Në nënrubrikën "Shkëmbime kulturore"do t'ju njohim me lexuesit e gazetës "Dritare".

Qysh nga numri i saj i parë i botuar në vitin 2004 e deri tani, gazeta "Dritare" në gjuhën shqipe, organi i redaksisë së gjuhës shqipe të Radios së Jashtme të Kinës, ka botuar 9 numra që janë pritur shumë mirë nga lexuesit shqiptarë.

Edhe punonjësit e Prokurorisë shqiptare gjatë vizitës së tyre në Kinë lexuan edhe gazetën " Dritare", dhe u befasuan nga faqet me fotografi të bukura dhe përmbajtja e pasur e kësaj gazete dhe u shprehën se kjo gazetë u la atyre përshtypje të thella. Sekretari i përgjithshëm i Prokurorisë së Përgjithshme të Shqipërisë Stavri Koçollari tha:"Më ka emocionuar dhe prekur realisht që në momentin e parë që zbritëm në aeroportin e Pekinit, njohja me gazetën "Dritare". Më bëri shumë shumë përshtypje fakti që në një vend kaq të largët, siç jemi ne me njëri-tjetrin, kishte një gazetë të tillë që do të shkruante për Shqipërinë e për Kinën, për marrëdhëniet midis këtyre dy vendeve, të cilat i kanë pasur me kohë shumë të afërta. Për një periudhë patën një ftohje, por unë po konstatoj shumë sinqerisht që ka ardhur momenti që ne duhet përsëri t'i rthellojmë këto marrëdhënie. Ne kemi ç'të përfitojmë nga një vend kaq i madh e i fuqishëm. Dhe më ka bërë përshtypje edhe një fakt tjetër. Këtu njerëzit janë shumë punëtorë, pa llafe, e duan punën, i vlerësojnë arritjet që kanë bërë sidomos gjatë këtyre dhjetë viteve të fundit. Dhe ne vërtet kemi ç'të mësojmë nga një vend, i cili megjithëse kaq i madh, nga më të mëdhenjtë, më i madhi në botë, me një zhvillim ekonomik të jashtëzakonshëm, ka një sjellje me ne që jemi një popull megjithëse shumë i vogël, sjellje prej të barabarti. Këto përshtypje më lanë të gjitha takimet që patëm qoftë me funksionare shtetërore të lartë, qoftë me popullin, me qytetarë apo fshatarë kinezë. Ju lumtë atyre që e kanë hapur këtë gazetë, e cila pavarësisht se ka nevojë për të pasur rubrika më të gjera, është arritje goxha e madhe. Faleminderit! "

Gjatë qëndrimit të grupit të CCTV-së në Shqipëri për të intervistuar kineastë veteranë shqiptarë, në recepsionin e Hotelit "Nirvana", ku qendroi ky grup kinez, u vendosën disa numra të gazetës " Dritare " për mysafirët e këtij hoteli. Kur erdhën në këtë hotel për t'u intervistuar nga grupi televiziv kinez, kineastë, regjisorë dhe aktorë të brezit të vjetër shqiptarë lexuan disa artikuj të gazetës "Dritare" mbi shkëmbimet kulturore midis Kinës dhe Shqipërisë, si "Biseda midis ambasadorit të Shqipërisë në Kinë Kujtim Xhani dhe prezantuesit të njohur të CCTV-së Cui Yongyuan mbi filmat e vjetër shqiptarë", "Filmi shqiptar në sytë e personave të njohur kinezë", "Takimet midis kineastëve kinezë dhe shqiptarë" etj. Ata u emocionuan shumë dhe i treguan gazetares përshtypjet e tyre mbi Kinën etj.

Pasi lexoi gazetën " Dritare " gjatë qëndrimit për vizitë në Pekin, regjisori i njohur shqiptar Pirro Milkani u kënaq pa masë, sidomos për vlerësimet e larta të personave të njohur kinezë për filmin e tij " Ngadhnjim mbi vdekjen". Ndër të tjera ai tha : "Jo vetëm për mua, por edhe për shumë njerëz, Kina është një vend i magjishëm, me histori, me traditë dhe me kulturë. Nga të gjithë njerëzit që kanë vizituar Kinën, edhe tani kohët e fundit, janë emocionuar kur kam dëgjuar që edhe sot e kësaj dite, njerëzit i kujtojnë ato filma, sidomos gjenerata më e vjetër. Sepse sot Kina ka ndryshuar."

Pionieri i kinematografisë shqiptare, regjisori Hysen Hakani tha:"Sado të përpiqem të tregohem modest, nuk e përmbaj dot veten. Është kënaqësi e madhe të dëgjosh që filmat, edhe pse kanë gjysmë shekulli që janë bërë, gëzojnë atë popullaritet në Kinë, në atë Kinën e madhe, shtetin kolos, për të cilin unë ushqej dashuri dhe respekt të thellë. Kjo më mbushi me gëzim."

Një nga aktorët e njohur shqiptarë që ka luajtur rolin e anëtarit të njësitit guerril në filmin " Ngadhnjim mbi vdekjen", Andon Qeyari pasi pa fotografitë e bashkëshortes së tij të bëra gjatë takimeve me drejtuesen e kanalit televiziv të CCTV-së Jia Qi dhe me prezantuesin e njohur të CCTV-së Cui Yongyuan, gjatë vizitës në RJK, ku u takua me anëtarët e redaksisë së gjuhës shqipe si dhe vizitoi studion e kësaj radioje, u gëzua pa masë dhe u tregoi gazetarëve gruan e tij: "Dhe kjo është gruaja ime ". Ai u emocionua aq shumë sa nuk e përmbante dot veten dhe nuk gjente dot fjalët më të mira për të shprehur ndjenjat e tij. Ai tha : " Me emociononi me këto që thoni. Unë u kam folur shumë miqve të mi aktorë, për jehonën që kanë filmat tanë në Kinë, sepse ne nuk e dinim këtë gjë, që filmat tanë kanë një jehonë shumë të madhe në Kinë. Janë të shokuar, është e pabesueshme thonë. Por kur unë u thashë se ime shoqe, gruaja ime bëri një vizitë në Kinë, dhe ata flisnin me një simpati të madhe për filmin "Ngadhnjim mbi vdekjen", edhe për filmat e tjerë shqiptarë. Unë gjej rastin për t'ju falënderuar, jo vetëm prezantuesit, por edhe tërë popullin kinez, i cili pa dyshim ka një simpati shumë të madhe, por edhe brezi ynë, edhe ne që kemi njohur miqësinë, që kemi njohur punën tuaj, që kemi njohur vuajtjet tuaja, që kemi njohur luftën tuaj, gjakun tuaj edhe sot e gjithë ditën, punën tuaj, guximin tuaj, ju keni një simpati të jashtëzakonshme."

Gjatë takimit në shtëpinë e tij me gazetaren e Radios së Jashtme të Kinës, gazeta " Dritare" e sjellë nga Kina i ngjalli shkrimtarit të madh shqiptar Dritëro Agolli kujtimet e bukura për miqtë e tij kinezë. Ai i tregoi gazetares Huailu:"Unë kam edhe shumë miq në Kinë, sepse unë kam studiuar në San Petërburg, në Leningrad, ku ka pasur shumë studentë kinezë. Njeri që ka qenë bashkë me mua në një dhomë quhet Wang Zongzhe. Ai ka qenë korrespondent i gazetës "Zhenminzhibao" në Moskë dhe pastaj në Budapest. Pastaj kur erdhi në vitet '70 këtu, si korrespondent që shoqëronte Zhou Enlain, unë u takova në atë pritje, pas shumë vjetëve që kam qenë në Leningrad me të. Edhe një kinez tjetër, që quhet Zhou Yongqiang, nuk di a jeton apo jo. Edhe ky ishte student shumë i mirë dhe kemi qenë bashkë, por atë nuk e kam takuar."

Asistent-profesorja e kimisë e Universitetit të Tiranës Vera Lazo ka qenë dy herë për studime e për punë në Kinë, herën e parë në vitin l974-l978, ndërsa herën e dytë në vitin l992. Ajo ka shumë miq kinezë dhe vitet e fundit gjatë pjesëmarrjes në një konferencë ndërkombëtare të Kimisë në Kinë, zonja Vera Lazo erdhi për vizitë në Radion e Jashtme të Kinës, pa faqen e internetit dhe gazetën " Dritare" dhe duke folur për gazetën " Dritare" në intervistën me gazetaren e Radios ajo u shpreh: " Kishte goxha informacione dhe më pëlqeu ajo mënyra se si shkruhej me ndjenja shumë të pastra për Shqipërinë. Ashtu siç kemi ne ndjenja të pastra për Kinën, të njëjtat reflektoheshin edhe aty. Megjithëse unë i hodha një vështrim të përgjithshëm, nuk e pashë me kujdes, po më pëlqeu mënyra se si trajtoheshin." ( Zhai)