Tani 51-vjeçari Zhou Yuanqiang është shumë i famshëm si një regjisor fshatar dhe shumë bashkëfshatarë shpresojnë të kenë një rol në dramat televizive të tij. Deri tani, Zhou Yuanqiang ka xhiruar 27 drama televizive ku ka marrë për të luajtur role më se 1300 bashkëfshatarë. Njëkohësisht shumë njerëz nga krahina të ndryshme të Kinës e madje edhe të huaj kanë shprehur dëshirën për të interpretuar në dramat televizive të Zhou Yuanqingut. Në krahasim me dramat e tjera televizive në dramat e Zhou Yuanqiangut nuk ka asnjë aktor profesionist. Ai tha:

"Unë nuk kam para të ftoj aktorë profesionistë, njëkohësisht aktorët në dramat e mia nuk marrin pagesë, ata xhirojnë drama televizive vetëm për t'u argëtuar."

Në fakt në fillim, bashkëfshatarët e Zhou Yuanqiangut nuk ishin shumë entuziastë për xhirimin e dramave televizive. Ata ishin të mendimit se xhirimi nga fshatarët i dramës televizive është një gjë e paimagjinueshme. Duke folur për shkakun e xhirimit të dramave televizive, Zhou Yuanqiang tha se ai shpreson të pasurojë jetën kulturore të fshatarëve.

Zhou Yuanqiang është një njeri i modës. Herët në vitin 1984 kur sapo filloi të zbatohet në Kinë politika e reformës dhe hapjes ndaj botës së jashtme, Zhou Yuanqiang mori kredi nga banka dhe bleu televizor, video etj. Në atë kohë, edhe në familjet qytetare kineze rrallë i gjejnë këto pajisje elektro-shtëpiake. Në vitin 1991, Zhou Yuanqiang mori përsëri kredi nga banka dhe bleu një videokamerë. Në fillim ai e përdorte këtë videokamerë vetëm për të regjistruar aktivitete kremtuese ose përkujtimore të bashkëfshatarëve. Një ditë, një i moshuar e këshilloi të xhirojë dramë televizive. Zhou Yuanqiang tha:

"Një herë një i moshuar më tregoi se vendlindja ime ka shumë tregime historike që janë subjekte të mira për drama televizive. Njëkohësisht në atë kohë nuk kishte shumë drama televizive që pasqyronin jetën e vërtetë të fshatarëve. Prandaj vendosa të xhiroj drama televizive të interpretuara nga fshatarët."

Në vitin 1992, Zhou Yuanqiang gjeti disa bashkëfshatarë dhe filloi të xhirojë dramën e parë të vet televizive. Skenari i dramës televizive u krijua nga ata vetë dhe të gjitha materialet skenike u prodhuan po nga ata vetë. Kushtet e xhirimit ishin shumë të thjeshta, Zhou Yuanqiang dhe bashkëfshatarët e tij kapërcyen vështirësi të panumërta. Pas një viti, ata mbaruan me sukses xhirimin e dramës televizive "Yje". Kjo dramë televizive që përshkruante luftën revolucionare të fshatarëve ngjalli jehonë të madhe duke u përshëndetur nga bashkëfshatarët.

Suksesi i dramës së parë televizive e shtoi entuziazmin e Zhou Yuanqiangut për xhirimin e dramës televizive. Pas kësaj, ai ka xhiruar njëpasnjë drama të reja televizive.

Mungesa e fondeve është problemi më i madh i Zhou Yuanqiangut. Një regjisor profesionist harxhon zakonisht qindra mijë juanë për të xhiruar një dramë televizive, por Zhou Yuanqiang ka të shumtën 4000 juanë për një dramë televizive. Për të xhiruar drama televizive, familja e Zhou Yuanqiangut ka dhënë ndihmesë të madhe, bashkëshortja dhe djali i tij punojnë në qytet për grumbullimin e parave. Zhou Yuanqiang u shpreh se megjithëse ka shumë vështirësi, sa herë që sheh entuziazmin e madh të bashkëfshatarëve, ai e largon menjëherë mendimin për të hequr dorë.

Nëpërmjet njoftimeve të medias, Zhou Yuanqiang u bë i famshëm. Shumë shkolla të larta e ftuan të japë mësime, madje disa regjisorë profesionistë e quajnë "Mjeshtri fshatar". Por Zhou Yuanqiang është i mendimit se ai nuk është një artist. Ai tha:

"Nuk mund të krahasohem me regjisorët profesionistë, jam vetëm një regjisor amator. Unë xhiroj drama televizive për të tërhequr më shumë fshatarë të marrin pjesë në veprimtari kulturore duke pasuruar jetesën e tyre." (Fani)