë të vogël, me të cilën Wang Tao filloi të njihte pingpongun. Kur ishte në shkollë të mesme, Wang Tao hyri në një ekip pingpongu të Pekinit për stërvitjen profesioniste, por një vit më pas, ekipi u shpërbë dhe Wang Tao-s i duhej të bënte një zgjedhje të rëndësishme, të vazhdonte stërvitjen apo të tërhiqej. Nëse do të vazhdonte, Wang Tao duhej të shkonte në ekipin e Singjiangut, i cili ndodhet shumë larg nga Pekini. Kjo do të thoshte që Wang Tao i vogël do të stërvitej në një vend të largët pa përkujdesjen e familjes. Ishte e vështirë të pranohej, por nëse Wang Tao nuk do të shkonte aty, kjo do të thoshte që ai duhej të largohej nga pingpongu pa asnjë arritje. Dhe më në fund, Wang Tao i tha të atit: "Baba, unë dua të shkoj në Singjiang!"

Megjithëse Wang Tao kishte dëgjuar se Singjiang ishte shumë larg, udhëtimi 3-ditor e frikësoi djalin e vogël dhe i dukej atij si një udhëtim pa fund. Pasi arriti në Singjiang, Wang Tao filloi menjëherë stërvitjen e rreptë, megjithëse moti aty nuk është i përshtatshëm për stërvitje të tillë.

Duke kujtuar ditët në Singjiang, Wang Tao tha: "Ndiej që ditët që kam kaluar aty më kanë mësuar shumë, jo vetëm në teknikë, por edhe në vullnet."

Në vitin 1983, u zhvillua në qytetin Qingdao kampionati i pingpongut për të rinj i Kinës. Wang Tao u transferua përkohësisht në ekipin ushtarak të Kinës. Në vitin 1988, kur ishte 22 vjeçar, Wang Tao hyri në kombëtaren kineze. Por ai qëndroi si rezervë dhe nuk kishte mundësi të merrte pjesë në ndeshjet e rëndësishme. Shkaku kryesor ishte që taktika e tij ishte e prapambetur. Megjithëse trajneri e ndryshoi shumë herë taktikën e tij, përsëri Wang Tao ende luante si një rezervë. Ai mendoi madje të luajë jashtë Kinës. Por ishte me fat që trajneri i përgjithshëm i atëhershëm Xu Yinsheng ishte i mendimit se taktika e Wang Tao-s nuk ishte e prapambetur, ai vetëm kërkoi disa teknika të reja. Nën drejtimin e trajnerëve të kombëtares, Wang Tao gjeti një teknikë të veçantë dhe hyri në formacionin e parë të ekipit. Në vitin 1992 në Lojërat Olimpike të Barcelonës, Wang Tao dhe shoku i tij Lylin hynë në finalen si çift dhe mposhtën çiftin gjerman me rezultatin 3-2, duke fituar një medalje të artë për Kinën.

Në vitin 1998, Wang Tao u largua nga pingpongu dhe nisi të luajë si role të vogla në filma. Por më pas ai u rikthye në ekipin ushtarak të pingpongut dhe tani punon si trajner i përgjithshëm. Familja dhe miqtë e tij janë të mendimit se ky është një rol i përshtatshëm për të. (Jiang Lei)