dëgjoni

Lojërat e shahut kanë një histori të lashtë në Kinë dhe janë parapëlqyer shumë nga kinezët. Në Kinë, shahu Ueiqi, shahu dhe shahu kinez janë përfshirë edhe në disiplinat zyrtare sportive. Ndër këto 3 lojëra shahu, shahu Ueiqi dhe shahu kanë ndikim relativisht të madh edhe në sferën botërore. Megjithëse lojërat e shahut janë të përhaura në Kinë dhe kanë bazë të mirë në publik, disa vjet më parë shahistët kinezë nuk kishin rezultate të mira në garat botërore. Por ky nivel i ulët ndryshoi këtë vit. Gjatë këtyre 5 muajve, shahistët kinezë janë shpallur kampionë radhazi në Garën Botërore të Shahut Ueiqi për Kupën Sumsung, Garën e parë kino-jugkoreane për Kupën Kanguan-Land, Kampionatin Botëror të Shahut për Femra të vitit 2006 si dhe Garën Botërore të Kampionëve të Shahut Ueiqi për Kupën LG.

Kryetari i Federatës së Shahut të Kinës, Wang Runan tha se prirja e fortë e shahistëve kinezë në disa muaj të parë të këtij viti vjen nga akumulimi disavjeçar. Ai tha:

"Kur pranojnë urime nga anë të ndryshme, kampionët tanë duhet të marrin parasysh se çdo fitore është rezultat i përpjekjeve të disa brezave. Përgatitja nga shteti, fryma e ekipit, përkrahja nga familja dhe atmosfera harmonike, të gjitha këto janë të pamungueshme."

Disa vjet më parë, shahistët kinezë të Ueiqi-së nuk kishin rezultate të mira në garat ndërkombëtare dhe të gjitha qarqet kineze të shahut Ueiqi ranë në nivel të pakënaqshëm. Por ekipi i shahut Ueiqi i Kinës nuk hoqi dorë nga përpjekjet. Krahas përpjekjeve të shahistëve të nivelit kombëtar, Federata e Shahut Ueiqi e Kinës përgatiti me forcë të madhe edhe talente të reja dhe, si rezultat, u shfaqën vazhdimisht shahistë të rinj të dalluar në garat botërore. Njëkohësisht, në ekipin harmonik të shahut Ueiqi të Kinës, shahistët shkëmbyen shpesh teknika me njëri-tjetrin dhe ngritën së bashku nivelin. Këtë e ndjeu thellë shahisti i Ueiqi-së, Chang Hao, që dha ndihmesë të madhe në Garën e Parë Kino-jugkoreane për Kupën Kanguan-Land. Ai tha:

"Në lojërat e shahut, pavarësisht nëse bëhet fjalë për shahun Ueiqi apo shahun, shahistët marrin pjesë në ndeshje si individë. Por mendoj se Federada e Shahut i Kinës është një kolektiv i mirë, i cili na bën ne shahistëve të futemi në stërvitje dhe gara të qetë dhe të gëzueshme. "

Kryetari i Federatës së Shahut të Kinës Wang Runan tha se gjendja e qetë shpirtërore është gjithashtu kyçi i përparimeve të shahistëve kinezë. Shahistja kineze Xu Yuhua u shpall "mbretëresha botërore e shahut" në Kampionatin Botëror të Shahut për Femra në mars të këtij viti. Gjatë një interviste të dhënë pas kampionatit, ajo tha çiltër se gjatë ndeshjeve ajo nuk mendonte për gjëra të tjera, por i kaloi ato njëra pas tjetrës me shpirt të qetë, duke gëzuar procesin e lojës së shahut.

"Shpallja kampion botëror është objektivi që ëndërron çdo shahist. Por në fakt, para se të shkoja në Rusi për këtë kampionat, nuk e çoja ndër mend fare rezultatin. Kalova hap pas hapi."

Megjithëse shahistët kinezë kanë pasur progres të konsiderueshëm këtë vit, prapësëprapë dalin përpara tyre edhe shumë sfida dhe vështirësi. Të marrim për shembull shahun Ueiqi. Në përgjithësi ekipi jugkorean ndodhet në një nivel të përparuar botëror. Rritja e nivelit të shahistëve kinezë të Ueiqi-së hapi vetëm siparin e konkurrimit të gjithanshëm me rivalë të fuqishëm. Përsa i përket shahut, ekipet kineze të shahut të meshkujve dhe të femrave shkuan në Itali për të marrë pjesë në Garën e 37-të Botërore Ekipore Olimpike të Shahut. Trajneri i përgjithshëm i ekipit kombëtar të shahut të Kinës Ye Jiangchuan tha:

"Në 4 garat e kaluara botërore ekipore olimpike të shahut, ekipi kinez i femrave është shpallur kampion 4 herë radhazi. Por kësaj here, jemi në situatën e ndërrimit të të vjetrave me të rejat. Duhet të përpiqemi sa më shumë në rrugën e gjatë të së ardhmes."

Kryetari i Federatës së Shahut të Kinës Wang Runan tha se për shahistët kinezë, fitorja është vetëm pikënisje për më tej dhe jo pikë e fundit. Duke gëzuar fitoret e arritura, shahistët kinezë po vazhdojnë përpjekje të reja. (Wang Lei)