Gazeta kineze "Renminribao" njoftoi se më 21 maj, u mbyll në Shenzhen të Kinës Panairi i dytë ndërkombëtar i sektorit kulturor i Kinës.

Në këtë panair morën pjesë delegacionet e ardhura nga 34 provinca, rajone autonome e qytete kineze dhe 26 qytete të huaja. Vëllimi i tregtisë arriti në 10 miliardë juanë, shifër kjo që u shtua dy herë në krahasim me panairin e vitit të kaluar.

Ky panair u nda në disa subjekte si projektimi, arti, media, botimi, filmi vizatimor etj. që shfaqën plotësisht rezultatet e fundit të zhvillimit të sektorit kulturor kinez. Gjatë panairit u zhvilluan edhe Forumi i dytë i strategjisë së zhvillimit kulturor, Forumi i sektorit kulturor, Forumi digjital etj.

U hap Festivali i Indisë i Universitetit të Pekinit

Korrespondentët e Radios së Jashtme të Kinës njoftuan se më 22 maj, u hap në Universitetin e Pekinit "Festivali i Indisë i Universitetit të Pekinit ? Viti miqësor 2006 Kinë-Indi". Në ceremoninë e hapjes morën pjesë ambasadori i Indisë në Kinë dhe dhjetëra studiues kinezë dhe të huaj.

Në fjalimin e mbajtur në ceremoninë e hapjes, ambasadori i Indisë në Kinë Nalin Surie tha se midis popujve të Indisë dhe të Kinës ka miqësi tradicionale, të dyja palët kanë zhvilluar shkëmbime dhe bashkëpunim efektiv në fushën ekonomiko-tregtare, kulturore, arsimore etj.

Në ceremoninë e hapjes, artistë kinezë shfaqën këngë e valle indiane. Siç bëhet e ditur, ky festival do të zgjasë deri në fund të këtij muaji. Gjatë festivalit do të zhvillohen seminare lidhur me shkëmbimet kino-indiane, muzikën indiane, vallet etj.

U hap muzeumi i ri i kryeqytetit i Pekinit

Gazeta kineze "Xinjingbao" njoftoi se 18 maji është Dita e 29-të ndërkombëtare e muzeumeve. Po këtë ditë, u hap zyrtarisht muzeumi i ri i kryeqytetit i Pekinit. Ky është muzeumi i 131-të në Pekin.

Muzeumi i kryeqytetit u hap në vitin 1981 dhe në të ka 250 mijë relikte të çmuara. Muzeumi i ri i kryeqytetit ndodhet në qendrën e qytetit dhe është ndërtesa simbolike e Pekinit në shekullin e ri. Sipërfaqja dhe mjedisi i muzeumit janë përmirësuar shumë në krahasim me muzeumin e vjetër.

Piktori italian me origjinë kineze Xiao Qin zhvillon ekspozitën e veprave në Pekin

Korrespondentja e Radios së Jashtme të Kinës njoftoi se si një aktivitet i "Vitit të Italisë" në Kinë, më 20 maj u hap në Galerinë e Arteve të Kinës në Pekin Ekspozita e veprave të piktorit italian me origjinë kineze Xiao Qin.

Në këtë ekspozitë janë vendosur 84 vepra të Xiao Qinit të krijuara gjatë 50 vjetëve që pasqyrojnë shkëmbimet kulturore midis Kinës dhe Italisë.

Xiao Qin është i biri i themeluesit të muzikës moderne kineze Xiao Youmei. Ai lindi në Shangai të Kinës dhe studioi pikturë në Tajvan. Tani ai jeton në Itali. Pikturat e Xiao Qinit lidhin ngushtë artin e Perëndimit me kulturën orientale dhe kanë karakteristika të veçanta. (Fani)