Në vitin 2005 në Kinë u nxorrën në treg mbi 80 vetura të reja, por shumë pak prej tyre ishin të markave të pavarura kineze. Vetëm 20% e veturave të modeleve të reja të prodhuara këtë vit kanë markat e veta autonome. Duke shpjeguar këtë dukuri, zv/shefi i Qendrës së studimit të zhvillimit pranë Këshillit të Shtetit të Kinës z. Liu Shijin shprehu mendimin se kostoja dhe rreziku i lartë janë shkak kryesor i sprapsjes së shumë ndërmarrjeve para studimit dhe prodhimit autonom të veturave të reja. Ai tha:

"Në fillim të zhvillimit të industrisë së automobilave, kërkesa e tregut ishte shumë e madhe, me një teknologji të thjeshtë të importuar nga jashtë, mund të prodhosh produkte relativisht të arrira, me të cilat mund fitosh para në treg, kjo është një zgjedhje. Ndërsa një zgjedhje tjetër është që të studiosh dhe të prodhosh vetë, por mungojnë fondet, specialistët e talentuar dhe teknologjia, në këto rrethana shumë ndërmarrje zënë, në radhë të parë, tregun e nuk merren me studimin dhe prodhimin e veturave të veta."

Z. Liu u shpreh se sigurimi i shitjes së shpejtë të produkteve duke u mbështetur tek blerja e teknologjisë së huaj është vetëm një gjë e rastit, industria e automobilave e Kinës duhet të zhvillohet me siguri në rrugën e vet autonome në të ardhmen dhe të ketë veturat e modeleve dhe teknologjinë e vet. Qeveria kineze e ka kuptuar tashmë rëndësinë e kësaj pike. Në prill të vitit 2005, Drejtoria e Përgjithshme e Doganës Kineze, Ministria e Tregtisë dhe sektorë të tjerë publikuan së bashku një përcaktim për shtimin e taksave doganore të importit të pjesëve të këmbimit të veturave. Nxjerrja e këtij përcaktimi ka bërë që ndërmarrjet kineze të prodhimit të automobilave ta kenë të qartë se së shpejti do të përfundojë koha e fitimit të parave nëpërmjet montimit të thjeshtë të veturave.

Në kohën kur pjesa më e madhe e ndërmarrjeve kineze bënin përpjekje të mëdha për prodhimin e veturave të markave të huaja, shumë pak ndërmarrje i kanë përqendruar forcat e veta në studimin dhe prodhimin e veturave me shkarkim të paktë të gazrave, duke lënë mënjanë markat e huaja dhe tregun e veturave të kategorisë së lartë dhe të mesme. Vitin e kaluar, u shitën 200 mijë vetura të vogla të markës Xiali të prodhuara nga Kompania aksionare e veturave me përgjegjësi të kufizuar e Tiancinit, duke zënë 30% të tregut të veturave të këtij tipi. Drejtori i përgjithshëm i kësaj kompanie z. Wang Gang i tha korrespondentit se këmbëngulja për një kohë të gjatë në zhvillimin e veturave të markës së vet autonome është shkaku kryesor i suksesit të tyre. Ai tha:

"Gjatë 15 vjetëve, kemi çuar përpara ndërmarrjen tonë duke u mbështetur plotësisht në sistemin tonë të studimit, të prodhimit dhe të administrimit, kemi krijuar në mënyrë të pavarur fabrikën e motorëve dhe të kutive të shpejtësisë, një sistem të plotë të blerjes dhe të shitjes në internet."

Rruga e zhvillimit të pavarur të Kompanisë së automobilave të parë të Tiencinit nuk është e mbarë. Në fund të viteve '90 dhe në fillim të këtij shekulli, veturat e markës Xiali ishin të panjohura dhe nuk zinin shumë treg. Por megjithatë kjo kompani jo vetëm nuk hoqi dorë, por përkundrazi shtoi fonde në studimin dhe prodhimin e veturave ekonomike me kursim të energjisë dhe të mbrojtjes së mjedisit. Sot veturat e saj janë pranuar nga konsumatorët. Sipas planit të kësaj kompanie, deri në vitin 2010 do të realizohet qëllimi i shitjes së 1 milion veturave në vit.

Nën shembullin e kompanisë së automobilave të Tiencinit, gjithënjë e më shumë ndërmarrje kineze të automobilave filluan ta vënë theksin e zhvillimit të ardhshëm në studimin dhe prodhimin e pavarur të veturave. Drejtorja e përgjithshme e Kompanisë aksionare kineze të automobilave "Muri i Madh" zj. Wang Fengying u shpreh se qëllimi i ndërmarrjeve kineze është jo vetëm prodhimi i veturave me shkarkim të paktë të gazrave, por edhe i veturave më të mira. Ajo tha:

"Veturat kineze janë njohur në tregun ndërkombëtar si vetura me çmim të arsyeshëm dhe që kanë arritur përparime të mëdha teknologjike dhe cilësore. Në fushën e konsumit të veturave të kategorisë së mesme, veturat kineze kanë hapësirë shumë të madhe."

Për të prodhuar në mënyrë të pavarur veturat e veta, ndërmarrjet kineze të automobilave po marrin masa të shumta për të shtuar aftësinë e zhvillimit. Në shkurt të vitit 2005, Grupi i automobilave Nanjing i Kinës bleu kompaninë e automobilave angleze Rower me një histori mbi 100 vjeçare dhe pjesën e prodhimit të motorëve, duke siguruar një platformë të prodhimit të automobilave të nivelit ndërkombëtar. Disa ndërmarrje të tjera po përgatiten të bashkohen për të realizuar planin e krijimit të markave të veta.

Specialistët theksuan se prodhimi i pavarur i veturave të markës së vet nuk mund të bëhet brenda një kohe të shkurtër. Ndërmarrjet duhet të shtojnë gradualisht investimet dhe përgjegjësit e këtyre ndërmarrjeve duhet të jenë largpamës dhe të mos kërkojnë vetëm efektivitet të shkurtër. Zv/shefi i Qendrës së studimit të zhvillimit pranë Këshillit të Shtetit të Kinës z. Liu Shijin tha se qeveria kineze duhet të japë mbështetje politike dhe financiare për këto ndërmarrje të automobilave. Ai tha:

"Vetëm një ndërmarrje nuk ka forcë të mjaftueshme teknike, prandaj qeveria duhet të organizojë dhe të mbështesë nga ana financiare objektet e studimit dhe të prodhimit të pavarur të veturave."

Tani, qeveria kineze i ka përfshirë veturat e markave të veta në listën e blerjes dhe po inkurajon ndërmarrjet e prodhimit të veturave të bashkohen dhe të rigrupohen. Në planin e zhvillimit ekonomik dhe shoqëror të Kinës, në 5 vjetët e ardhshëm që u publikua pak kohë më parë, qeveria kineze parashtroi se industria e automobilave do të shtojë aftësinë e prodhimit të pavarur dhe të krijimit të të rejave, do të shpejtojë zhvillimin e motorëve,të pjesëve të këmbimit elektronike etj. të veturave që kanë patentë të pavarur intelektuale etj. në mënyrë që veturat e markave origjinale të zënë sa më shumë treg dhe të krijohen disa ndërmarrje që të prodhohen 1 milion vetura. Mund të parashikojmë se gjithënjë e më shumë ndërmarrje kineze të prodhimit të automobilave do të marrin rrugën e prodhimit të pavarur dhe të kriimit të të rejave. (Pina)